Skanda Purana · Chapter 6.105

// sūta uvāca // //
atha prāpte dinādhīśe tulāyāṃ dvijasattamāḥ //
pretā liṃgodbhavāṃ bhūmiṃ pūrayāmāsureva hi

yatkiṃcittatra saṃsthaṃ tu ādyatīrthaṃ surālayam //
tatsarvaṃ vyantaraistaiśca pāṃsubhiḥ paripūritam

tataḥ kṣemaṃ samutpannaṃ kṣetre tatra dvijottamāḥ //
anyeṣāmapi lokānāṃ liṃgaistairluptimāgataiḥ

kasyacittvatha kālasya bṛhadaśvo mahīpatiḥ //
śālvadeśātsamāyātaḥ kasmiścidyugaparyaye

sa dṛṣṭvā vipulāṃ bhūmiṃ prāsādaiḥ parivarjitām //
prāsādārthaṃ matiṃ cakre tatra kṣetre dvijottamāḥ

śilpinaśca samāhūyānekāṃstatra sahasraśaḥ //
śodhayāmāsa tāṃ bhūmimadhastādbahuvistṛtām

bhūmau nikhanyamānāyāṃ tato liṃgāni bhūriśaḥ //
caturvaktrāṇi tānyeva yāṃti dṛṣṭeśca gocaram

tataḥ sa pārthivastaiśca liṃgairdṛṣṭvā vṛtāṃ bhuvam //
tatkṣaṇānmṛtyumāpannaḥ śilpibhiśca samanvitaḥ

tataḥprabhṛti no tatra kaścinmartyo mahītale //
prāsādaṃ kurute bhītyā taḍāgaṃ kūpameva ca

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetra māhātmye rākṣasaliṃgacchedanaṃnāma pañcottaraśatatamo'dhyāyaḥ