Skanda Purana · Chapter 6.118

// ṛṣaya ūcuḥ // //
yattvayā sūtaja proktaṃ takṣakaḥ saṃbhaviṣyati //
saurāṣṭraviṣaye rājā raivatākhyo mahābalaḥ

tathā tasya priyā bhāryo nāmnā kṣemaṃkarīti yā //
ānartādhipaterharmye saṃbhaviṣyati bhāminī

tābhyāṃ sarvaṃ samācakṣva vṛttāṃtaṃ sūtanaṃdana //
atra naḥ kautukaṃ jātaṃ vicitraṃ jalpatastava

kedāraśca śruto'smābhiḥ sūtaputra himācale //
sa kathaṃ tatra saṃjātaḥ sarvaṃ vistarato vada

//
// sūta uvāca // //
atra vaḥ kīrtayiṣyāmi sarvaṃ brāhmaṇasattamāḥ //
yathā mayā śrutaṃ pūrvaṃ nijatātamukhāddvijāḥ

pūrvaṃ tacchāpadoṣeṇa takṣako dharaṇītale //
saurāṣṭrādhipaterharmye raivatākhyo babhūva ha

ānarttādhipateścāpi saṃjātā tanayā gṛhe //
tasyāścāpi suvikhyātaṃ nāma jātaṃ dharātale

kṣemaṃkarīti viprendrāḥ karmaṇā prakaṭīkṛtam //
ānartādhipatiḥ pūrvamāsīdrājā prabhaṃjanaḥ

tasya vairaṃ samutpannaṃ bahubhiḥ saha bhūmipaiḥ //
tato nirvāsyate deśo nīyate paśavo balāt //
śatrubhirjāyate yuddhaṃ divā naktaṃ dvijottamāḥ

tataḥ katipayāhasya tasya bhāryā priyaṃvadā //
ṛtusnātā dadhārātha garbhaṃ puṇyaṃ nijodare

//
yataḥ prabhṛti tasyāḥ sa garbho'bhūdudarāśrayaḥ//
tataḥ prabhṛti rāṣṭrasya kṣemaṃ jātaṃ tathā pure//////
eke saṃkhye jitā stena śatravo'pi sudurjayāḥ //
nihatāśca tathaivānye mitrabhāvaṃ samāśritāḥ

tato jajñe śubhā kanyā tasyāḥ padmāyatekṣaṇā//
aṃdhakāre'pi yadrātryāṃ dyotitaṃ sūtikāgṛham///३//
athā'sau pārthivaścakre sutavatsumahotsavam//
tasyāstoṣasamāyukto gītavādyādinisvanaiḥ ///४//
dine trayodaśe prāpte nāma tasyā yathocitam//
vihitaṃ bhūbhujā tena viprāṇāṃ purato dvijāḥ ///५//
yasmātkṣemaṃ samutpannaṃ garbhavāse'pi saṃsthayā //
anayā kṣemaṃkarīnāma tasmādeṣābhave ddvijāḥ ///६//
evaṃ suvihitā khyātā vṛddhiṃ yāti dinedine //
śuklapakṣe kalā cendoryathaiva gaganāṃgaṇe///७//
tatastāṃ yauvanopetāṃ raivatāya mahīpatiḥ //
dadau saurāṣṭranāthāya kāle vaivāhike śubhe

atha tābhyāṃ sutā jātā revatīnāma viśrutā //
bhaṭṭikāśāpadoṣeṇa śeṣapatnī yaśasvinī ///९//
yā tūḍhā rāmarūpeṇa nāgarājena dhīmatā //
putrapautravatī jātā saubhāgyamadagarvitā

na ca tābhyāṃ suto jātaḥ kathaṃcidapi vaṃśajaḥ //
vayasoṃ'te'pi vipreṃdrāstato duḥkhaṃ vyajāyata

atha tau maṃtrivargasya rājyaṃ sarvamaśeṣataḥ //
arpayitvā tu putrārthaṃ tapo'rthamiha cāgatau //

tataḥ svamāśramaṃ gatvā sthitau tatra samāhitau //
devīṃ kātyāyanīṃ sthāpya tadārādhanatatparau

yayā vinihato raudro mahiṣākhyo mahāsuraḥ //
kaumāravratadhāriṇyā tasminvindhye mahācale

tatastābhyāṃ dadau tuṣṭā sā putraṃ vaṃśavardhanam //
nāmnā kṣemajitaṃ khyātaṃ parapakṣakṣayā vaham

tataḥ svaṃ rājyamāsādya bhūyo'pi sa mahīpatiḥ //.
svaputraṃ vardhayāmāsa harṣeṇa mahatānvitaḥ

yadā sa yauvanopetaḥ sañjātaḥ kṣemajitsutaḥ //
taṃ ca rājye niyojyā'tha svasthānaṃ sa punaryayau

hāṭakeśvarajaṃ kṣetraṃ tadetaddvijasattamāḥ //
bhāryayā sahitastyaktvā śeṣamanyaṃ paricchadam

tatra saṃsthāpayāmāsa liṃgaṃ devasya śūlinaḥ //
prāsādaṃ ca manohāri tataścakre samāhitaḥ// २९
raivateśvaramityuktaṃ sarvapātaka nāśanam //
darśanādeva sarveṣāṃ dehināṃ dvijasattamāḥ

yā pūrvaṃ sthāpitā durgā tasminkṣetre mahībhujā //
tasyāḥ kṣemaṃkarī cakre prāsādaṃ śraddha yānvitā

sāpi kṣemaṃkarīnāma tataḥ prabhṛti kīrtyate //
kātyāyanyapi yā proktā mahiṣāsuramardinī

yastāṃ caitrasite pakṣe saṃpa śyedaṣṭamīdine //
tasyābhīṣṭā bhavetsiddhiḥ sarvadaiva dvijottamāḥ

etadvaḥ sarvamākhyātaṃ raivateśvaravarṇanam //
kṣemaṃkaryāḥ prabhāvaṃ ca sarvapātakanāśanam

iti śrīskāṃde mahāpurāṇa ekāśītisāhasryāṃ saṃhitāyā ṣaṣṭhe nāgarakhaṇḍe hāṭakeśvarakṣetramāhātmye kṣemaṃkarīraivateśvarotpattitīrtha māhātmyavarṇananāmāṣṭādaśottaraśatatamo'dhyāyaḥ