સ્કંદ પુરાણ · અધ્યાય 6.105

॥ સૂત ઉવાચ ॥ ॥
અથ પ્રાપ્તે દિનાધીશે તુલાયાં દ્વિજસત્તમાઃ ॥
પ્રેતા લિંગોદ્ભવાં ભૂમિં પૂરયામાસુરેવ હિ

યત્કિંચિત્તત્ર સંસ્થં તુ આદ્યતીર્થં સુરાલયમ્ ॥
તત્સર્વં વ્યન્તરૈસ્તૈશ્ચ પાંસુભિઃ પરિપૂરિતમ્

તતઃ ક્ષેમં સમુત્પન્નં ક્ષેત્રે તત્ર દ્વિજોત્તમાઃ ॥
અન્યેષામપિ લોકાનાં લિંગૈસ્તૈર્લુપ્તિમાગતૈઃ

કસ્યચિત્ત્વથ કાલસ્ય બૃહદશ્વો મહીપતિઃ ॥
શાલ્વદેશાત્સમાયાતઃ કસ્મિશ્ચિદ્યુગપર્યયે

સ દૃષ્ટ્વા વિપુલાં ભૂમિં પ્રાસાદૈઃ પરિવર્જિતામ્ ॥
પ્રાસાદાર્થં મતિં ચક્રે તત્ર ક્ષેત્રે દ્વિજોત્તમાઃ

શિલ્પિનશ્ચ સમાહૂયાનેકાંસ્તત્ર સહસ્રશઃ ॥
શોધયામાસ તાં ભૂમિમધસ્તાદ્બહુવિસ્તૃતામ્

ભૂમૌ નિખન્યમાનાયાં તતો લિંગાનિ ભૂરિશઃ ॥
ચતુર્વક્ત્રાણિ તાન્યેવ યાંતિ દૃષ્ટેશ્ચ ગોચરમ્

તતઃ સ પાર્થિવસ્તૈશ્ચ લિંગૈર્દૃષ્ટ્વા વૃતાં ભુવમ્ ॥
તત્ક્ષણાન્મૃત્યુમાપન્નઃ શિલ્પિભિશ્ચ સમન્વિતઃ

તતઃપ્રભૃતિ નો તત્ર કશ્ચિન્મર્ત્યો મહીતલે ॥
પ્રાસાદં કુરુતે ભીત્યા તડાગં કૂપમેવ ચ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં ષષ્ઠે નાગરખણ્ડે હાટકેશ્વરક્ષેત્ર માહાત્મ્યે રાક્ષસલિંગચ્છેદનંનામ પઞ્ચોત્તરશતતમોઽધ્યાયઃ