Skanda Purana · Chapter 5.79

// śrīmahādeva uvāca // //
ekonāśītikaṃ viddhi hanumatkeśvaraṃ priye //
yasya darśanamātreṇa samīhitaphalaṃ labhet

prāptarājyasya rāmasya rākṣasānāṃ vadhe kṛte //
āgatā munayo devi rāghavaṃ pratinaṃditum

rāmeṇa pūjitāḥ sarve hyagastipramukhā dvijāḥ //
prahṛṣṭamanaso viprā rāmaṃ vacanamabruvan

diṣṭyā tu nihato rāma rāvaṇaḥ putrapautravān //
diṣṭyā vijayinaṃ tvā'dya paśyāmaḥ saha bhāryayā

hanūmatā ca sahitaṃ vānareṇa mahātmanā //
diṣṭyā pavanaputreṇa rākṣasāṃtakareṇa ca

ciraṃ jīvatu dīrghāyurvānaro hanumānsadā //
aṃjanīgarbhasaṃbhūto rudrāṃśo hi dharātale

ākhaṃḍalo'gnirbhagavānyamo vai niṛtistathā //
varuṇaḥ pavanaścaiva dhanādhyakṣastathā śivaḥ //
brahmaṇā sahitāścaiva dikpālāḥ pātu sarvadā

śrutvā teṣāṃ tu vacanaṃ munīnāṃ bhāvitātmanām //
vismayaṃ paramaṃ gatvā rāmaḥ prāṃjalirabravīt

kimarthaṃ lakṣmaṇaṃ tyaktvā vānaro'yaṃ praśaṃsitaḥ //
kīdṛśaḥ kiṃprabhāvo vā kiṃvīryaḥ kiṃparākramaḥ

athocuḥ satyamevaitatkāraṇaṃ vānarottame //
na tvasya sadṛśo vīrye vidyate bhuvanatraye

eṣa deva mahāprājño yojanānāṃ śataṃ plutaḥ //
dharṣayitvā purīṃ laṃkāṃ rāvaṇāṃtaḥpuraṃ gataḥ

prādeśamātrapratimaṃ kṛtaṃ rūpamanena vai //
dṛṣṭā saṃbhāṣitā sītā pṛṣṭā viśvāsitā tathā

senāgragā maṃtriputrāḥ kiṃkarā rāvaṇātmajāḥ //
hatā hanumatā tatra tāḍitā rāvaṇālaye

bhūyo bandhavimuktena saṃbhāṣya tu daśānanam //
laṃkā bhasmīkṛtā tena pātakeneva medinī

na kālasya na śakrasya na viṣṇorvedhaso'pi vā //
śrūyaṃte tāni karmāṇi yādṛśāni hanūmataḥ

///
// rāma uvāca // //
etasya bāhuvīryeṇa laṃkā sītā ca lakṣmaṇaḥ //
prāpto mama jayaścaiva rājyaṃ mitrāṇi bāndhavāḥ

sakhāyaṃ vānarapatirmuktvainaṃ haripuṃgavam //
pravṛttimapi ko vettuṃ jānakyāḥ śaktimānbhavet

vālī kimarthametena sugrīvapriyakāmyayā //
tadā vaire samutpanne na dagdhastṛṇavatkatham

nāyaṃ viditavānmanye hanumānātmano balam //
upekṣitaḥ kliśyimāne kimarthaṃ vānarādhipe

evaṃ bruvāṇaṃ rāmaṃ tu munayo vākyamabruvan //
satyametadraghuśreṣṭha yadbravīṣi hanūmataḥ

na bale vidyate tulyo na gatau na matāvapi //
amoghavākyaiḥ śāpastu datto'sya munibhiḥ purā

na jñātaṃ hi balaṃ yena balinā vālimardane //
bālye'pyanena yatkarma kṛtaṃ nāma mahātmanā

tanna varṇayituṃ śakyametasya tu balaṃ mahat //
yadi śrotuṃ tavecchāsti niśāmaya vadāmahe

asau hi jātamātro'pi bālārka iva mūrttimān //
grahītukāmo bālārkaṃ puplāvāṃbaramadhyataḥ

tūrṇamādhāvato rāma śakreṇa viditātmanā //
hanustenāsya sahasā kuliśenaiva tāḍitaḥ

tato girau papātaiṣa śakravajrābhitāḍitaḥ //
patatosya mahāvegādvāmo hanurabhajyata //
asmiṃstu patite bāle mṛtakalpe'śanikṣatāt

tato vāyuḥ samādāya mahā kālavanaṃ gataḥ //
liṃgamārādhayāmāsa putrārthaṃ pavanastadā

spṛṣṭamātrastu liṃgena samuttasthau plavaṃgamaḥ //
jalasiktaṃ yathā sasyaṃ punarjīvi tamāptavān

prāṇavaṃtamimaṃ dṛṣṭvā pavano harṣitastadā //
pratyuvāca prasannātmā putramādāya satvaram

sparśanādasya liṃgasya mama putraḥ samutthitaḥ //
hanumatkeśvaro devo vikhyāto'yaṃ bhaviṣyati

etasminnaṃtare śakraḥ samāyātaḥ surairvṛtaḥ //
nīlotpalamayīṃ mālāṃ saṃpragṛhyedamabravīt

matkarotsṛṣṭavajreṇa yasmādasyahanurhataḥ //
tadeṣa kapiśārdūlo hanumāṃstu bhaviṣyati

varuṇo'sva varaṃ prādānnāsya mṛtyurbhaviṣyati //
yamo daṃḍādavadhyatvamārogyaṃ dhanado dadau

sūryeṇa ca prabhā dattā pavanena gatirdrutā //
liṃgena ca varo datto devānāṃ saṃnidhau tadā

āyudhānāṃ hi sarveṣāmavadhyo'yaṃ bhaviṣyati //
ajaraścāmaraścaiva bhaviṣyati na saṃśayaḥ

amitrabhayado hyeṣa mitrāṇāmabhaya pradaḥ //
ajeyo bhavitā yuddhe liṃgenoktaṃ punaḥpunaḥ

śatrorbalotsādanāya rāghavaprītaye sadā //
kiyatkālaṃ balaṃ svīyaṃ na smariṣyati śāpataḥ

hate tu rāvaṇe bhūyo rāmasyānumate sthitaḥ //
vibhīṣaṇaṃ prārthayitvā māmatra sthāpayiṣyati

tato māṃ tridaśāḥ sarve pūjayiṣyaṃti bhāvitāḥ //
tenaiva nāmnā vikhyātiṃ punaryāsyāmi bhūtale

atha gaṃdhavahaḥ putraṃ pragṛhya gṛhamānayat //
aṃjanāyai tadācakhyau varalabdhiṃ ca liṃgataḥ

evaṃ liṃgaprabhāvācca balavānmārutātmajaḥ //
sa jātastriṣulokeṣu rāma tasmātpraśasyate

parākramotsāhamati pratāpaiḥ sauśīlyamādhuryanayādikaiśca //
gāṃbhīryacāturyasuvīryadhairyairhanūmataḥ ko'bhyadhiko'sti loke

mameva vikṣobhitasāgarasya lokāndi dhakṣoriva pāvakasya //
prajā jihīrṣoriva cātakasya hanūmataḥ sthāsyati kaḥ purastāt

etadvai kathita tubhyaṃ yanmāṃ tvaṃ pari pṛcchasi //
hanūmato'sya bālasya karmāṇyadbhutavikrama

dṛṣṭaḥ sabhājitaścāpi rāma gacchāmahe vayam //
evamuktvā gatāḥ sarve munayo'vaṃtimaṇḍalam //
pūjayāmāsurīśānaṃ hanumatkeśvaraṃ śivam // //
samarcayaṃti ye bhaktyā liṃgaṃ tridaśapūjitam //
hanumatkeśvaraṃ devaṃ te kṛtārthāḥ kalau yuge

vrajaṃtyeva suduṣprāpyaṃ brahmasāyujyamavyayam/
saṃprāpya tu punarjanma labhaṃte mokṣamavyayam

yaḥ paśyati naro liṃgaṃ hanumatkeśvaraॆ priya //
so'dhikaṃ phalamāpnoti sarvaduḥkhavivarjitaḥ

sarvalokeṣu tasyaiva gatirna pratihanyate //
divyenaiśvaryayogena yujyate nātra saṃśayaḥ

bālasūryapratīkāśavimānena suvarcasā //
vṛtaḥ strīṇāṃ sahasraistu svacchadagamanāgamaḥ

vicaratyavicāreṇa sarvalokāndivaukasām //
spṛhaṇīyatamaḥ puṃsāṃ sarvavarṇottamodhunā

svargāccyutaḥ prajāyeta kule mahati rūpavān //
dharmajño rudrabhaktaśca sarvavidyārthapāragaḥ

rājā vā rājatulyo vā darśanādasya jāyate //
sparśanātparamaṃ puṇyaṃ yajanātparamaṃ padam

eṣa te kathito devi prabhāvaḥ pāpanāśanaḥ //
hanumatkeśvareśasya svapneśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvantyakhaṇḍe caturaśītiliṃgamāhātmya umāmaheśvarasaṃvāde hanumatkeśvaramāhātmyavarṇanaṃnāmaikonāśītitamo'dhyāyaḥ