Skanda Purana · Chapter 5.75

//īśvara uvāca // //
pañcasaptatikaṃ devaṃ vaḍaleśvarasaṃjñakam//
viddhi pāpaharaṃ devi darśanātkāmadaṃ nṛṇām

dhanadasya sakhā devi maṇibhadro babhūva ha //
īrṣyāprabhāvastatputro vaḍalonāma kopanaḥ

rūpavānsarvadā kāmī sadā matto balādhikaḥ //
kadācitsa gato ramyāṃ nalinīṃ dhanadasya ca

ratyarthaṃ kāmasevārthaṃ guptāṃ rahasi nirmitām //
dadarśa kusumaiśchannāṃ vajravaiḍūryabhūṣitām

tāṃ vai vidrumasaṃchannāṃ muktādāmavirā jitām //
suramyāṃ vipulacchāyāṃ svarṇapaṃkajaśobhitām

kuberabhavanābhyāśe vallabhāṃ dhanadasya ca //
ākrīḍaṃ rājarājasya kuberasya mahā tmanaḥ

rākṣasaiḥ kiṃnaraiścaiva guptāṃ khaṅgadharaiḥ sadā //
tāṃ dṛṣṭvā paramaprīto babhūva vaḍalastadā

priyayā sahito reme sthāne gupte manohare //
reme ramaṇakairyogairanaṃgena vaśīkṛtaḥ

tatra guptā raṇe śūrā rākṣasā raṇakovidāḥ //
rakṣaṃti śatasāhasraṃ sarvāyudhaparicchadāḥ

te tu dṛṣṭvaiva vaḍalaṃ maṇibhadrasutaṃ priye //
bhakṣyaiḥ saṃpūritamukhaṃ divyacandanabhūṣitam

ketakīgarbhapatrābhairdaṃtairdivyatarānanam //
yuddhārthe baddhanistriṃśaṃ śaktiyuktamariṃdamam

bhāryāsahāyamunmattaṃ paryaṃke ca sthitaṃ sadā //
ratyarthamāgataṃ jñātvā anyonyamabhicukruśuḥ

mā vīrānena mārgeṇa sabhāryo gantumarhasi //
ākrīḍo'yaṃ kuberasya dhanadasya mahātmanaḥ

devā devarṣayo yakṣā gandharvāḥ kiṃnarāstathā //
āmantrya yakṣapravaraṃ viharaṃti ramaṃti ca

neha śakyaṃ vinādeśādvihartuṃ krīḍituṃ ciram//
bhrātrāmātyena suhṛdā kenāpi ca sutena ca

yenakenacidanyāyādavamanya dhaneśvaram //
vihāraḥ kriyate darpātsa vinaśyedasaṃśayam

evaṃ sa rākṣasairghorairvaḍalo vinivāritaḥ //
mā maivamiti sakrodhaṃ bhartsayadbhiḥ samaṃtataḥ

kadarthīkṛtya tu sa tānrākṣasānbhīmavikramaḥ //
vyagāhata mahātejāste sarve taṃ nyavārayan

gṛhṇīta badhnīta nikṛntatainaṃ pibāma khādāma ca vṛttahīnam //
kruddhā bruvaṃto hyapatandrutaṃ te śastrāṇi codyamya vivṛttanetrāḥ

tataḥ sa gurvīṃ yamadaṇḍakalpāṃ mahāgadāṃ kāṃcanapaṭṭanaddhām //
pragṛhya tāmabhyapatattarasvī tato'bravīttiṣṭhata tiṣṭhateti

te tasya vīryaṃ ca valaṃ ca dṛṣṭvā vidyābalaṃ bāhubalaṃ tathaiva //
na śaknuvaṃtaḥ sahituṃ sametā hatāḥ pravīrāḥ sahasā nivṛttāḥ

vidāryamāṇāstata eva tūrṇamākāśamāsthāya vimūḍhasaṃjñāḥ //
kailāsaśṛṃgāṇyabhi dudruvuste yakṣārditā rakṣapālāḥ prabhagnāḥ

sa śakravaddānavadaityasaṃghānvikramya jitvā madanābhitaptaḥ //
vigāhya tāṃ puṣkariṇīṃ samarthaḥ kāmaṃ sa cikrīḍati yakṣaputraḥ

tatastu te rakṣapālāḥ sametya dhaneśvaraṃ vai vaḍalena nunnāḥ //
yakṣasya dhairyaṃ subalaṃ ca saṃkhye yathāvadācakhyuratīva bhītāḥ //

teṣāṃ tu vacanaṃ śrutvā maṇibhadro mahāyaśāḥ //
śaśāpa putraṃ dayitaṃ vaḍalaṃ prabhukāraṇāt

yasmātsā nalinī ramyā sevitā vaḍalena tu//
dayitā dhanadasyāpi yathā mātā tathaiva sā

tasmātputro madīyastu sarvabhāgavivarjitaḥ//
paṃgvandho badhiro dīnaḥ kṣayarogamavāpsyati//

iti śaptastadā jāto vaḍalo bhogavarjitaḥ //
patito bhūtale caiva tasminsthāne gato'pi san

pīḍitaḥ kṣayarogeṇa na śaśāka viceṣṭitum //
andho'tha badhiro jāto guruśāpahatastadā

ciṃtayāmāsa sahasā śāpamatyadbhutaṃ mahat //
śapto'haṃ kena sahasā jīvanyonyaṃtaraṃ gataḥ

kathaṃ śapto'smi tātena maṇibhadreṇa vallabhaḥ //
putro yuvā ca śūraśca śatrupakṣakṣayaṃkaraḥ

dhanyo'sau maṇibhadro'pi mattāto yena bhūtale //
prabhubhaktyā nijaḥ putraḥ śaptastyaktaśca tatkṣaṇāt

vaḍalena punaḥ proktaṃ dhanyo'haṃ prabhukāraṇāt//
utsavo nidhanaṃnāma bhartṛpiṇḍopajīvinām

anyāyena yathākāmaṃ prārabdhaḥ saṃcitaściram//
tenāhaṃ śāpatāṃ prāpto yāsyāmi narakaṃ dhruvam

evaṃ vilapatastasya vaḍalasya varānane //
ājagāma tamuddeśaṃ maṇibhadro mahābalaḥ //
dadarśa putraṃ paṃgvaṃdhaṃ kṣayarogaprapīḍitam

niḥśvasaṃtaṃ suduḥkhārttaṃ vila paṃtaṃ punaḥpunaḥ //
pratyuvāca sutaṃ yakṣo maṇibhadro'tiduḥkhitaḥ //
mayā kupitrā hā vatsa śaptastvaṃ prabhukāraṇāt

tvayeyaṃ nalinī ramyā dhana dasyātivallabhā //
sevitā kāmataptena pravarā rākṣasā hatāḥ

tasmātputra mayā śapto na mithyā sa bhaviṣyati //
prabhurdevaḥ prabhuḥ svāmī prabhurmātā prabhuḥ pitā

svāmyarthe yaḥ priyānprāṇānparityajati saṃgare //
sa yāti paramaṃ sthānaṃ brahmalokaṃ sanātanam

na mantrasādhyaḥ śāpoyaṃ nauṣadhena vratena ca //
niyamena ca dānena tasmānmadvacanaṃ kuru

mayā śrutaṃ śakraloke purāṇaṃ skaṃdakīrttitam //
bruvato nāradasyaiva devānāṃ saṃnidhau purā

prabhāvo varṇitastena mahākālavanasya ca //
kṣetre hyasminmahāliṃgaṃ svargadvārasya dakṣiṇe

vidyate vyādhiśamanaṃ rūpasaubhāgyadāyakam //
tatrāhaṃ tvāṃ ca neṣyāmi vimānenāśugāminā

ityuktvā maṇibhadreṇa samānītaḥ sutastadā //
yatra devādhidevo'sau svargadvārasya dakṣiṇe

sparśanāttasya liṃgasya cakṣuṣmānrūpavānbalī //
supādaḥ śrutisaṃyuktastatkṣaṇādabhavattadā

dṛṣṭvā sumahadāścaryaṃ maṇibhadreṇa pārvati//
kṛtaṃ nāma suhṛṣṭena svīyaputrasya nāmataḥ//
cakṣuṣmānvaḍalo jāto liṃgasyāsya prabhāvataḥ

adyaprabhṛti devo'yaṃ vaḍaleśvarasaṃjñakaḥ//
bhaviṣyati trilokeṣu vikhyāto netradāyakaḥ

pūjayiṣyaṃti ye devaṃ vaḍaleśvarasaṃjñakam//
liṃgaṃ lokeṣu vikhyātaṃ te prāpsyaṃti manoratham

dṛṣṭo harati pāpāni spṛṣṭo rājyaṃ prayacchati//
arcito bhaktibhāvena mokṣaṃ dadyānna saṃśayaḥ

kārttike śuklapakṣasya tithirvai dvādaśī bhavet //
tasyāṃ ye pūjayiṣyaṃti vaḍaleśvarasaṃjñakam

dānaṃ taiḥ satataṃ dattaṃ te yāṃti paramaṃ padam //
prayāge ca prabhāse ca gaṃgāsāgarasaṃgame

tapastaptaṃ bhavettaistu te muktā nātra saṃśayaḥ //
garbhavāse na jāyaṃte sarvasaukhyasamanvitāḥ

gāṇapatyā bhaviṣyaṃti śaṃkarasya sadā priyāḥ //
saubhāgyarūpasaṃpannāḥ putrapautraiśca saṃyutāḥ //
jāyaṃte mānavā loke vaḍaleśvaradarśanāt

garbhavāse mahākaṣṭe yasya vāso na rocate //
so'bhyarcayatu bhāvena vaḍaleśvaramīśvaram

na liṃgena vinā siddhirdurlabhaṃ paramaṃ padam //
gatirna jāyate svarge yāvalliṃgaṃ tu nārcayet

liṃgārcana vihīnānāṃ siddhiścāpi sudurlabhā //
mama putreṇa saṃprāptamīpsitaṃ liṃgato yataḥ

ityuktvā maṇibhadro'pi sutena sahito yayau //
yatra devo dhanādhyakṣaḥ sthānaṃ svaṃ paramaṃ gataḥ

eṣa te kathito devi prabhāvaḥ pāpanāśanaḥ //
vaḍaleśvaradevasya śrūyatāmaruṇeśvaram

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmya umāmaheśvarasaṃvāde vaḍaleśvaramāhātmyavarṇanaṃ nāma paṃcasaptatitamo'dhyāyaḥ