સ્કંદ પુરાણ · શ્લોક 5.9-2

॥ શ્રીરુદ્ર ઉવાચ ॥ ॥
સ્વર્ગદ્વારેશ્વરં લિંગં નવમં વિદ્ધિ પાર્વતિ ॥
સર્વપાપહરં દેવિ સ્વર્ગમોક્ષફલપ્રદમ્

યદા દેવિ સમાયાતાઃ કૈલાસે પર્વતોત્તમે ॥
અશ્વિન્યાદ્યા ભગિન્યસ્તાસ્ત્વાં દૃષ્ટ્વા વિસ્મયાન્વિતાઃ

નિમંત્રિતા વયં યજ્ઞે સકાંતાઃ સપરિગ્રહાઃ ॥
સ્નેહેન દેવિ તાતેન બહુમાનપુરઃ સરમ્

કચ્ચિત્સ્મૃતા વિશાલાક્ષિ કિં વા તાતસ્ય વિસ્મૃતિઃ ॥
કારણં કિં સમુદ્દિશ્ય તાતેન ન નિમંત્રિતા

તાસાં તદ્વચનં શ્રુત્વા અવમા નાત્તદા ત્વયા ॥
પ્રાણા મુક્તાસ્તુ યોગેન પુરતસ્તાસુ પાર્વતિ

અથ તાઃ શોકસંતપ્તા ગતા યત્ર પ્રજાપતિઃ॥
આચખ્યુઃ સકલં વૃત્તં દક્ષસ્યાગ્રે યથા તથમ્

તચ્છુત્વા દારુણં વાક્યં દક્ષો નોવાચ કિંચન

મયા દૃષ્ટા યદા દેવિ ભૂમૌ પંચત્વમાગતા ॥
યજ્ઞપ્રધ્વંસનાર્થાય તદા વૈ પ્રેરિતા ગણાઃ॥

તે ગત્વાથ ગણા રૌદ્રાઃ શતશોઽથ સહસ્રશઃ ॥
વિરૂપા ભીષણા રૌદ્રા નાનાશસ્ત્રા મહાબલાઃ ॥
મુમુચુઃ શરવર્ષાણિ કુર્વંતો ભૈરવાન્રવાન્

તતો દેવગણાઃ સર્વે વસવઃ સહ ભાસ્કરૈઃ ॥
વિશ્વેદેવાશ્ચ સાધ્યાશ્ચ ધનુર્હસ્તા મહાબલાઃ ॥5.2.9.૧ ૦॥
યુદ્ધાય ચ વિનિષ્ક્રાંતા મુમુચુઃ સાયકાન્સિતાન્ ॥
તે સમેત્યાથ યુયુધુઃ પ્રમથા વિબુધૈઃ સહ ॥
મુમુચુઃ શરવર્ષાણિ વારિધારા યથા ઘનાઃ

તેષાં મધ્યે ગણો નામ વીરભદ્રો મહાબલઃ ॥
સ શક્રં તાડયામાસ શૂલેન હૃદયે તથા

સ તુ તેન પ્રહારેણ વિસંજ્ઞો નિષસાદ હ ॥
અથ મુષ્ટ્યા હતઃ કુમ્ભે નાગ ઐરાવતસ્તથા

સ હતઃ સહસા તેન ગજેંદ્રો ભેરવાન્રવાન્ ॥
વિનદન્ભયમાસ્થાય યજ્ઞવાટમુપાદ્રવત્

એતસ્મિન્નંતરે દેવા કૃતાસ્તેન પરાઙ્મુખાઃ ॥
તતસ્તે શરણં જગ્મુર્વિષ્ણું વિશ્વૈકનાયકમ્

તતઃ કોપસમાવિષ્ટો વિષ્ણુર્દૃષ્ટ્વા દિવાલયાન્ ॥
ગણૈર્વિદ્રાવિતાન્સર્વાન્મુમોચાશુ સુદર્શનમ્

તદાપતત્તુ વેગેન ચક્રં વિષ્ણોઃ સુદર્શનમ્ ॥
પ્રસાર્ય વક્ત્રં સહસા હ્યુદરસ્થં ચકાર હ

તસ્મિંશ્ચક્રે તદા ગ્રસ્તે હ્યમોઘે દૈત્યસૂદને ॥
ક્રુદ્ધો નારાયણો દેવિ વીરભદ્રમુપાદ્રવત્

ગૃહીત્વા પાદયોર્ભૂમૌ નિજઘાનાતિદૂરતઃ ॥
હન્યમાનસ્યાથ ભૂમૌ ગદયા ચ સુદર્શનમ્

રુધિરોદ્ગારસંયુક્તં વક્ત્રાત્તચ્ચ વિનિર્ગતમ્ ॥
મત્તો લબ્ધવરો દેવિ વીરભદ્રો ગણોત્તમઃ ॥
ન તુ પંચત્વમાપન્નો ગદયા તાડિતોઽપિ સઃ

તતસ્તુ પ્રમથાઃ સર્વે વિષ્ણુવીર્યબલાર્દ્દિતાઃ ॥
કૃચ્છ્રેણ સહસા પ્રાપ્તા યત્રાહં દેવિ સંસ્થિતઃ

માં દૃષ્ટ્વા શૂલહસ્તં તુ વિષ્ણુશ્ચાંતરધીયત ॥
ઇંદ્રોઽપિ ત્રિદશૈઃ સાર્દ્ધં પિતૃભિર્બ્રાહ્મણૈઃ સહ

મત્તસ્ત્રાસપરીતાત્મા તતશ્ચાદર્શનં ગતઃ ॥
એવં વિધ્વંસિતે યજ્ઞે નષ્ટો દેવગણો યદા

મયા નિરૂપિતો દેવિ સ્વર્ગદ્વારે ગણસ્તદા ॥
પ્રવેશો નૈવ દાતવ્યસ્ત્રિદશાનાં ગણેશ્વર

દ્વારાવરોધઃ કર્ત્તવ્યો યત્નતઃ શાસનાન્મમ ॥
યઃ કોપિ દૃશ્યતે દેવઃ સ હંતવ્યો ન સંશયઃ

ઉદ્વસશ્ચ તતો જાતઃ સ્વર્ગો દેવા વિનિર્જિતાઃ

સ્વર્ગદ્વારે નિરુદ્ધે તુ શક્રાદ્યા ભયવિહ્વલાઃ॥
બ્રહ્મલોકં ગતા દેવા મંત્રયિત્વા પુનઃપુનઃ

તસ્યાગ્રે કથિતં સર્વં સ્વર્ગદ્વારાવરોધનમ્ ॥
મહેશ્વરગણૈર્વ્યાપ્તં સ્વર્ગદ્વારં પિતામહ

પ્રવેશો દુર્લભો જાતઃ કૃતે દ્વારાવરોધને ॥
કેનોપાયેન યાસ્યામઃ સ્વર્ગલોકં તથાવિધમ્ ૨૯ ॥
નાસ્માકં જાયતે પ્રીતિર્વિના સ્વર્ગં પિતામહ ॥

ઇતિ તેષાં વચઃ શ્રુત્વા પ્રોક્તં તુ બ્રહ્મણા તદા ॥
આરાધ્યઃ શંકરો દેવો મહાદેવો જગત્પતિઃ

સ્તુત્યો વંદ્યો નમસ્કાર્યઃ સૃષ્ટિ સંહારકારકઃ ॥
દુર્લભસ્તુ સુરાઃ સ્વર્ગો વિના તસ્ય પ્રસાદતઃ ॥ ૩૨
ગોપ્તા સ્રષ્ટા સમર્થશ્ચ સ ચાસ્માકં પરા ગતિઃ ॥
સ એવારાધનીયસ્તુ સ ચ પૂજ્યતમો મતઃ

તસ્માત્સર્વપ્રયત્નેન ગમ્યતાં શરણં શિવઃ ॥
ઉપાયં કથયિષ્યામિ શ્રૂયતાં સાવધાનતઃ

ત્રિદશૈઃ સહિતઃ શક્ર તૂર્ણં ગચ્છ મમાજ્ઞયા ॥
મહાકાલવને રમ્યે કપાલેશ્વરપૂર્વતઃ

સ્વર્ગદ્વાર પરં લિંગં વિદ્યતે તત્તુ વાસવ ॥
લોકાનામનુકંપાર્થં મહાદેવેન નિર્મિતમ્ ॥
તમારાધયત ક્ષિપ્રં સ વઃ કામં પ્રદાસ્યતિ

બ્રહ્મણો વચનં શ્રુત્વા ત્રિદશા મુદિતા ભૃશમ્ ॥
સમાયાતા મહાદેવિ મહાકાલવનં તદા

સ્વર્ગદ્વારપ્રદં પુણ્યં દદૃશુર્લિંગમુત્તમમ્ ॥
તસ્ય દર્શનમાત્રેણ સ્વર્ગદ્વારમપાવૃતમ્

સ્વર્ગલોકં ગતાઃ સર્વે યથાપૂર્વં યશસ્વિનિ ॥
નિઃશંકાંસ્ત્રિદશાન્દૃષ્ટ્વા વિજ્ઞપ્તોહં ગણૈસ્તદા

મયાજ્ઞપ્તાશ્ચ તે સર્વે નિવર્ત્તધ્વં ગણોત્તમાઃ ॥
સ્વયમેવ પ્રતિજ્ઞાતં કથં મિથ્યા ભવિષ્યતિ ॥

સ્વર્ગદ્વારપ્રદો દેવો દૃષ્ટો દેવૈર્ન સંશયઃ ॥
મહાકાલવને રમ્યે કથિતો હિ વિરંચિના

સ્વર્ગદ્વારં ગતાઃ સદ્યઃ શક્રાદ્યાસ્ત્રિદશા ગણાઃ ॥
અતઃ પ્રભૃતિ વિખ્યાતઃ સ્વર્ગદ્વારેશ્વરઃ શિવઃ

ખ્યાતિં યાસ્યતિ ભૂલોકે સ્વર્ગલોકપ્રદાયકઃ

યે પશ્યંતિ નરા લોકે સ્વર્ગદ્વારેશ્વરં શિવમ્ ॥
તે યાંતિ સ્વર્ગલોકં હિ સ્વર્ગદ્વારેશ્વરાર્ચનાત્

સ્વર્ગદ્વારેશ્વરં દેવં યે પશ્યંતિ પ્રસંગતઃ ॥
ન તેષાં ભયમસ્તીતિ કલ્પ કોટિશતૈરપિ

અશ્વમેધસહસ્રેણ યત્પુણ્યં સમુદાહૃતમ્ ॥
તત્પુણ્યમધિકં દેવિ સ્વર્ગદ્વારેશ્વરાર્ચનાત્

જન્માંતરસહસ્રેણ યત્પાપં પૂર્વ સંચિતમ્ ॥
યત્પાપં વિલયં યાંતિ લિંગસ્યાસ્ય ચ કીર્તનાત્

અષ્ટમ્યાં વા ચતુર્દશ્યામથવા ચંદ્રવાસરે ॥
યે પશ્યંતિ નરા ભક્ત્યા સ્વર્ગદ્વારેશ્વરં શિવમ્ ॥
તે દેવિ મે શરીરં તુ પ્રવિષ્ટાસ્ત્વપુનર્ભવાઃ

દશકોટિસહસ્રાણિ તસ્મિઁલ્લિંગે તુ પૂજિતે ॥
પૂજિતાનિ ભવં તીહ લિંગાન્યંતઃસ્થિતાનિ તુ

સ્પર્શનાત્તસ્ય લિંગસ્ય કીર્ત્તનાદ્યજનાત્તથા ॥
સુખેન સ્વર્ગમાયાંતિ યથા કામાનવાપ્નુયાત્

અકામાવા સકામા વા યે પશ્યંતિ દિને દિને ॥
તેઽપિ પુણ્યા મહાભાગાઃ સ્વર્ગલોકં પ્રયાંતિ વૈ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પઞ્ચમ આવંત્યખણ્ડે ચતુરશીતિલિઙ્ગમાહાત્મ્યે સ્વર્ગદ્વારેશ્વરમાહાત્મ્યવર્ણનંનામ નવમોઽધ્યાયઃ