Skanda Purana · Chapter 6.109

// īśvara uvāca // //
etatte sarvamākhyātaṃ yatpṛṣṭo'smi varānane //
sarveṣāmeva tīrthānāṃ sāraṃ tīrthasamuccayam

eteṣvahaṃ varārohe sarveṣveva vyavasthitaḥ //
nāmnā cānyeṣu tīrtheṣu tridaśānāṃ hitārthataḥ

yo māmeteṣu tīrtheṣu snātvā paśyati mānavaḥ //
kīrtayetkīrtanānnāmnā sa nūnaṃ mokṣamāpnuyāt

// śrīdevyuvāca // //
yeṣu tīrtheṣu yannāma kīrtanīyaṃ tava prabho //
tatkārtsyena mama brūhi yaccahaṃ tava vallabhā

// īśvara uvāca // //
vārāṇasyāṃ mahādevaṃ prayāge ca maheśvaram //
naimiṣe devadevaṃ ca gayāyāṃ prapitāmaham

kurukṣetre viduḥ sthāṇuṃ prabhāse śaśiśekharam //
puṣkare tu hyajāgandhiṃ viśvaṃ viśveśvare tathā

aṭṭahāse mahānādaṃ mahendre ca mahāvratam ( १०) //
ujjayinyāṃ mahākālaṃ marukoṭe mahotkaṭam

śaṃkukarṇe mahātejaṃ gokarṇe ca mahābalam //
rudrakoṭyāṃ mahāyogaṃ mahāliṃgaṃ sthaleśvare

harṣite ca tathā harṣaṃ vṛṣabhaṃ vṛṣabhadhvaje //
kedāre caiva īśānaṃ śarvaṃ madhyamakeśvare ( २० )/ṃ/९ //
suparṇākṣaṃ sahasrākṣe susūkṣmaṃ kārtikeśvare //
bhavaṃ vastrāpathe devi hyugraṃ kanakhale tathā

bhadrakarṇe śivaṃ caiva daṇḍake daṇḍinaṃ tathā //
ūrdhvaretaṃ tridaṇḍāyāṃ caṇḍīśaṃ kṛmijāṃgale

kṛttivāsaṃ tathaikāmre chāgaleye kapardinam ०३०) //
kāliñjare nīlakaṇṭhaṃ śrīkaṇṭhaṃ maṇḍaleśvare

vijayaṃ caiva kāśmīre jayantaṃ marukeśvare //
hariścandre haraṃ caiva puraścandre ca śaṃkaram

jaṭiṃ vāmeśvare vindyātsaumyaṃ vai kukkuṭeśvare //
bhūteśvaraṃ bhasmagātre oṃkāre'marakaṇṭakam ( ४०)

tryaṃbakaṃ ca trisaṃdhyāyāṃ virajāyāṃ trilocanam //
dīptamarkeśvare jñeyaṃ nepāle paśupālakam

yamaliṃgaṃ ca duṣkarṇe kapālī karavīrake //
jāgeśvare triśūlī ca śrīśaile tripurāṃtakam

rohaṇaṃ tu ayodhyāyāṃ pātāle hāṭakeśvaram ( ५०) //
kārohaṇe nakulīśaṃ devikāyāmumāpatim

bhairave bhairavākāramamaraṃ pūrvasāgare //
saptagodāvare bhīmaṃ svayaṃbhūrnirmaleśvare

karṇikāre gaṇādhyakṣaṃ kailāse tu gaṇādhipam //
gaṃgādvāre himasthānaṃ jala liṃge jalapriyam( ६०)

analaṃ vāḍave'gnau ca bhīmaṃ badarikāśrame //
śreṣṭhe koṭīśvaraṃ caiva vārāhaṃ vindhyaparvate

hemakūṭe virūpākṣaṃ bhūrbhuvaṃ gandhamādane //
liṃgeśvare ca varadaṃ laṃkāyāṃ ca narāṃtakam (६८)

aṣṭaṣaṣṭiriyaṃ devi tavākhyātā viśeṣataḥ //
paṭhatāṃ śṛṇvatāṃ vāpi sarvapātakanāśinī

tasmātsarvaprayatnena kīrtanīyā vicakṣaṇaiḥ //
kālatraye'pi śucibhirviśeṣācchivadīkṣitaiḥ

likhitāpi varārohe yasyaiṣā tiṣṭhate gṛhe //
na tatra jāyate doṣo bhūtapretasamudbhavaḥ

na vyādherna ca sarpāṇāṃ na caurāṇāṃ varānane //
nānyeṣāṃ bhūbhujādīnāṃ kadācidapi kutracit

iti śrīskāde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye'ṣṭaṣaṣṭitīrthamāhātmya kathanaṃnāma navottaraśatatamodhyāyaḥ