સ્કંદ પુરાણ · અધ્યાય 6.109

॥ ઈશ્વર ઉવાચ ॥ ॥
એતત્તે સર્વમાખ્યાતં યત્પૃષ્ટોઽસ્મિ વરાનને ॥
સર્વેષામેવ તીર્થાનાં સારં તીર્થસમુચ્ચયમ્

એતેષ્વહં વરારોહે સર્વેષ્વેવ વ્યવસ્થિતઃ ॥
નામ્ના ચાન્યેષુ તીર્થેષુ ત્રિદશાનાં હિતાર્થતઃ

યો મામેતેષુ તીર્થેષુ સ્નાત્વા પશ્યતિ માનવઃ ॥
કીર્તયેત્કીર્તનાન્નામ્ના સ નૂનં મોક્ષમાપ્નુયાત્

॥ શ્રીદેવ્યુવાચ ॥ ॥
યેષુ તીર્થેષુ યન્નામ કીર્તનીયં તવ પ્રભો ॥
તત્કાર્ત્સ્યેન મમ બ્રૂહિ યચ્ચહં તવ વલ્લભા

॥ ઈશ્વર ઉવાચ ॥ ॥
વારાણસ્યાં મહાદેવં પ્રયાગે ચ મહેશ્વરમ્ ॥
નૈમિષે દેવદેવં ચ ગયાયાં પ્રપિતામહમ્

કુરુક્ષેત્રે વિદુઃ સ્થાણું પ્રભાસે શશિશેખરમ્ ॥
પુષ્કરે તુ હ્યજાગન્ધિં વિશ્વં વિશ્વેશ્વરે તથા

અટ્ટહાસે મહાનાદં મહેન્દ્રે ચ મહાવ્રતમ્ ( ૧૦) ॥
ઉજ્જયિન્યાં મહાકાલં મરુકોટે મહોત્કટમ્

શંકુકર્ણે મહાતેજં ગોકર્ણે ચ મહાબલમ્ ॥
રુદ્રકોટ્યાં મહાયોગં મહાલિંગં સ્થલેશ્વરે

હર્ષિતે ચ તથા હર્ષં વૃષભં વૃષભધ્વજે ॥
કેદારે ચૈવ ઈશાનં શર્વં મધ્યમકેશ્વરે ( ૨૦ )।ં।૯ ॥
સુપર્ણાક્ષં સહસ્રાક્ષે સુસૂક્ષ્મં કાર્તિકેશ્વરે ॥
ભવં વસ્ત્રાપથે દેવિ હ્યુગ્રં કનખલે તથા

ભદ્રકર્ણે શિવં ચૈવ દણ્ડકે દણ્ડિનં તથા ॥
ઊર્ધ્વરેતં ત્રિદણ્ડાયાં ચણ્ડીશં કૃમિજાંગલે

કૃત્તિવાસં તથૈકામ્રે છાગલેયે કપર્દિનમ્ ૦૩૦) ॥
કાલિઞ્જરે નીલકણ્ઠં શ્રીકણ્ઠં મણ્ડલેશ્વરે

વિજયં ચૈવ કાશ્મીરે જયન્તં મરુકેશ્વરે ॥
હરિશ્ચન્દ્રે હરં ચૈવ પુરશ્ચન્દ્રે ચ શંકરમ્

જટિં વામેશ્વરે વિન્દ્યાત્સૌમ્યં વૈ કુક્કુટેશ્વરે ॥
ભૂતેશ્વરં ભસ્મગાત્રે ઓંકારેઽમરકણ્ટકમ્ ( ૪૦)

ત્ર્યંબકં ચ ત્રિસંધ્યાયાં વિરજાયાં ત્રિલોચનમ્ ॥
દીપ્તમર્કેશ્વરે જ્ઞેયં નેપાલે પશુપાલકમ્

યમલિંગં ચ દુષ્કર્ણે કપાલી કરવીરકે ॥
જાગેશ્વરે ત્રિશૂલી ચ શ્રીશૈલે ત્રિપુરાંતકમ્

રોહણં તુ અયોધ્યાયાં પાતાલે હાટકેશ્વરમ્ ( ૫૦) ॥
કારોહણે નકુલીશં દેવિકાયામુમાપતિમ્

ભૈરવે ભૈરવાકારમમરં પૂર્વસાગરે ॥
સપ્તગોદાવરે ભીમં સ્વયંભૂર્નિર્મલેશ્વરે

કર્ણિકારે ગણાધ્યક્ષં કૈલાસે તુ ગણાધિપમ્ ॥
ગંગાદ્વારે હિમસ્થાનં જલ લિંગે જલપ્રિયમ્( ૬૦)

અનલં વાડવેઽગ્નૌ ચ ભીમં બદરિકાશ્રમે ॥
શ્રેષ્ઠે કોટીશ્વરં ચૈવ વારાહં વિન્ધ્યપર્વતે

હેમકૂટે વિરૂપાક્ષં ભૂર્ભુવં ગન્ધમાદને ॥
લિંગેશ્વરે ચ વરદં લંકાયાં ચ નરાંતકમ્ (૬૮)

અષ્ટષષ્ટિરિયં દેવિ તવાખ્યાતા વિશેષતઃ ॥
પઠતાં શૃણ્વતાં વાપિ સર્વપાતકનાશિની

તસ્માત્સર્વપ્રયત્નેન કીર્તનીયા વિચક્ષણૈઃ ॥
કાલત્રયેઽપિ શુચિભિર્વિશેષાચ્છિવદીક્ષિતૈઃ

લિખિતાપિ વરારોહે યસ્યૈષા તિષ્ઠતે ગૃહે ॥
ન તત્ર જાયતે દોષો ભૂતપ્રેતસમુદ્ભવઃ

ન વ્યાધેર્ન ચ સર્પાણાં ન ચૌરાણાં વરાનને ॥
નાન્યેષાં ભૂભુજાદીનાં કદાચિદપિ કુત્રચિત્

ઇતિ શ્રીસ્કાદે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે શ્રીહાટકેશ્વરક્ષેત્રમાહાત્મ્યેઽષ્ટષષ્ટિતીર્થમાહાત્મ્ય કથનંનામ નવોત્તરશતતમોધ્યાયઃ