Skanda Purana · Verses 5.9-2

// śrīrudra uvāca // //
svargadvāreśvaraṃ liṃgaṃ navamaṃ viddhi pārvati //
sarvapāpaharaṃ devi svargamokṣaphalapradam

yadā devi samāyātāḥ kailāse parvatottame //
aśvinyādyā bhaginyastāstvāṃ dṛṣṭvā vismayānvitāḥ

nimaṃtritā vayaṃ yajñe sakāṃtāḥ saparigrahāḥ //
snehena devi tātena bahumānapuraḥ saram

kaccitsmṛtā viśālākṣi kiṃ vā tātasya vismṛtiḥ //
kāraṇaṃ kiṃ samuddiśya tātena na nimaṃtritā

tāsāṃ tadvacanaṃ śrutvā avamā nāttadā tvayā //
prāṇā muktāstu yogena puratastāsu pārvati

atha tāḥ śokasaṃtaptā gatā yatra prajāpatiḥ//
ācakhyuḥ sakalaṃ vṛttaṃ dakṣasyāgre yathā tatham

tacchutvā dāruṇaṃ vākyaṃ dakṣo novāca kiṃcana

mayā dṛṣṭā yadā devi bhūmau paṃcatvamāgatā //
yajñapradhvaṃsanārthāya tadā vai preritā gaṇāḥ//

te gatvātha gaṇā raudrāḥ śataśo'tha sahasraśaḥ //
virūpā bhīṣaṇā raudrā nānāśastrā mahābalāḥ //
mumucuḥ śaravarṣāṇi kurvaṃto bhairavānravān

tato devagaṇāḥ sarve vasavaḥ saha bhāskaraiḥ //
viśvedevāśca sādhyāśca dhanurhastā mahābalāḥ //5.2.9.१ ०//
yuddhāya ca viniṣkrāṃtā mumucuḥ sāyakānsitān //
te sametyātha yuyudhuḥ pramathā vibudhaiḥ saha //
mumucuḥ śaravarṣāṇi vāridhārā yathā ghanāḥ

teṣāṃ madhye gaṇo nāma vīrabhadro mahābalaḥ //
sa śakraṃ tāḍayāmāsa śūlena hṛdaye tathā

sa tu tena prahāreṇa visaṃjño niṣasāda ha //
atha muṣṭyā hataḥ kumbhe nāga airāvatastathā

sa hataḥ sahasā tena gajeṃdro bheravānravān //
vinadanbhayamāsthāya yajñavāṭamupādravat

etasminnaṃtare devā kṛtāstena parāṅmukhāḥ //
tataste śaraṇaṃ jagmurviṣṇuṃ viśvaikanāyakam

tataḥ kopasamāviṣṭo viṣṇurdṛṣṭvā divālayān //
gaṇairvidrāvitānsarvānmumocāśu sudarśanam

tadāpatattu vegena cakraṃ viṣṇoḥ sudarśanam //
prasārya vaktraṃ sahasā hyudarasthaṃ cakāra ha

tasmiṃścakre tadā graste hyamoghe daityasūdane //
kruddho nārāyaṇo devi vīrabhadramupādravat

gṛhītvā pādayorbhūmau nijaghānātidūrataḥ //
hanyamānasyātha bhūmau gadayā ca sudarśanam

rudhirodgārasaṃyuktaṃ vaktrāttacca vinirgatam //
matto labdhavaro devi vīrabhadro gaṇottamaḥ //
na tu paṃcatvamāpanno gadayā tāḍito'pi saḥ

tatastu pramathāḥ sarve viṣṇuvīryabalārdditāḥ //
kṛcchreṇa sahasā prāptā yatrāhaṃ devi saṃsthitaḥ

māṃ dṛṣṭvā śūlahastaṃ tu viṣṇuścāṃtaradhīyata //
iṃdro'pi tridaśaiḥ sārddhaṃ pitṛbhirbrāhmaṇaiḥ saha

mattastrāsaparītātmā tataścādarśanaṃ gataḥ //
evaṃ vidhvaṃsite yajñe naṣṭo devagaṇo yadā

mayā nirūpito devi svargadvāre gaṇastadā //
praveśo naiva dātavyastridaśānāṃ gaṇeśvara

dvārāvarodhaḥ karttavyo yatnataḥ śāsanānmama //
yaḥ kopi dṛśyate devaḥ sa haṃtavyo na saṃśayaḥ

udvasaśca tato jātaḥ svargo devā vinirjitāḥ

svargadvāre niruddhe tu śakrādyā bhayavihvalāḥ//
brahmalokaṃ gatā devā maṃtrayitvā punaḥpunaḥ

tasyāgre kathitaṃ sarvaṃ svargadvārāvarodhanam //
maheśvaragaṇairvyāptaṃ svargadvāraṃ pitāmaha

praveśo durlabho jātaḥ kṛte dvārāvarodhane //
kenopāyena yāsyāmaḥ svargalokaṃ tathāvidham २९ //
nāsmākaṃ jāyate prītirvinā svargaṃ pitāmaha //

iti teṣāṃ vacaḥ śrutvā proktaṃ tu brahmaṇā tadā //
ārādhyaḥ śaṃkaro devo mahādevo jagatpatiḥ

stutyo vaṃdyo namaskāryaḥ sṛṣṭi saṃhārakārakaḥ //
durlabhastu surāḥ svargo vinā tasya prasādataḥ // ३२
goptā sraṣṭā samarthaśca sa cāsmākaṃ parā gatiḥ //
sa evārādhanīyastu sa ca pūjyatamo mataḥ

tasmātsarvaprayatnena gamyatāṃ śaraṇaṃ śivaḥ //
upāyaṃ kathayiṣyāmi śrūyatāṃ sāvadhānataḥ

tridaśaiḥ sahitaḥ śakra tūrṇaṃ gaccha mamājñayā //
mahākālavane ramye kapāleśvarapūrvataḥ

svargadvāra paraṃ liṃgaṃ vidyate tattu vāsava //
lokānāmanukaṃpārthaṃ mahādevena nirmitam //
tamārādhayata kṣipraṃ sa vaḥ kāmaṃ pradāsyati

brahmaṇo vacanaṃ śrutvā tridaśā muditā bhṛśam //
samāyātā mahādevi mahākālavanaṃ tadā

svargadvārapradaṃ puṇyaṃ dadṛśurliṃgamuttamam //
tasya darśanamātreṇa svargadvāramapāvṛtam

svargalokaṃ gatāḥ sarve yathāpūrvaṃ yaśasvini //
niḥśaṃkāṃstridaśāndṛṣṭvā vijñaptohaṃ gaṇaistadā

mayājñaptāśca te sarve nivarttadhvaṃ gaṇottamāḥ //
svayameva pratijñātaṃ kathaṃ mithyā bhaviṣyati //

svargadvāraprado devo dṛṣṭo devairna saṃśayaḥ //
mahākālavane ramye kathito hi viraṃcinā

svargadvāraṃ gatāḥ sadyaḥ śakrādyāstridaśā gaṇāḥ //
ataḥ prabhṛti vikhyātaḥ svargadvāreśvaraḥ śivaḥ

khyātiṃ yāsyati bhūloke svargalokapradāyakaḥ

ye paśyaṃti narā loke svargadvāreśvaraṃ śivam //
te yāṃti svargalokaṃ hi svargadvāreśvarārcanāt

svargadvāreśvaraṃ devaṃ ye paśyaṃti prasaṃgataḥ //
na teṣāṃ bhayamastīti kalpa koṭiśatairapi

aśvamedhasahasreṇa yatpuṇyaṃ samudāhṛtam //
tatpuṇyamadhikaṃ devi svargadvāreśvarārcanāt

janmāṃtarasahasreṇa yatpāpaṃ pūrva saṃcitam //
yatpāpaṃ vilayaṃ yāṃti liṃgasyāsya ca kīrtanāt

aṣṭamyāṃ vā caturdaśyāmathavā caṃdravāsare //
ye paśyaṃti narā bhaktyā svargadvāreśvaraṃ śivam //
te devi me śarīraṃ tu praviṣṭāstvapunarbhavāḥ

daśakoṭisahasrāṇi tasmim̐lliṃge tu pūjite //
pūjitāni bhavaṃ tīha liṃgānyaṃtaḥsthitāni tu

sparśanāttasya liṃgasya kīrttanādyajanāttathā //
sukhena svargamāyāṃti yathā kāmānavāpnuyāt

akāmāvā sakāmā vā ye paśyaṃti dine dine //
te'pi puṇyā mahābhāgāḥ svargalokaṃ prayāṃti vai

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye svargadvāreśvaramāhātmyavarṇanaṃnāma navamo'dhyāyaḥ