Skanda Purana · Verses 5.79-2

śrīmārkaṇḍeya uvāca -
tato gacchettu rājendra tīrthadvayamanuttamam /
dadhiskandaṃ madhuskandaṃ sarvapāpakṣayaṃkaram

dadhiskande naraḥ snātvā yastu dadyāddvije dadhi /
upatiṣṭhettatastasya saptajanmani bhārata

na vyādhirna jarā tasya na śoko naiva matsaraḥ /
daśacandraśataṃ yāvajjāyate vimale kule

madhuskande'pi madhunā miśritānyastilāndadet /
nāsau vaivasvataṃ devaṃ paśyedvai janmasaptatim

madhunā saha sammiśraṃ piṇḍaṃ yastu pradāpayet /
tasya pautraprapautrebhyo dāridryaṃ naiva jāyate

dadhibhiḥ saha saṃmiśraṃ piṇḍaṃ yastu pradāpayet /
tasmiṃstīrthe naraḥ snātvā vidhivaddakṣiṇāmukhaḥ

pitā pitāmahaścaiva tathaiva prapitāmahaḥ /
dvādaśābdāni tuṣyanti nātra kāryā vicāraṇā

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dadhiskandamadhuskandatīrthamāhātmyavarṇanaṃ nāmaikonāśītitamo'dhyāyaḥ //