સ્કંદ પુરાણ · અધ્યાય 6.110

॥ શ્રીદેવ્યુવાચ ॥ ॥
નૈતેષ્વપિ સુરશ્રેષ્ઠ સર્વેષુ ભુવિ માનવાઃ ॥
અપિ દીર્ઘાયુષો ભૂત્વા સ્નાતું શક્તાઃ કથંચન

એતેષામપિ સારાણિ મમ તીર્થાનિ કીર્તય ॥
યેષુ સ્નાતો નરઃ સમ્યક્સર્વેષાં લભતે ફલમ્

॥
॥ ઈશ્વર ઉવાચ ॥ ॥
એતેષાં મધ્યતો દેવિ તીર્થાષ્ટકમનુત્તમમ્ ॥
અસ્તિ સ્નાતૈર્નરૈસ્તત્ર સર્વેષાં લભ્યતે ફલમ્

નૈમિષં ચૈવ કેદારં પુષ્કરં કૃમિજાંગલમ્ ॥
વારાણસી કુરુક્ષેત્રં પ્રભાસં હાટકેશ્વરમ્

અષ્ટાસ્વેતેષુ યઃ સ્નાતઃ સમ્યક્છ્રદ્ધાસમન્વિતઃ ॥
સ સ્નાતઃ સર્વતીર્થેષુ સત્યમેતન્મયોદિતમ્

॥ શ્રીદેવ્યુવાચ ॥ ॥
કલિકાલે મહાદેવ ભવિષ્યતિ કથંચન ॥
સ્નાનં તસ્માન્મમ બ્રૂહિ યત્સારં તીર્થમેવ હિ

અષ્ટાનામપિ ચૈતેષાં દેવદેવ ત્રિલોચન ॥
યદ્યહં વલ્લભા ભક્તા તથા ચિત્તાનુવર્તિની

॥ ઈશ્વર ઉવાચ ॥ ॥
અષ્ટાનામપિ દેવેશિ ક્ષેત્રાણામસ્તિ ચોત્તમમ્ ॥
એતેષામપિ તત્ક્ષેત્રં હાટકેશ્વરસંજ્ઞિતમ્

યત્ર સર્વાણિ ક્ષેત્રાણિ સંસ્થિતાનિ મમાજ્ઞયા ॥
તથાન્યાનિ ચ તીર્થાનિ કલિકાલેઽપિ સંસ્થિતે

તસ્માત્સર્વપ્રયત્નેન તત્ક્ષેત્રં સેવ્યમેવ હિ ॥
માનુષૈર્મોક્ષમિચ્છદ્ભિઃ સત્યમેતન્મ યોદિતમ્

॥ સૂત ઉવાચ ॥ ॥
એતદ્વઃ સર્વમાખ્યાતમષ્ટષષ્ટિસમુદ્ભવમ્ ॥
સમુચ્ચયં દ્વિજશ્રેષ્ઠા નામદેવસમન્વિતમ્

યથા દેવેન ચાખ્યાતં પાર્વત્યા ગુહ્યમુત્તમમ્ ॥
પ્રસન્નેન મયા કૃત્સ્નં યુષ્માકં સમુદાહૃતમ્ ॥।૨॥
યશ્ચૈતત્પઠતે ભક્ત્યા હ્યષ્ટષષ્ટિસમુદ્ભવમ્ ॥
સ્નાનજં લભતે પુણ્યં શૃણ્વાનઃ શ્રદ્ધયાન્વિતઃ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે શ્રીહાટકેશ્વરક્ષેત્રમાહાત્મ્ય ઽષ્ટષષ્ટિતીર્થમાહાત્મ્યવર્ણનંનામ દશોત્તરશતતમોઽધ્યાયઃ