Skanda Purana · Verses 5.74-2

śrīmārkaṇḍeya uvāca -
revāyā uttare kūle tīrthaṃ paramaśobhanam /
sarvapāpaharaṃ martye nāmnā vai gautameśvaram

sthāpitaṃ gautamenaiva lokānāṃ hitakāmyayā /
svargasopānarūpaṃ tu tīrthaṃ puṃsāṃ yudhiṣṭhira

tatra gaccha paraṃ bhaktyā yatra devo jagadguruḥ /
pātakasya vināśārthaṃ svargavāsapradastathā

saubhāgyavarddhanaṃ tīrthaṃ jayadaṃ duḥkhanāśanam /
piṇḍadānena caikena kulānāmuddharettrayam

yatkiṃciddīyate bhaktyā svalpaṃ vā yadi vā bahu /
tatsarvaṃ śatasāhasramājñayā gautamasya hi

tīrthānāṃ paramaṃ tīrthaṃ svayaṃ rudreṇa bhāṣitam

// iti śrīskānde mahāpurāṇa ekāśītisāhasryāṃ saṃhitāyāṃ pañcamāvantyakhaṇḍe revākhaṇḍe gautameśvaratīrthamāhātmyavarṇanaṃ nāma catuḥsaptatitamo'dhyāyaḥ //