Skanda Purana · Chapter 6.112

sūta uvāca // //
tataḥ katipayāhasya gate tasminmahīpatau //
svagṛhaṃ prati duḥkhārte parivārasamanvite

padbhyāmeva samāyātā hyaṣṭaṣaṣṭirdvijottamāḥ //
pariśrāṃtāḥ kṛśāṃgāśca dhūlidhūsaritānanāḥ

yāvatpaśyati dārāḥ svā divyābharaṇa bhūṣitāḥ //
divyavastraiḥ susaṃvītā rājapatnya ivāparāḥ

tataśca vismayāviṣṭāḥ papracchuste kṣudhānvitāḥ //
kimidaṃ kimidaṃ pāpā viruddhaṃ vihitaṃ vapuḥ

kathaṃ prāptāni vastrāṇi bhūṣaṇāni varāṇi ca //
nūnamasmadgaterbhraṃśaḥ khe jāto nā'nyathā bhavet

vikāramenaṃ saṃtyaktvā yuṣmadīyaṃ sugarhitāḥ//
atha tāḥ sarvavṛttāṃtamūcustāpasayoṣitaḥ

yathā rājñī samāyātā damayantī nṛpapriyā//
bhūṣaṇāni ca dattāni tayā caiva yathā dvijāḥ

yathā śāpaśca sañjāto brāhmaṇānāṃ mahātmanām//
atha te munayaḥ kruddhāstacchrutvā garhitaṃ vacaḥ //
rājapratigraho niṃdyastāpasānāṃ viśeṣataḥ

tato bhūpasya rāṣṭrasya nāśārthaṃ jagṛhurjalam//
krodhena mahatāviṣṭā vepamānā nirargalam

anena pāpmanā'smākaṃ kubhūpena praṇāśitā//
khe gatirlobhayitvā tu patnyo'smākamakṛtrimāḥ //
saralāstadgaṇāḥ sarve yenedṛgvyasanaṃ sthitam //

// sūta uvāca // //
evaṃ te munayo yāvacchāpaṃ tasya mahīpateḥ//
prayacchaṃti ca tāstāvadūcurbhāryā ruṣānvitāḥ

na deyo bhūpatestasya śāpo brāhmaṇasattamāḥ //
asmadīyaṃ vacastāvacchrotavyamaviśaṃkitaiḥ ///१२//
vayaṃ sarvā narendrasya bhāryayā samalaṃkṛtāḥ //
suvastrairbhūṣaṇairdivyaiḥ śraddhāpūtena cetasā

vayaṃ daridradoṣeṇa sadā yuṣmadgṛhe sthitāḥ //
karśitā na ca saṃprāptaṃ sukhaṃ martyasamu dbhavam

eteṣāṃ paraloko'tra vidyate ye taporatāḥ //
na ca martyaphalaṃ kiṃcidapi svalpataraṃ bhavet

anyeṣāṃ viṣayasthānāmiha lokaḥ prakīrtitaḥ //
bhogaprasaktacittānāṃ nīcānāṃ sudurātmanām

gṛhasthāśramiṇāṃ caiva svadharmaratacetasām //
iha lokaḥ paraścaiva jāyate nā'tra saṃśayaḥ

tā vayaṃ nātra sandeho gṛhasthāśramamuttamam //
saṃsevya sādhayiṣyāmo lokadvayamanuttamam

tasmādgṛhāṇi ramyāṇi pravadaṃti samāhitāḥ //
bhūpālādbhūmimādāya vṛttiṃ caivābhivāṃchitām

tataścaivātha vīkṣadhvaṃ putrapautrasamudbhavam //
saukhyaṃ cāpi kumārīṇāṃ bāṃdhavānāṃ viśeṣataḥ

na kariṣyatha cedvākyametadasmadudīritam //
sarvāḥ prāṇaparityāgaṃ kariṣyāmo na saṃśayaḥ

yūyaṃ strīvadhapāpena yuktāḥ santastataḥ param /
narakaṃ rauravaṃ durgaṃ gamiṣyatha suniścitam

evaṃ te munayaḥ śrutvā tāsāṃ vākyāni tāni vai //
bhūpṛṣṭhe tatyajustoyaṃ śāpārthaṃ yatkarairdhṛtam

tatastattoyanirdagdhaṃ tadvibhāgaṃ kṣitestadā //
ūṣaratvamanuprāptamadyāpi dvijasattamāḥ

āstāmannādikaṃ tatra yadutpaṃ na prarohati //
na janma cāpnuyādbhūyaḥ pakṣī vā kīṭa eva vā

tṛṇaṃ vātha mṛgastatra kiṃ punarbhaktimānnaraḥ //
yastatra kurute śrāddhaṃ śraddhayā phālgune naraḥ

paurṇamāsyāṃ ravairvāre sa pitṝnuddharennijān //
api svakarmaṇā prāptānnarake dāruṇākṛtau

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye damayantyupākhyāna ūṣarotpattimāhātmyakathanaṃnāma dvādaśottaraśatatamo'dhyāyaḥ