Scripture Library

Skanda Purana · Verses 5.82-2

5.82-2.82.1

śrīmārkaṇḍeya uvāca -
tato gacchenmahīpāla vahnitīrthamanuttamam /
yatra siddho mahātejāstapaḥ kṛtvā hutāśanaḥ

5.82-2.82.2

sarvabhakṣyaḥ kṛto yo'sau daṇḍake muninā purā /
narmadātaṭamāśritya pūto jāto hutāśanaḥ

5.82-2.82.3

tatra tīrthe tu yaḥ snātvā pūjayitvā maheśvaram /
agnipraveśaṃ kurute sa gacchedagnisāmyatām

5.82-2.82.4

bhaktyā snātvā tu yastatra tarpayetpitṛdevatāḥ /
agniṣṭomasya yajñasya phalamāpnotyasaṃśayam

5.82-2.82.5

tasyaivānantaraṃ rājankauberaṃ tīrthamuttamam /
kubero yatra saṃsiddho yakṣāṇāmadhipaḥ purā

5.82-2.82.6

tatra tīrthe naraḥ snātvā samabhyarcya jagadgurum /
umayā sahitaṃ bhaktyā sarvapāpaiḥ pramucyate

5.82-2.82.7

tatra tīrthe tu yaḥ snātvā dadyādviprāya kāṃcanam /
nābhimātre jale tiṣṭhansa labhetārbudaṃ phalam

5.82-2.82.8

dadhiskande madhuskande nandīśe varuṇālaye /
āgneye yatphalaṃ tāta snātvā tatphalamāpnuyāt

5.82-2.82.9

te vandyā mānuṣe loke dhanyāḥ pūrṇamanorathāḥ /
yaistu dṛṣṭaṃ mahāpuṇyaṃ narmadātīrthapañcakam

5.82-2.82.10

te yānti bhāskare loke parame duḥkhanāśane /
bhāskarādaiśvare loke caiśvarādanivartake

5.82-2.82.11

nīyate sa pare loke yāvadindrāścaturdaśa /
tataḥ svargāccyuto martyo rājā bhavati dhārmikaḥ

5.82-2.82.12

sarvarogavinirmukto bhunakti sacarācaram /
viṣṇuśca devatā yeṣāṃ narmadātīrthasevinām

5.82-2.82.13

akhaṇḍitapratāpāste jāyante nātra saṃśayaḥ /
gaṅgā kanakhale puṇyā kurukṣetre sarasvatī

5.82-2.82.14

grāme vā yadi vāraṇye puṇyā sarvatra narmadā /
revātīre vasennityaṃ revātoyaṃ sadā pibet

5.82-2.82.15

sa snātaḥ sarvatīrtheṣu somapānaṃ dine dine /
gaṅgādyāḥ saritaḥ sarvāḥ samudrāśca sarāṃsi ca /
kalpānte saṃkṣayaṃ yānti na mṛtā tena narmadā

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dadhiskandādipañcatīrthamāhātmyavarṇanaṃ nāma dvyaśītitamo'dhyāyaḥ //

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0