Skanda Purana · Chapter 5.9

// vyāsa uvāca // //
kathaṃ tanmāhiṣaṃ kuṇḍaṃ mātṝṇāmākṛtiḥ katham//
rudrasyaiva kathaṃ kṣetre mahiṣo dānavo hataḥ

// sanatkumāra uvāca // //
kapālakhaṃḍamādāyaṃ mahādevo'pyatiprabham /
brahmatejo mayaṃ divyaṃ jvalaṃtamiva cārciṣā

krīḍamāno jagannātho mohayāmāsa vai surān//
nimeṣātsa imaṃ lokaṃ yogātmā yogalīlayā

prāpya puṇyatamaṃ kṣetraṃ yatrātiṣṭhanmahāprabhuḥ //
tatratatra mahaddivyaṃ kapālaṃ devatādhipaḥ

sthāpayāmāsa dīptārcirgaṇānāmagrataḥ prabhuḥ //
tvatsthāpitamatho dṛṣṭvā gatāḥ sarve mahaujasaḥ

vinadatsamahānādaṃ nādayaṃta diśo daśa //
kṣobhārṇavāśaniprakhyaṃ nabho yena vidīryate

tena śabdena ghoreṇa dānavo devakaṃṭakaḥ //
hālāhala iti khyāto deśaṃ tamabhidhāvitaḥ

amṛṣyamāṇaḥ krodhārto durātmā durjayaḥ suraiḥ //
brahmadattavaraścaiva māhiṣaṃ vapurāsthitaḥ

daityaiḥ parivṛto ghorai koṭibhiścodyatāyudhaiḥ //
tamāyāṃtaṃ tu sakrodhaṃ mahiṣaṃ devakaṃṭakam

samāvekṣyāha vai devo gaṇānsarvā npinākadhṛk //
māyāvī gaṇapā daityastrailokyasyāpi kaṃṭakaḥ

āyāti tvarito yūyaṃ tasmādenaṃ vinighnatha //
kapālasya gatiṃ sarva āśritā gaṇanāyakāḥ

tato devagaṇā dṛṣṭvā tamāyāṃtaṃ mahāsuram //
garjamānaṃ mahānādaṃ bhramamāṇaṃ mahābhujam

bibhiduḥ śalasaṃghātairasibhi rmusalaistathā //
saṃmuhya śarajālena tato bhūmau nyapātayan

hate tasminmahādevo devānprovāca vai tadā //
aho darpātimūḍhaḥ sa darpeṇa nidhanaṃ gataḥ

etasminnaṃtare vyāsa tatkapālātsubhairavāḥ //
dīptāsyā mātaraḥ sarvāḥ pracaṃḍāstrā mahābalāḥ

abhyadhāvaṃstamuddeśaṃ mahādevaṃ nivedya vai //
daityaṃ tā bhakṣayaṃti sma bhittvā bhittvā mahābalāḥ

kapālamātarastasmātkhyātāḥ kṣetre mahābalāḥ //
mahākapālastasmādvai tādṛśaḥ pari kīrtitaḥ

sthāpitasya kapālasya bhittvā samabhavatpurā //
khyātaṃ śivataḍāgaṃ ca sarvapāpapraṇāśanam

tadadyāpi mahaddivyaṃ sarastatra prakāśate //
triṣu lokeṣu vikhyātaṃ gaṇagaṃdharvasevitam

pātrasthamuddhutaṃ vāpi śītoṣṇaṃ kvathitaṃ jalam //
raudraṃ saraḥ punātīhāśvamedhāvabhṛtho yathā

prāgādbrahmāpi taṃ deśaṃ devatānāṃ śatairvṛtaḥ //
svargalokasya niḥśreṇī kīrtitā brahmaṇā svayam

atra tyajaṃti ye prāṇānrudra lokaṃ vrajaṃti te //
dhanyā vyāsa narā martye mahākālavane sthitāḥ

raudre sarasi ye snāṃti jalaṃ vāpi pibaṃti ye //
svadharmācāraniratāḥ paśyaṃtīśānamīśvaram

iti svargagatā devāḥ spṛhāṃ kurvaṃti nityaśaḥ

idaṃ śubhaṃ divyamadharmanāśanaṃ mahākapālaṃ suradaityapūjitam //
mahāprabhaṃ pāpaharaṃ sanātanaṃ sureśalokādapi durlabhaṃ sadā

taporataiḥ siddhagaṇairabhiṣṭutaṃ yathā nabhaḥsthaṃ dinanāthamaṃḍalam //
ya ekacittaḥ śṛṇuyātprasādatastriviṣṭapaṃ gacchati so'bhinaṃditaḥ

iti śrīskānde mahāpurāṇa ekāśītisāhasryāṃ sahitāyāṃ paṃcama āvantyakhaṇḍe'vantīkṣetra māhātmye mahiṣakuṇḍarudrasaromāhātmyavarṇanaṃnāma navamo'dhyāyaḥ