સ્કંદ પુરાણ · અધ્યાય 6.12

॥ સૂત ઉવાચ ॥ ॥
એવં સ વસુધાપાલો બ્રાહ્મણેભ્યઃ સ્વશક્તિતઃ ॥
દદૌ તુ નગરં કૃત્વા પુરંદરપુરોપમમ્

મુક્તાપ્રવાલવૈડૂર્યરત્નહેમવિચિત્રિતૈઃ ॥
ભ્રાજમાનં ગૃહશ્રેષ્ઠૈર્દ્યૌર્નક્ષત્રગણૈરિવ

પ્રાસાદૈઃ સ્ફાટિકૈશ્ચૈવ કૈલાસશિખરોપમૈઃ ॥
પતાકાશોભિતૈર્દિવ્યૈઃ સમંતાત્પરિવારિતમ્

કાંચનૈઃ સુવિચિત્રૈશ્ચ પ્રોન્નતૈરમલૈઃ શુભૈઃ ॥
તોરણાનાં સહસ્રૈશ્ચ શોભિતં સુમનોહરમ્ ॥।

મણિસોપાનશોભાભિર્દીર્ઘિકાભિઃ સમંતતઃ ॥
આરામકૂપયંત્રાદ્યૈઃ સર્વોપકરણૈર્યુતમ્ ॥
નિવેદ્ય બ્રાહ્મણેંદ્રાણાં કૃતકૃત્યો બભૂવ સઃ

।
શંખતીર્થે સ્થિતો નિત્યં સમાહૂય તતઃ સુતાન્॥
પુત્રાન્પૌત્રાંસ્તથા ભૃત્યાન્વાક્યમેતદુવાચ હ

એતત્પુરં મયા કૃત્વા બ્રાહ્મણેભ્યો નિવેદિતમ્ ॥
ભવદ્ભિર્મમ વાક્યેન રક્ષણીયં પ્રયત્નતઃ । ૭ ॥
યથા સ્યુર્બ્રાહ્મણાઃ સર્વે સુખિનો હૃષ્ટમાનસાઃ ॥
યુષ્માભિઃ પાલનં કાર્યં તથા સર્વૈઃ સમાહિતૈઃ॥
યશ્ચૈતાન્ભક્તિસંયુક્તઃ પાલયિષ્યતિ ભૂમિપઃ ।
અન્યોઽપિ પરમં તેજઃ સ સંપ્રાપ્સ્યતિ ભૂતલે

અજેયઃ સર્વશત્રૂણાં પ્રતાપી સ્ફી તિસંયુતઃ ॥
ભવિષ્યતિ ન સન્દેહો બ્રાહ્મણાનાં સ પાલનાત્

પુત્રપૌત્રસુભૃત્યાઢ્યો દીર્ઘાયૂ રોગવર્જિતઃ ॥
બ્રાહ્મણાનાં પ્રસાદેન મમ વાક્યાદ્ભવિષ્યતિ

યઃ પુનર્દ્વેષસંયુક્તઃ સંતાપં ચૈવ નેષ્યતિ ॥
એતાન્બ્રાહ્મણશાર્દૂલાન્નરકં સ પ્રયાસ્યતિ

તથા દુઃખાનિ સંપ્રાપ્ય દૃષ્ટ્વા નૈકાન્પરાભવાન્ ॥
વિયોગાનિષ્ટબન્ધૂનાં વ્યાધિગ્રસ્તો વિગર્હિતઃ

વંશોચ્છેદં સમાસાદ્ય ગમિષ્યતિ યમાલયમ્ ॥
તસ્માત્સર્વપ્રયત્નેન રક્ષણીયમિદં પુરમ્ ॥
મમ વાક્યાદ્વિશેષેણ હિતમિચ્છદ્ભિરાત્મનઃ

એવં સ ભૂપતિઃ સર્વાંસ્તા નુક્ત્વા તપસિ સ્થિતઃ ॥
તેઽપિ સર્વે તથા ચક્રુર્યથા તેન ચ શિક્ષિતાઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્રમાહાત્મ્યે ચમત્કારભૂપેન પુરસ્થિત્યર્થં નિજપુત્રાદીનામુપદેશકરણવર્ણનંનામ દ્વાદશોઽધ્યાય