Scripture Library

Skanda Purana · Verses 5.78-2

5.78-2.78.1

śrīmārkaṇḍeya uvāca -
tato gacchettu rājendra naradeśvaramuttamam /
tīrthānāṃ paramaṃ tīrthaṃ nirmitaṃ nāradena tu

5.78-2.78.2

yudhiṣṭhira uvāca -
nāradena muniśreṣṭha kasmāttīrthaṃ vinirmitam /
etadākhyāhi me sarvaṃ prasanno yadi sattama

5.78-2.78.3

śrīmārkaṇḍeya uvāca -
parameṣṭhisutaḥ pārtha nārado munisattamaḥ /
revāyāścottare kūle tapastena purā kṛtam

5.78-2.78.4

navanāḍīnirodhena kāṣṭhāvatyāṃ gatena ca /
toṣitaḥ paśubhartā vai nāradena yudhiṣṭhira

5.78-2.78.5

īśvara uvāca -
tuṣṭo'haṃ tava viprendra yoginātha ayonija /
varaṃ prārthaya me vatsa yaste manasi vartate

5.78-2.78.6

nārada uvāca -
tvatprasādena me śambho yogaścaiva prasidhyatu /
acalā te bhavedbhaktiḥ sarvakālaṃ mamaiva tu

5.78-2.78.7

svecchācārī bhave deva vedavedāṅgapāragaḥ /
trikālajño jagannātha gītajño'haṃ sadā bhave

5.78-2.78.8

dine dine yathā yuddhaṃ devadānavamānuṣaiḥ /
pātāle martyaloke vā svarge vāpi maheśvara

5.78-2.78.9

paśyeyaṃ tvatprasādena bhavantaṃ pārvatīṃ tathā /
tīrthaṃ lokeṣu vikhyātaṃ sarvapāpakṣayaṃkaram

5.78-2.78.10

īśvara uvāca -
evaṃ nārada sarvaṃ tu bhaviṣyati na saṃśayaḥ /
cintitaṃ matprasādena sidhyate nātra saṃśayaḥ

5.78-2.78.11

svecchācāro bhavervatsa svarge pātālagocare /
martye vā bhrama vai yoginna kenāpi nivāryase

5.78-2.78.12

sapta svarāstrayo grāmā mūrcchanāścaikaviṃśatiḥ /
tānā ekonapañcāśatprasādānme tava dhruvam

5.78-2.78.13

mama priyaṃkaraṃ divyaṃ nṛtyagītaṃ bhaviṣyati /
kaliṃ ca paśyase nityaṃ devadānavakinnaraiḥ

5.78-2.78.14

tvattīrthaṃ bhūtale puṇyaṃ matprasādādbhaviṣyati /
vedavedāṅgatattvajño hyaśeṣajñānakovidaḥ /
ekastvamasi niḥsaṅgo matprasādena nārada

5.78-2.78.15

ityuktvāntardadhe devo nāradastatra śūlinam /
sthāpayāmāsa rājendra sarvasattvopakārakam

5.78-2.78.16

pṛthivyāmuttamaṃ tīrthaṃ nirmitaṃ nāradena tu /
tatra tīrthe nṛpaśreṣṭha yo gacchedvijitendriyaḥ

5.78-2.78.17

māsi bhādrapade pārtha kṛṣṇapakṣe caturdaśī /
upoṣya parayā bhaktyā rātrau kurvīta jāgaram

5.78-2.78.18

chatraṃ tatra pradātavyaṃ brāhmaṇe śubhalakṣaṇe /
śastreṇa tu hatā ye vai teṣāṃ śrāddhaṃ pradāpayet /
te yānti paramaṃ lokaṃ piṇḍadānaprabhāvataḥ

5.78-2.78.19

kapilā tatra dātavyā pitḥnuddiśya bhārata /
ityuccārya dvije deyā yāntu te paramāṃ gatim

5.78-2.78.20

asya śrāddhasya bhāvena brāhmaṇasya prasādataḥ /
narmadātoyabhāvena nyāyārjitadhanasya ca /
teṣāṃ caiva prabhāvena pretā yāntu parāṃ gatim

5.78-2.78.21

ityuccārya dvije deyā dakṣiṇā ca svaśaktitaḥ /
haviṣyānnaṃ viśālākṣa dvijānāṃ caiva dāpayet

5.78-2.78.22

dīpaṃ bhaktyā pradātavyaṃ nṛtyaṃ gītaṃ ca kārayet /
avāptaṃ tena vai sarvaṃ yaḥ karotīśvarālaye

5.78-2.78.23

sa yāti rudrasāṃnidhyamiti rudraḥ svayaṃ jagau /
vidyādānena caikena akṣayāṃ gatimāpnuyāt

5.78-2.78.24

dhūrvahāstatra dātavyā bhūmiḥ sasyavatī nṛpa /
citrabhānuṃ śubhairmantraiḥ prīṇayettatra bhaktitaḥ

5.78-2.78.25

ājyena suprabhūtena homadravyeṇa bhārata /
ye yajanti sadā bhaktyā trikālaṃ nṛtyameva ca

5.78-2.78.26

tīrthe nāradanāmākhye revāyāścottare taṭe /
citrabhānumukhā devāḥ sarvadevamaya ṛṣiḥ

5.78-2.78.27

ṛṣiṇā prīṇitāḥ sarve tasmātprītyo hutāśanaḥ /
pūjite havyavāhe tu dāridryaṃ naiva jāyate

5.78-2.78.28

dhanena vipulā prītirjāyate pratijanmani /
kulīnāśca suveṣāśca sarvakālaṃ dhanena tu

5.78-2.78.29

plavo nadīnāṃ patiraṅganānāṃ rājā ca sadvṛttarataḥ prajānām /
dhanaṃ narāṇāmṛtavastarūṇāṃ gataṃ gataṃ yauvanamānayanti

5.78-2.78.30

dhanadatvaṃ dhaneśena tasmiṃstīrthe hyupārjitam /
yamena ca yamatvaṃ hi indratvaṃ caiva vajriṇā

5.78-2.78.31

anyairapi mahīpālaiḥ pārthivatvamupārjitam /
nāradeśvaramāhātmyāddhruvo niścalatāṃ gataḥ

5.78-2.78.32

sarvatīrthavaraṃ tīrthaṃ nirmitaṃ nāradena tu /
pṛthivyāṃ sāgarāntāyāṃ revāyāścottare taṭe /
tadvaraṃ sarvatīrthānāṃ mahāpātakanāśanam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nāradeśvaratīrthamāhātmyavarṇanaṃ nāmāṣṭasaptatitamo'dhyāyaḥ //

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0