Skanda Purana · Chapter 5.82

// mahādeva uvāca // //
kāyāvarohaṇasyāpi utpattiṃ śṛṇu pārvati //
yasyāḥ śravaṇamātreṇa na naraḥ kāyavānbhavet

brahmaṇaḥ sṛṣṭikāmasya manovarvaisvateṃ'tare //
dakṣastva jāyatāṃguṣṭhāddakṣiṇātsa prajāpatiḥ

vāmādajāyatāṃguṣṭhādbhāryā tasya mahātmanaḥ //
tasyāṃ pañcāśataṃ kanyāḥ sa evājanayatprabhuḥ

tāḥ sarvāścānavadyāṃgīḥ kanyāḥ kamalalocanāḥ //
putrikāḥ sthāpayāmāsa naṣṭaputraḥ prajāpatiḥ

dadau sa daśa dharmāya kaśyapāya trayodaśa //
divyena vidhinā devi saptaviṃśatimiṃdave

rohiṇī vallabhā jātā tasya candrasya sarvadā //
ṣaḍviṃśatikṛte candraḥ śapto dakṣeṇa pārvati

caṃdreṇāpi tathā śapto dakṣaḥ prācetasaḥ kṛtaḥ //
ayajatso'śvamedhena bhūtvā prācetasātmajaḥ

nāmaṃtrito'haṃ mohena dakṣeṇa parvatātmaje //
tatra devanikāyānāṃ yajñabhāgānaśeṣataḥ

havyavāhastadā yukto vahanmaṃtraiḥ samīritaḥ //
tvayā dṛṣṭo viśālākṣi nirālaṃbeṃ'bare sthitaḥ

smaraṃtyā pūrvavairaṃ tu vijñapto'haṃ tvayā priye //
tvaṃ devaḥ sarvadevānāṃ gatiśca śaraṇaṃ tathā

tvaṃ yajñastvaṃ vaṣaṭkāro hotā'dhvaryustvameva ca //
tvayā vinā kathaṃ yajño varttate sarvadevapa

devānāṃ bhāgadheyāni vahatyagnirayaṃ bhayāt //
sagarvaścāvaliptaśca dakṣaḥ prācetasaḥ kila

anusmaranpūrvavairaṃ naiva dāsyatyaśāsitaḥ //
kāyahīnaśca karttavyo dakṣo vahnistathaiva ca

ye ca yajñe samānītā devā dakṣasya śaṃkara //
te sarve kāyarahitāḥ kāryā stripurasūdana

evamukte tvayā devi mayāpyuktaṃ varānane //
pūrvajanmani dakṣo'yaṃ pitā tava śucismite

vahniścādeśakārī ca devāḥ krīḍanakāḥ priye //
madīyaṃ vacanaṃ śrutvā kṛtaḥ krodhastvayā priye

lalāṭe bhrukuṭīṃ kṛtvā procchvasaṃtyā punaḥpunaḥ //
krodhātkareṇa nāsāgraṃ marditaṃ bahuśastadā

tasminsaṃmardyamāne tu nāsāgre parvatātmaje //
jātā strī bhrukuṭīvakrā caturdaṃṣṭrā trilocanā

baddhagodhāṃgulitrā ca kavacābaddhamekhalā //
sakhaḍgā sadhanuṣkā ca satūṇā sapatākinī

sahasrāsyā śatabhujā sahasracaraṇodarī //
pratikūlaiḥ padairdevi kaṃpayaṃtī tathā bhuvam

kṛtaṃ nāma tvayā devi tāṃ dṛṣṭvā ca tamomayīm //
bhadrakālī ca māyā ca sarvalokanamaskṛte

mayā sṛṣṭastu puruṣastādṛśo lomaharṣaṇaḥ //
sa cāpi prāṃjalirbhūtvā māmuvāca punaḥpunaḥ//
ājñāpaya sureśāna kiṃ karomi jagatprabho

tato devi mayājñapto bhāvaṃ jñātvā tvadīyakam //
kṛtvā nāma manojñaṃ tu vīrabhadra iti smṛtaḥ

vīrabhadra mamādeśādbhadrakālyā sahānayā //
prācetasātmajaṃ dakṣaṃ sagarvaṃ sahadaivatam

vidhvaṃsaya gaṇādhyakṣa sayajñaṃ saparigraham //
dattaṃ mayā mahatsainyamasaṃkhyeyaguṇasya ca

tvayāpi bhadrakālyāstu dattaṃ sainyaṃ bhayāvaham //
kapālakartrikāhastaṃ mātṝṇāṃ gaṇamakṣayam

tatastau tena sainyena mahatātisamāvṛtau //
jagmatustatra yatrāste dakṣaḥ prācetaso yajan

devaiḥ parivṛto devi sadasyairbrāhmaṇaiḥ saha //
tato devāḥ suruddhāste tena sainyena pārvati //
viśrabdhā maṃtrapūtaṃ tu pibaṃtaḥ somamadhvare //

trinetreṇa triśūlena tridaśādhipa īśvaraḥ // trā
sitaḥ sahasā śakro gaṇenādhvaramadhyagaḥ

yamākhyena gaṇenaiva yamakalpaprabheṇa ca //
somapāne prasaktaśca yamaścākarṣito'dhvare

pāśena varuṇo baddhaḥ pāśena gaṇapena tu //
paścimāśādhipo vīraḥ prāṇena parameśvari

tāḍito'nila evātha uttare naravāhanaḥ //
uttarāśādhipo devi nidhānaiḥ sahito'dhvare //
vīrabhadraniyuktāste cakruryuddhaṃ sudāruṇam

atha yuddhaṃ cakāro ccairbhadrakālī bhayāvahā //
vikarālī mahākālī kālikā kalaśodarī

prajvālajvalanākārā śuṣkamāṃsātibhairavā //
etāścānyāśca śataśo naramālāvibhūṣaṇāḥ

kapālakartrikāhastā jaghnurdevagaṇāstadā //
iti mātṛgaṇaṃ kruddhaṃ mardayaṃtaṃ surāstadā //
dṛṣṭvābhyupagatā devāstuṣitā yuddhalālasā

kecicca cikṣipuḥ śaktīḥ kecitprāsāṃstathāpare //
kecicca tomaraistīkṣṇaiḥ kecitkhaṅgaiśca paṭṭiśaiḥ

arddito mātṛsaṃghastu pīḍitāḥ pramathā yadā //
bhadrakālī tadā kruddhā gadayā śaravṛṣṭibhiḥ

khaḍgādibhiḥ ṣaḍarkāṃśuḥ pīḍayāmāsa saṃyuge //
bhagasya netre pūṣṇastu daśanāḥ sūditā mukhāt

karāndinakarasyaiva caraṇau bhāskarasya ca //
muśalena hatā ye'ṣṭau vasavo raṇakovidāḥ

vamanto rudhiraṃ te'pi naṣṭā jarjara mastakāḥ //
videhāśca kṛtā yuddhe tuṣitā raṇagarvitāḥ

baddhaḥ prācetaso dakṣaḥ pāśena sudṛḍhena ca //
śeṣāśca tridaśā bhītā brahmāṇaṃ śaraṇaṃ gatāḥ

vṛttāṃtaḥ kathitaḥ sarvo vistareṇa yathā tathā //
ādyā ye tuṣitā devā videhāścaiva te kṛtāḥ

naṣṭāśca vasavo devāḥ pīḍitā bhāskarā raṇe //
na jñāyate sahasrākṣo na yamo na dhaneśvaraḥ //
varuṇo yādasāṃ nāthaḥ kva gataḥ parameśvaraḥ

bhadrakālyā hataṃ sarvaṃ vīrabhadragaṇena ca //
bhagnaśca yajñayūpo vai vidhvastaṃ kalaśaṃ tadā

pradīpitā mahāśālā bhagnaṃ vai yajñatoraṇam //
teṣāṃ tu vacanaṃ śrutvā brahmā lokapitāmahaḥ //
ājagāma kṛpāviṣṭo yatrāhaṃ mandare sthitaḥ

stutiṃ kṛtvā madīyāṃ tu vākyamuktamidaṃ tadā//
ādyā ye tuṣitā devā videhāścaiva te kṛtāḥ //

bhadrakālyā mahādeva vasavo jarjarīkṛtāḥ //
pīḍitā bhāskarā yuddhe śeṣā naṣṭā diśo gatāḥ

kāyāvarohaṇaṃ deva tuṣitānāṃ kathaṃ bhavet//
brahmaṇo vacanaṃ śrutvā mayā proktaṃ varānane

mahākālavane kṣetre gacchantu tuṣitāstvamī //
lakuṭīśo gato yatra kāyāvarohaṇādgra ham

brāhmaṇāśca mamādeśāccatuḥśiṣyaiḥ samanvitāḥ //
dvāpare samatikrāṃte prāpte kaliyuge tathā

tatra kāyamanuprāptā mama śiṣyā mamo pamāḥ //
avasaṃta kṣitau dhanyā rakṣaṇārthaṃ dvijanmanām

kṣetrasya dakṣiṇe tasya vidyate liṃgamuttamam //
sarvasaṃpatkaraṃ divyaṃ siddhānāṃ kāya dāyakam

prasādāttasya liṃgasya kāyānprāpsyaṃtyamī surāḥ //
madīyaṃ vacanaṃ śrutvā gatāste tuṣitāḥ priye

muditā brahmaṇā sārddhaṃ yatra talliṃgamuttamam//
prasādāttasya liṃgasya prāptaṃ kāyamanuttamam

punaste tādṛśā jātāstuṣitā yādṛśā'bhavan //
ato devaiḥ kṛtaṃ nāma kāyāvarohaṇeśvaraḥ //
samīhitaprado nityaṃ khyāto devo bhaviṣyati

ye gatvā dakṣiṇāmāśāṃ devaṃ kāyāvarohaṇam //
paśyanti parayā bhaktyā yamasteṣāṃ pitā bhavet

janmakoṭisahasraistu yatpāpaṃ samupārjitam //
tatsarvaṃ nāśamāyāti darśanādeva nānyathā

svakarmaṇā gatā ye ca narake pitaro gaṇāḥ//
darśanāttasya liṃgasya teṣāṃ muktirbhaviṣyati

ye paśyaṃti prasaṃgena devaṃ kāyārohaṇam //
na teṣāṃ punarāvṛttiḥ kalpakoṭiśatairapi

sparśanāttasya liṃgasya pāpinopi hi ye narāḥ //
te yāsyaṃti paraṃ sthānaṃ sarvapāpavivarjitam

śāṭhyena pūjito devaḥ kāyāvarohaṇeśvaraḥ //
dadāti rājyaṃ bhogāṃśca svargalokaṃ sanātanam

dvādaśyāṃ ye prapaśyaṃti snātvā kāyāvarohaṇam //
te bhittvā brahmasadanaṃ yāsyanti paramāṃ gatim

eṣa te kathito devi prabhāvaḥ pāpanāśanaḥ //
kāyāvarohaṇeśasya bilveśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmya umāmaheśvarasaṃvāde kāyāvarohaṇeśvaramāhātmyavarṇa naṃnāma dvayaśītitamo'dhyāyaḥ