Skanda Purana · Chapter 5.84

// śrīmahādeva uvāca // //
uttareśvaramāhātmyamaśeṣapāpanāśanam//
janmamṛtyujarāvyādhisphoṭanaṃ śṛṇu pārvati

ayodhyāyāmatikhyātakulotpannaśca pārthivaḥ //
sudhīḥ parīkṣinnāmā ca mṛgayāmagamatsa ca

mṛgamanusasārātha mṛgo dūramapāsarat

tadādhvani jātaśramaḥ kṣuttṛṣṇābhibhūtaḥ kasmiṃścidvanoddeśe nīlavanamapaśyaccāviveśa

tasya vanakhaṇḍasya dakṣiṇabhāge saro dṛṣṭvā sāśva eva vyagāhata

athāśvasthaḥ sanmṛṇālamaśvasyāgrato nikṣipya puṣkariṇīṃ samupāviśat

śayitastataḥ śayāno gītamaśṛṇot

sa śrutvāciṃtayanneha manuṣyagatiṃ prapaśyāmi

kasya khalvayaṃ gītaśabda ityavalokayāmāsa

athāpaśyatkanyāṃ paramarūpadarśanīyāṃ puṣpāṇi vicinvaṃtīṃ cātha rājā samīpe paryakrāmat

tāmabravīdrājā kasyāsi tvaṃ kanyā paramarūpadarśanīyā puṣpāṇi vicinvatī

sātha rājasamīpe gatveti provāca kanyāsmīti

//
// rājovāca // //
arthī tavāsmīti

athovāca kanyā //
samayenāhaṃ tvayā śakyopālabdhuṃ nānyatheti

tāṃ rājā samapṛcchatkaste samaya iti

tataḥ kanyā tamuvāca nodakaṃ darśayitavyamiti

rājā bāḍhamityuktā tāṃ samāgamya tayā sahāste

tatraivāsanne rājani senā tvāgacchat tayā sahopaviṣṭaṃ rājānaṃ parivārya cātiṣṭhat

sabhājitaśca rājā tathaiva śibi kayā prāyāt //
atha jhaṭiti tayā saha svaṃ nagaramanuprāpya rahasi tayā saha ramamāṇaḥ sannānyaṃ kiṃcidapaśyadatha pradhānomātyastasyābhyāśacarāstāḥ striyo'bhyapṛcchat

kimatra prayojanaṃ vidyate ityabruvaṃstāḥ striyo pūrvameva paśyāmastadudakaṃ nātrāśriyata iti

athāmā tyaśca nirudakaṃ kārayitvā dāruvṛkṣaṃ vṛddhapuṣpaphalaṃ śaradyupalabhya rājānāmabravīt //
vanamidamanudakaṃ sādhvatra ramyatāmiti

sa tasya vacanātta yaiva saha devyā vanaṃ prāviśat

sakalatrastasminvane ramye tayaiva saha reme

praviśya ca rājā saha priyayā sudhādhavalasalilapūrṇāṃ vāpīmapaśyat

vāpīṃ darduraiḥ pūrṇāṃ dṛṣṭvaiva ca tāṃ tasyā eva tīre tayā devyātiṣṭhat

atha tāṃ devīṃ rājābravīt //
śāṃtataraṃ vāpīsalilamiti

sā ca tadvacaḥ śrutvā tīrthavāpīṃ nyamajjanna punarudamajjat //
tāṃ mṛgayamāṇo rājā nāpaśyat

vāpīṃ dardurair pūrṇāṃ dṛṣṭvā ājñāpayāmāsa bhṛtyānsarvadarduravadhaḥ kriyatāmiti

yo mamārthī sa tairdadurairupāyanairmāmanutiṣṭhet

atha kaścinmahāndarduro darduravadhe kriyamāṇe sarvāsu dikṣvabhyagāt

upetya cainamuvācedaṃ jñātvā krodhavaśaṃgatam //
prasādaṃ kuru nārhasi dardurāṇāmanaparādhināṃ vadhaṃ kartumiti //

ślokaścātra bhavati //
mā durdurānprabhiṃdyāstvaṃ kopaṃ saṃdhārayācyuta //
prakṣīyate mahādharmo janānāṃ parijānatām

tamevaṃ vādinamiṣṭajanaviyoge śākaparītātmānaṃ sa rājā provāca //
nahi kāmamapyetanniṣkāmena nibarhaṇīyā iti

etairdurātmabhirma strī bhakṣitā sarvathaiva tvima vadhyā dardurāḥ //
nārhasi vidvannuparoddhumiti

sa tadvākyamupaśrutya vyathiteṃdriyamanāḥ provāca prasīda rājannahamāyurnāmabhūpālaḥ

prāptā sā mama duhitā //
sā kanyā nāgalokaṃ gatā //
atrāste nāgacūḍo nāgarājaḥ //
smṛtā āgamiṣyati

tāmabravīdrājā tāṃ smṛtvānīya me dīyatāmiti

athaināṃ smṛtvā rājñe adāt //
abravīcca

mayāvahasito gālavo mahānmuniḥ tapasā karśitāṃgaḥ //
kṣameśvaro dardurabālyātprakopitaḥ tenāhaṃ śaptaḥ yanmāmanādṛtya dardurabālyādavahasitastasmāddarduro bhaviṣyasi

prasāditastu vipraḥ pratyuvāca //

avitatho'yaṃ mama śāpastasmādanyajanmani dardurarājo bhūtvā tvaṃ hi duhitaramikṣvākukulotpannāya sarvaguṇānvitāya dattvā yadā yāsyasi mahākālavane tasyottaradigbhāge tadā liṃgasya darśanena muktimavāpsyasi

duhitā kiyatpātālaṃ yāsyati smṛtā cāgamiṣyati //
svasti te'stu sādhayiṣyāmi kāryāṇi, ityuktvā darduro mahākālavanamagacchat

tasyottare liṃgaṃ dadarśa tasya darśanādanekamā ṇikyaracitaṃ siddhagandharvasevitaṃ vimānavaramāruhya śakralokaṃ gataḥ

tasya māhātmyamavalokya devācāryo bṛhaspatirvākyaṃ jagāda

aho liṃgasya māhātmyamaho liṃgasya vaibhavam //
saṃprāpto vāsavaṃ lokaṃ śāpabhraṣṭo hi darduraḥ

āyurākhyo hi bhūpālo mukto darduratāṃ gataḥ //

iti tadvacanaṃ śrutvā devācāryasya pārvati //
devāste haṣṭamanaso nāma cakuḥ samāhitāḥ

yasmāddardurabhūpālo mukto dardurayonitaḥ //
darśanāttasya liṃgasya tasmātkhyāto bhaviṣyati

uttareśvaradevaśca śāpapāpapraṇodakaḥ //
ityuktvā tridaśaiḥ sarvaiḥ pūjito hyuttareśvaraḥ //

bhuktimuktiprado devi mahāpātakanāśanaḥ //
kṣetrasya rakṣaṇārthāya niyukto yo mayā gaṇaḥ //
darduro hi durādharṣaḥ sa cāpīśvaratāṃ gataḥ //

uttarāśāmatho gatvā yaḥ paśyeduttareśvaram //
sa sarvaiśvaryasaṃyukto yāti lokamathottaram

subhagaḥ sarvadā dāṃtaḥ surūpaḥ putravāniti //
nīrogaḥ puṇyaśīlaśca jāyate saptajanma ca

yā vṛddhistu kuberasya śakrasya ca yamasya ca //
varuṇasya ca yā vṛddhiḥ sā vṛddhiruttarottarā //
jāyate nātra sandeha uttareśvaradarśanāta

kṛṣṇapakṣe caturdaśyāṃ ye paśyaṃti yaśasvini //
uttareśvarasaṃjñaṃ tu te kṛtārthāḥ kalau yuge

kiṃ dānaiḥ kiṃ tapobhiśca kiṃ yajñairbahudakṣiṇaiḥ //
darśanāllabhate rājyaṃ svargaṃ mokṣaṃ krameṇa tu

ājanma ca kṛtaṃ pāpaṃ svalpaṃ vā yadi vā bahu //
tatsarvaṃ nāśamāyāti uttareśvaradarśanāt

ityevaṃ caturāśītiḥ saṃkhyātā īśvarāstava //
kathitā ye tvayā pṛṣṭā mahākālavane mayā

ya eteṣāṃ devi yātrāṃ pratilomānulomataḥ //
kariṣyaṃti narā bhaktyā te yāsyaṃti paraṃ padam /

yaścāpi pūjayettatra liṃgaṃ bhaktyā tu mānavaḥ //
sa kulaṃ tārayatyeva paitṛkaṃ mātṛkaṃ śatam

eṣa te kathito devi prabhāvaḥ pāpa nāśanaḥ //
caturāśītiliṃgānāṃ kiṃ bhūyaḥ śrotumicchasi

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmya umāmaheśvarasaṃvāda uttareśvaraliṃgamāhātmyavarṇanapūrvaka caturaśītiliṃgamāhātmyavarṇanaṃnāma caturaśītitamo'dhyāyaḥ

iti śrīskāṃde mahāpurāṇe paṃcama āvantyakhaṇḍe dvitīyamavantīsthacaturaśītiliṃgamāhātmyaṃ samāptam // ( ५-२) //