સ્કંદ પુરાણ · શ્લોક 5.82-2

શ્રીમાર્કણ્ડેય ઉવાચ -
તતો ગચ્છેન્મહીપાલ વહ્નિતીર્થમનુત્તમમ્ ।
યત્ર સિદ્ધો મહાતેજાસ્તપઃ કૃત્વા હુતાશનઃ

સર્વભક્ષ્યઃ કૃતો યોઽસૌ દણ્ડકે મુનિના પુરા ।
નર્મદાતટમાશ્રિત્ય પૂતો જાતો હુતાશનઃ

તત્ર તીર્થે તુ યઃ સ્નાત્વા પૂજયિત્વા મહેશ્વરમ્ ।
અગ્નિપ્રવેશં કુરુતે સ ગચ્છેદગ્નિસામ્યતામ્

ભક્ત્યા સ્નાત્વા તુ યસ્તત્ર તર્પયેત્પિતૃદેવતાઃ ।
અગ્નિષ્ટોમસ્ય યજ્ઞસ્ય ફલમાપ્નોત્યસંશયમ્

તસ્યૈવાનન્તરં રાજન્કૌબેરં તીર્થમુત્તમમ્ ।
કુબેરો યત્ર સંસિદ્ધો યક્ષાણામધિપઃ પુરા

તત્ર તીર્થે નરઃ સ્નાત્વા સમભ્યર્ચ્ય જગદ્ગુરુમ્ ।
ઉમયા સહિતં ભક્ત્યા સર્વપાપૈઃ પ્રમુચ્યતે

તત્ર તીર્થે તુ યઃ સ્નાત્વા દદ્યાદ્વિપ્રાય કાંચનમ્ ।
નાભિમાત્રે જલે તિષ્ઠન્સ લભેતાર્બુદં ફલમ્

દધિસ્કન્દે મધુસ્કન્દે નન્દીશે વરુણાલયે ।
આગ્નેયે યત્ફલં તાત સ્નાત્વા તત્ફલમાપ્નુયાત્

તે વન્દ્યા માનુષે લોકે ધન્યાઃ પૂર્ણમનોરથાઃ ।
યૈસ્તુ દૃષ્ટં મહાપુણ્યં નર્મદાતીર્થપઞ્ચકમ્

તે યાન્તિ ભાસ્કરે લોકે પરમે દુઃખનાશને ।
ભાસ્કરાદૈશ્વરે લોકે ચૈશ્વરાદનિવર્તકે

નીયતે સ પરે લોકે યાવદિન્દ્રાશ્ચતુર્દશ ।
તતઃ સ્વર્ગાચ્ચ્યુતો મર્ત્યો રાજા ભવતિ ધાર્મિકઃ

સર્વરોગવિનિર્મુક્તો ભુનક્તિ સચરાચરમ્ ।
વિષ્ણુશ્ચ દેવતા યેષાં નર્મદાતીર્થસેવિનામ્

અખણ્ડિતપ્રતાપાસ્તે જાયન્તે નાત્ર સંશયઃ ।
ગઙ્ગા કનખલે પુણ્યા કુરુક્ષેત્રે સરસ્વતી

ગ્રામે વા યદિ વારણ્યે પુણ્યા સર્વત્ર નર્મદા ।
રેવાતીરે વસેન્નિત્યં રેવાતોયં સદા પિબેત્

સ સ્નાતઃ સર્વતીર્થેષુ સોમપાનં દિને દિને ।
ગઙ્ગાદ્યાઃ સરિતઃ સર્વાઃ સમુદ્રાશ્ચ સરાંસિ ચ ।
કલ્પાન્તે સંક્ષયં યાન્તિ ન મૃતા તેન નર્મદા

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે દધિસ્કન્દાદિપઞ્ચતીર્થમાહાત્મ્યવર્ણનં નામ દ્વ્યશીતિતમોઽધ્યાયઃ ॥