Skanda Purana · Verses 5.8-2

// śrīrudra uvāca // //
kapāleśvarasaṃjñaṃ ca hyaṣṭamaṃ viddhi pārvati //
yasya darśanamātreṇa brahmahatyā praṇaśyati

purā vaivasvate kalpe tretākāle samāgate //
mahākālavane divye yaje paitāmahe priye

upaviṣṭeṣu vipreṣu hūyamāne hutāśane //
veṣaṃ kāpālikaṃ kṛtvā gato'haṃ tatra saṃsadi

jīrṇakaṃthāvṛto devi muṃḍaḥ khaṭvāṃgadhārakaḥ //
citābhasmaviliptāṃgo vikṛto vikṛtānanaḥ //
kapālaṃ ca kare kṛtvā kapālakṛtabhūṣaṇaḥ

brāhmaṇāśca tataḥ kruddhā dṛṣṭvā māṃ jālmarūpiṇam //
kapāladhāriṇaṃ sarve dhikchabdaiśca jagarhire

asakṛtpāpapāpeti gacchagaccha viḍaṃbitāḥ //
kathaṃ ca homaḥ kriyate prāpte kāpālike puraḥ

akapālāni śaucāni iti vedeṣu gīyate //
yajñavedirna terhā tu manuṣyāsthi dharasya vai

mayā proktāstu te viprāḥ śrūyatāṃ dvijasattamāḥ //
yūyaṃ kāruṇikāḥ sarve paraduḥkhena duḥkhitāḥ

karttavyā ca dayā sadbhiḥ sarvadā sarvadehinām //
sarveṣāmeva jaṃtūnāṃ mitraṃ brāhmaṇa ucyate

ahaṃ kāpāliko vipro bhasmabhūṣitavigrahaḥ //
kāpālavratamāsthāya carāmi pṛthivītale

ārādhayāmi satataṃ mahādevaṃ jagatpatim //
brahmahatyāvināśāya vrataṃ dvādaśavārṣikam

aghaghnaṃ viśrutaṃ loke prārabdhaṃ hi mayā dvijāḥ //
prāyaścittanimittaṃ tu śuddho yāsyāmi sadgatim

madīyaṃ vacanaṃ śrutvā taiḥ proktaṃ dvijasattamaiḥ //
atīva pāpiṣṭhataro yo hyevaṃ bhāṣase'dhama

kapālairbhūṣito niṃdyo viśeṣeṇa tu viprahaḥ //
nākārito mahādevo dakṣayajñamahotsave

yasminyajñe samāyātā ādityā vasavastathā //
viśvedevāśca maruto gaṃdharvāḥ kiṃnarāstathā

brahmā viṣṇuḥ sahasrākṣo varuṇo vāyureva ca //
dhanadaḥ sāgarā nadyaḥ sarāṃsi sakalāni ca

suparṇā girayo nāgāḥ sarve cākāritāḥ kratau //
sānugāste sabhāryāśca brāhmaṇā vedapāragāḥ

brahmarṣayo mahābhāgāstathā devarṣayo'malāḥ //
evamuktvā mahādevaṃ mānuṣāsthivibhūṣitam

apavitramiti jñātvā kathaṃ tvaṃ vaktumarhasi //
praveśo dīyatāṃ mahyaṃ viśeṣeṇāsi brahmahā

ityukto'haṃ yadā viprairmayā proktaṃ vacastadā //
pratīkṣyatāṃ muhūrtaṃ tu bhuktvā yāsyāmyahaṃ punaḥ

ityukte vacane devi tāḍito'haṃ bhṛśaṃ tadā //
loṣṭhairlaguḍakaiḥ pādairmuṣṭibhiśca punaḥpunaḥ

atha prahasya tatkṣiptvā tāṃ vediṃ darbhasaṃstṛtām //
kapāladīpavannaṣṭo na jñāto'haṃ dvijottamaiḥ

mayi naṣṭe kapālaṃ tatkṣiptaṃ maṃḍapabāhyataḥ //
athānyattatra saṃjātaṃ tādṛgrūpaṃ yaśasvini

evaṃ śatasahasrāṇi prayutānyarbudāni ca //
tatra kṣiptāni jātāni tataste vismayānvitāḥ

athāhurjñāninaḥ sarve nedamanyasya ceṣṭitam //
ṛte devānmahādevādgaṃgācaṃdrārddhaśekharāt

tato'haṃ vividhaiḥ stotraiḥ stuto vipraiḥ pṛthakpṛthak //
homaṃ cakruśca te vahnau maṃtraiśca śatarudriyeḥ

ahaṃ tuṣṭastadā devi dvijānāmanukaṃpayā //
vriyatāṃ brāhmaṇāḥ sarve varaṃ yanmanasepsitam

tadā te brāhmaṇāḥ procuryadajñānādvadhastava //
kṛtastena kṛtāsmābhirbrahmahatyā jagatprabho

brahmahatyāvināśāya prasādaṃ kuru naḥ prabho //
varayāmo varaṃ hyenaṃ nānyaṃ varamabhīpsitam

dvijānāṃ ca tadā teṣāmagre kathitavānidam //
yatra rāśiḥ kapālānāṃ bhavadbhirvihito bhuvi

anādiliṃgaṃ tatrāsīcchannaṃ kālaviparyaye //
paśyaṃtu viprāstalliṃgaṃ brahmahatyāvimocanam

kṛtā mayāpi vipreṃdrā brahmahatyā svayaṃ purā //
chiṃdatā brahmaṇaḥ śīrṣaṃ pañcamaṃ tejasotkaṭam

brahmahatyā tato jātā mamātīva suduḥsahā //
kapālaṃ ca kare lagnaṃ tathā cātīva duḥsaham

dahyamānastataścāhaṃ vyāpto vai brahmahatyayā //
nāśāya satvaraṃ tasyāḥ svārthayātrāmahaṃ gataḥ

gataḥ sarveṣu tīrtheṣu naiva muktastu hatyayā //
tato duḥkhī susaṃtapto naiva lebhe sukhaṃ kvacita

etasminnaṃtare daivī vāguvācāśarīriṇī //
gacchāvantīṃ svayaṃ nātha kimarthaṃ khidyate vṛthā

mahākālavanaṃ puṇyaṃ tvayā nātha vinirmitam //
kapālakarasaṃsthānaṃ rudramadbhutadarśanam //
na jānāsi kathaṃ kṣetraṃ mahāpātakanāśanam

tasminkṣetre mahalliṃgaṃ gajarūpasya saṃnidhau //
vidyate paśya deveśa brahmahatyā praṇaśyati

tato'hamāgatastūrṇa vākyaṃ śrutvā tadottamam//
mahalliṃgaṃ mayā dṛṣṭaṃ(?) kapālakarasaṃsthitam

mama hastāttadā viprāḥ kapālamapatadbhuvi //
kapāleśvaradevo'yamiti nāma mayā kṛtam

paśyaṃtu viprāstaṃ devaṃ kapāleśvarasaṃjña kam //
yasya darśanamātreṇa niṣkalaṃkā bhaviṣyatha

liṃgaṃ dṛṣṭaṃ tadā taistu kapālairbahubhivṛtam //
kṛtārthāste tadā jātāstasya liṃgasya darśanāt

ato'sau bhuvi vikhyātaḥ kapāleśvarasaṃjñakaḥ //
ye'rcayanti mahādevi kapāleśvarasaṃjñakam

kṛtapuṇyā narā devi te yāṃti paramaṃ padam //
kṛtvāpi pātakaṃ ghoraṃ brahmahatyādikaṃ naraḥ

tatpāpaṃ vilayaṃ yāti liṃgasyāsya ca darśanāt //
karmaṇā manasā vācā yatpāpaṃ samupārjitam //
tatkṣapayati devo'yaṃ caturddaśyāṃ samarcitaḥ

prasaṃgādapi ye pūjāṃ kariṣyaṃti varānane //
te'pi kāmānavāpsyaṃti yāṃśca kāṃścitsudurlabhān //
aiśvaryadharmamatulaṃ dīrghamāyurarogatām

niḥsapatnatvamatulaṃ yaccānyattadavāpnuyāt //
atīva pāpino ye ca krūrakarmaratā narāḥ

vipāpmāno bhaviṣyaṃti gaṇeśāśca mama priye //
niyamena prapaśyaṃti ye devaṃ vatsaraṃ priye //
te paśyaṃti tanuṃ tyaktvā madīyaṃ bhavanaṃ priyam

eṣa te kathito devi prabhāvaḥ pāpanāśanaḥ //
kapāleśvaradevasya svargadvāreśvaraṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṃgamāhātmye kapāleśvaramāhātmyavarṇanaṃnāmāṣṭamo'dhyāyaḥ