Skanda Purana · Chapter 6.106

// ṛṣaya ūcuḥ // //
bhūpṛṣṭhe pāṃsubhistasminpretaistaiḥ paripūrite //
yāni tīrthāni luptāni liṅgāni ca vadasva naḥ

// sūta uvāca // //
asaṃkhyātāni tīrthāni tathā liṃgāni ca dvijāḥ //
lopaṃ gatāni vakṣyāmi prādhānyena prabodhata

tatra lopaṃ gataṃ tīrthaṃ cakratīrthamiti smṛtam //
yatra cakraṃ purā nyastaṃ viṣṇunā prabhaviṣṇunā //

mātṛtīrthaṃ tathaivānyatsarvakāmapradaṃ nṛṇām //
yatra tā mātaro divyāḥ kārtikeyapratiṣṭhitāḥ

mucukundasya rājarṣestathānyalliṃga muttamam //
tatra lopaṃ gataṃ viprāḥ sagarasya tu bhūpateḥ

ikṣvākorvasuṣeṇasya kakutsthasya mahātmanaḥ //
ailasya candradevasya kāśirājasya sanmateḥ

agniveśasya raibhyasya cyavanasya bhṛgostathā //
āśramo yājñavalkyasya tatra lopaṃ samāyayau

hārītasya maharṣeśca haryaśvasya mahātmanaḥ //
kutsasya ca vasiṣṭhasya nāradasya tritasya ca

tathaiva ṛṣipatnīnāṃ tatra liṃgāni bhūriśaḥ//
kātyāyanyāśca śāṃḍilyā maitreyyāśca tathā purā

anyāsāṃ munipatnīnāṃ yāsāṃ saṃkhyā na vidyate //
tatrāścaryamabhūdanyatpūryamāṇe mahītale

pāṃsubhī rākṣasairyaistaiḥ pretairbrāhmaṇasattamāḥ //
tadvo'haṃ saṃpravakṣyāmi śrotavyaṃ susamāhitaiḥ

dṛṣṭvā pāṃsumayīṃ vṛṣṭiṃ muktāṃ pretaiḥ samaṃtataḥ //
mātṛvargeṇa tenātha pramuktaḥ pracuro'nilaḥ

tena pāṃsukṛtā vṛṣṭiḥ samaṃtānmathitā bahiḥ /
tasyā bhūmeḥ patatyeva na kiṃcittatra pūryate

tataste vyaṃtarāḥ khinnā nirāśāstasya pūraṇe //
bhūtāstasya puro gatvā cukruśuḥ kuśabhūpateḥ

asmābhirvihitā tatra pāṃsuvṛṣṭirmahīpate //
nīyate śatadhā'nyatra mātṛmuktena vāyunā

sa tvaṃ tāsāṃ vighātārthamupāyaṃ bhūpa ciṃtaya //
yena tāṃ pāṃsubhirbhūmiṃ pūrayāmaḥ samaṃtataḥ

teṣāṃ tadvacanaṃ śrutvā tataḥ kuśamahīpatiḥ //
rudramārādhayāmāsa tatkṣetraṃ prāpya saddvijāḥ

tatastasya gatastuṣṭiṃ varṣāṃte bhagavānharaḥ //
provāca prārthayābhīṣṭaṃ yatte manasi vāṃchitam

// kuśa uvāca // //
yathā saṃpūryate cāśu pāṃsubhirbhūmimaṃḍalam//
etatpretapramuktaiśca prasādātte tathā kuru

mayā pretagaṇādeva nirdiṣṭāstasya pūraṇe //
mātṛsaṃrakṣyamāṇaṃ tacchakyaṃ caitanna pūritum

tatra rākṣasajairmaṃtraiḥ saṃti liṃgāni ca prabho //
pratiṣṭhitāni tatsparśāddarśanātsyājjanakṣayaḥ

acalatvāttathā deva liṃgānāṃ śāstrasadbhayāt //
anyadutpāṭanādyaṃ ca naiva kurmaḥ kathaṃcana

tasmālliṃgakṛto nāśo brāhmaṇānāṃ tapasvinām //
yathā na syātsuraśreṣṭha tathā nītirvidhīyatām

tataśca bhagavānrudrastāḥ samāhūya mātaraḥ //
provāca tyajyatāṃ sthānaṃ bhavatyo yatra saṃsthitāḥ

tatra pāṃsubhiravyagrāḥ kariṣyaṃti divāniśam //
pretāḥ kuśasamādeśādvṛṣṭiṃ lokahitāya ca

// mātara ūcuḥ // //
tyakṣyāmaśca tavādeśāttatsthānaṃ vṛṣabhadhvaja //
paraṃ darśaya cāsmākaṃ kiṃcidanyattathāvidham

kṣetre'traiva nivatsyāmo yena skandakṛte vayam //
tena saṃsthāpitāścātra proktāḥ stheyaṃ sadā tataḥ

tataḥ provāca bhagavāṃstasmātsthānānmahattaram //
sthānaṃ dāsyāmi sarvāsāṃ pṛthaktvena śubhāvaham

aṣṭaṣaṣṭistu kṣetrāṇāṃ madīyānāṃ samaṃtataḥ //
saṃsthitāsti mahābhāgā yeṣu matsaṃsthitiḥ sadā

aṣṭaṣaṣṭivibhāgena bhūtvā sarvāḥ pṛthakpṛthak //
teṣu tiṣṭhatha madvākyātpūjāmagryāmavāpsyatha

tasya devasya tacchrutvā vākyaṃ tā mātarastadā //
prahṛṣṭāstatparityajya sthānaṃ skandavinirmitam

aṣṭaṣaṣṭivibhāgena bhūtvā rūpaiḥ pṛthagvidhaiḥ //
aṣṭaṣaṣṭiṣu kṣetreṣu tasya tāḥ saṃsthitāḥ sadā

tatastābhirvinirmuktaṃ tatsarvaṃ bhūmimaṇḍalam //
pāṃsubhiḥ pūritaṃ pretairdivārātramataṃdritaiḥ

evaṃ tasya varaṃ dattvā bhagavānvṛṣavāhanaḥ //
jagāmādarśanaṃ paścātsārdhaṃ savargaiṇairdvijāḥ

kuto'pi brāhmaṇaiḥ sarvestāpasaiśca praśaṃsitaḥ //
labdhāśī prayayau tasmādayodhyānagarīṃ prati

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye luptatīrthamāhātmyakathanaṃnāma ṣaḍuttaraśatatamo'dhyāyaḥ