Skanda Purana · Chapter 6.110

// śrīdevyuvāca // //
naiteṣvapi suraśreṣṭha sarveṣu bhuvi mānavāḥ //
api dīrghāyuṣo bhūtvā snātuṃ śaktāḥ kathaṃcana

eteṣāmapi sārāṇi mama tīrthāni kīrtaya //
yeṣu snāto naraḥ samyaksarveṣāṃ labhate phalam

//
// īśvara uvāca // //
eteṣāṃ madhyato devi tīrthāṣṭakamanuttamam //
asti snātairnaraistatra sarveṣāṃ labhyate phalam

naimiṣaṃ caiva kedāraṃ puṣkaraṃ kṛmijāṃgalam //
vārāṇasī kurukṣetraṃ prabhāsaṃ hāṭakeśvaram

aṣṭāsveteṣu yaḥ snātaḥ samyakchraddhāsamanvitaḥ //
sa snātaḥ sarvatīrtheṣu satyametanmayoditam

// śrīdevyuvāca // //
kalikāle mahādeva bhaviṣyati kathaṃcana //
snānaṃ tasmānmama brūhi yatsāraṃ tīrthameva hi

aṣṭānāmapi caiteṣāṃ devadeva trilocana //
yadyahaṃ vallabhā bhaktā tathā cittānuvartinī

// īśvara uvāca // //
aṣṭānāmapi deveśi kṣetrāṇāmasti cottamam //
eteṣāmapi tatkṣetraṃ hāṭakeśvarasaṃjñitam

yatra sarvāṇi kṣetrāṇi saṃsthitāni mamājñayā //
tathānyāni ca tīrthāni kalikāle'pi saṃsthite

tasmātsarvaprayatnena tatkṣetraṃ sevyameva hi //
mānuṣairmokṣamicchadbhiḥ satyametanma yoditam

// sūta uvāca // //
etadvaḥ sarvamākhyātamaṣṭaṣaṣṭisamudbhavam //
samuccayaṃ dvijaśreṣṭhā nāmadevasamanvitam

yathā devena cākhyātaṃ pārvatyā guhyamuttamam //
prasannena mayā kṛtsnaṃ yuṣmākaṃ samudāhṛtam ///२//
yaścaitatpaṭhate bhaktyā hyaṣṭaṣaṣṭisamudbhavam //
snānajaṃ labhate puṇyaṃ śṛṇvānaḥ śraddhayānvitaḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmya 'ṣṭaṣaṣṭitīrthamāhātmyavarṇanaṃnāma daśottaraśatatamo'dhyāyaḥ