Skanda Purana · Chapter 6.10

// sūta uvāca //
ānarttādhipatirbhūpaścamatkāra iti smṛtaḥ //
etasminnaṃtare prāptastatra haṃtuṃ vane mṛgān /////
sa dadarśa mṛgīṃ dūrānniścalāṃgīṃ taroradhaḥ //
stanaṃ sutāya yacchaṃtīṃ viśvastāmakutobhayām

atha tāṃ pārthivastūrṇaṃ śareṇānataparvaṇā //
jaghānākarṇakṛṣṭena marmasthāne praharṣitaḥ

sahasā sā hatā tena gārddhrapatreṇa patriṇā //
diśo vilokayāmāsa samaṃtādvyathayārditā

atha dṛṣṭvā mahīpālaṃ nātidūre dhanurdharam //
provācāśrupariklinnavadanā sutavatsalā

// mṛgyuvāca // //
ayuktaṃ pṛthivīpāla yattvayaitadanuṣṭhitam //
hatā'haṃ bālavatsā'dya śareṇānataparvaṇā

nā'haṃ śocāmi bhūpāla maraṇaṃ svaśarīragam //
yathemaṃ vālakaṃ dīnaṃ kṣīrāsvādanalaṃpaṭam

yasmāttvayedṛśaṃ karma nirdayaṃ samanuṣṭhitam //
kuṣṭhavyādhisamāyuktastasmātsadyo bhaviṣyasi

// rājovāca // //
svadharma eṣa bhūpānāṃ kurvaṃti mṛgasaṃkṣayam //
tasmātsvadharmasaṃyuktaṃ na māṃ tvaṃ śaptumarhasi

// mṛgyuvāca // //
satyametanmahīpāla yattvayā parikīrtitam //
kṣattriyāṇāṃ vadhārthāya mṛgāḥ sṛṣṭāḥ svayaṃbhuvā

paraṃ tena vidhisteṣāṃkṛto yastaṃ mahīpate //
śṛṇuṣvā'vahito bhūtvā vadaṃtyā mama sāṃpratam

suptaṃ maithunasaṃyuktaṃ stanapānakriyodyatam //
hatvā mṛgaṃ jalāsaktaṃ naraḥ pāpena lipyate

etasmātkāraṇācchāpastava datto mayā nṛpa //
na kāmato na mṛtyorvā satyenātmānamālabhe

evamuktvā mṛgī prāṇānsā mumoca vyathānvitā //
kuṣṭhavyādhisamāyuktaḥ so'pi rājā babhūva ha

sa dṛṣṭvā kuṣṭhasaṃyuktaṃ pārthivaḥ svaṃ kalevaram//
tataḥ svānsevakānāha samāhūya suduḥkhitaḥ

ahaṃ tapaścariṣyāmi pūjayiṣyāmi śaṃkaram //
tāvadyāvatpraṇāśo me kuṣṭhavyādherbhaviṣyati

yatkiṃcittriṣu lokeṣu prārthayaṃti narāḥ sukham //
tatsarvaṃ tapasā sādhyaṃ tasmātkāryaṃ mayā tapaḥ

adhunaiko'hamaikāhamekaikasminvanaspatau //
caranbhaikṣaṃ tu niyamaiścariṣyāmi dharātale///८//
pāṃsunā samavacchanne śūnyāgāre pratiśrayaḥ //
vṛkṣamūlanikete vā muktasarvapriyāpriyaḥ ///९//
samaḥ śatruṣu mitreṣu samaloṣṭāśmakāṃcanaḥ //
bhūtvā kālaṃ nayiṣyāmi yāvatkālasya saṃsthitiḥ

/
evaṃ tānsevakānbhūpaḥ so'bhidhāya visṛjya ca //
tīrthayātrā paro bhūtvā babhrāma vasudhātale

/
tataḥ kālena mahatā prāpya viprasamudbhavam //
upadeśaṃ nṛpaḥ prāptaḥ śaṃkhatīrthaṃ mahodayam

hāṭakeśvaraje kṣetre sarvavyādhivināśakam //
vikhyātaṃ triṣu lokeṣu pūritaṃ svacchavāriṇā

tatrā'sau snānamātreṇa tatkṣaṇātpārthivotamaḥ //
kuṣṭhavyādhivi nirmuktaḥ saṃjātaḥ sumahādyutiḥ

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śaṃkhatīrthamāhātmye camatkāranṛpatikuṣṭhanivṛttivṛttāntavarṇanaṃnāma daśamo'dhyāyaḥ