Skanda Purana · Verses 5.7-2

// śrīmahādeva uvāca // //
triviṣṭapeśvaraṃ devi saptamaṃ parvatātmaje //
yasya darśanamātreṇa labhyate tattriviṣṭapam

purā vārāhakalpe tu devarṣirnārado'malaḥ //
triviṣṭapaṃ gato devi draṣṭukāmaḥ śatakratum

tatrodyānavane ramye kalpavṛkṣairvirājite //
sarvatra kusumāmodasukhasparśānilākule

vīṇāveṇuravairghuṣṭe devagaṃdharvasevite //
vajreṃdranīlavaidūryacaṃdrakāṃtādidīpite

brahmalokādibhirlokairanaupamyaguṇe śubhe //
dadarśa tatra deveśamupaviṣṭaṃ śatakratum //
stūyamānaṃ mudā devaiḥ si ddhacāraṇakinnaraiḥ

pṛṣṭastu nārado devi vāsavena mahāmuniḥ //
kathayāmāsa māhātmyaṃ mahākālavanasya ca

mahākālavanaṃ ramyaṃ sadānaṃdakaraṃ śubham //
sevyaṃ puṇyaṃ pavitraṃ ca tīrthānāmuttamottamam

puṇyaṃ paśyaṃti ye lokā mahākālavanaṃ śubham //
brahmahatyādikaṃ pāpaṃ teṣāṃ naśyati niści tam

svayaṃ tiṣṭhati devo'tra sarvabhūtagaṇairvṛtaḥ //
tasmāttattīrthamukhyānāṃ pravaraṃ kathyate budhaiḥ

pṛthivyāṃ naimiṣaṃ puṇyaṃ sarvapāpapraṇāśanam //
tasmāddaśaguṇaṃ proktaṃ puṣkaraṃ tīrthamuttamam

tato daśaguṇaṃ proktaṃ prayāgaṃ sarvakāmikam //
tasmāddaśaguṇaṃ proktaṃ vikhyātamamareśvaram

prācī sarasvatī puṇyā tasmāddaśaguṇā smṛtā //
tasmādaśaguṇaṃ proktaṃ gayākūpaṃ viśiṣyate

tasmāddaśaguṇaṃ devi kurukṣetraṃ viśiṣyate //
kurukṣetrāddaśaguṇā puṇyā vārāṇasī tathā

tasyā daśaguṇaṃ śreṣṭhaṃ mahākālaṃ viśiṣyate //
mahākālavanaṃ śakra kila trailokyabhūṣaṇam

ṣaṣṭi koṭisahasrāṇi ṣaṣṭikoṭiśatāni ca //
liṃgāni tatra vidyaṃte bhuktimuktikarāṇi ca

śaktayo nava koṭyastu tasminkṣetre vasanti hi

kṛmikīṭapataṃgāśca mṛtā yatra tataḥ kratau //
yāṃti divyairvimānaiśca rudralokaṃ sanātanam //
māhātmyamadbhutaṃ śrutvā nāradātsurasattamaḥ

sarvadeva gaṇaiḥ sārddhamājagāma tvarānvitaḥ //
vāsavaḥ śrīmahākālavanaṃ harṣasamanvitaḥ // १- //
dṛṣṭvā tathāvidhaṃ ramyaṃ mahākālavanaṃ śubham //
triviṣṭapādapyadhikaṃ pralaye'pyakṣayaṃ smṛtam

vicitrāṇi ca harmyāṇi kāṃcanāni śubhāni ca //
prāsādāḥ śataśo bhaumamaṇividrumabhūṣitāḥ

vajreṃdranīlaracitāḥ śuddhasphaṭikasaṃnibhāḥ //
toraṇāni vicitrāṇi māṇikyaracitāni ca //
dṛṣṭvā tathāvidhaṃ ramyaṃ mahākālavanottamam

nāradaṃ praśaśaṃsuste sarve devā mudānvitāḥ //
devarṣīṇāṃ mahāprājñā yeneyaṃ kathitā kathā

na kailāsaṃ gamiṣyāmo na ca meruṃ tathāvidham //
na maṃdaraṃ gamiṣyāmo na yāsyāmastriviṣṭapam

eṣāmarāvatī śreṣṭhā hyeṣā bhogavatī śubhā //
eṣā paitāmaho loko viṣṇulokastathaiva ca

etasminnaṃtare devi śūnyaṃ jātaṃ triviṣṭapam //
jñātvā śūnyamathātmānaṃ ciṃtayitvā punaḥpunaḥ //
gamanāya matiṃ cakre kṛtvā dehamathātmanaḥ

tyaktvā māṃ tridaśāḥ sarve mahākālavanaṃ gatāḥ//
ahaṃ tatraiva yāsyāmi yatra te tridaśā gatāḥ

ityuktvā tatkṣaṇaṃ prāpto mahākālavanottame //
kautukātso'tha vai śreṣṭhaṃ tīrthaṃ tatrāpi bhūtale //
dadarśa ramaṇīyaṃ tairdevaiḥ parivṛtaṃ tadā

etasminneva kāle tu vāguvācāśarīriṇī //
bhobhostriviṣṭapātraiva svanāmnā sthāpayasva mām //
karkoṭakasya pūrve tu mahāmāyāśca dakṣiṇe

ityukto devadevena hṛṣṭastadgatacetasā //
svanāmnā sthāpayāmāsa devaṃ triviṣṭapeśvaram

pūjayitvā śubhaiḥ puṣpairuvācedaṃ varānane //
adyaprabhṛti bhūrloko nāmnā khyātiṃ gamiṣyati

ye tvāṃ paśyaṃti yatnena api duṣkṛta kāriṇaḥ //
te yāsyaṃti paraṃ sthānaṃ divyālaṃkārabhūṣitāḥ

aṣṭamyāṃ ca caturddaśyāṃ saṃkrāṃtau vā viśeṣataḥ //
yaḥ kariṣyati pūjāṃ ca bhaktiyukto hi mānavaḥ

vimānavaramāsthāya kāmagaṃ ratnabhūṣitam //
uditādityasaṃkāśaṃ matsamīpe vasiṣyati

kiṃ dānairvividhairdattaiḥ kiṃ yajñairvividhaiḥ kṛtaiḥ //
te prāpsyaṃti phalaṃ sarvaṃ ye tvāṃ drakṣyaṃti bhaktitaḥ

yaṃyaṃ kāmamabhidhyāya pūjayiṣyaṃti mānavāḥ //
tattanmanorathaprāptirbhaviṣyati na saṃśayaḥ

tridaśaiśca punaḥ proktaṃ dṛṣṭvā malliṃgamuttamam //
triviṣṭapena dhanyena sthāpitaṃ devamīśvaram

pūjayiṣyaṃti ye dhanyā devaṃ triviṣṭapeśvaram //
teṣāṃ vāso'kṣayo divyo bhaviṣyati triviṣṭape

ityuktvā pūjayāmāsa bhūyo liṃgaṃ triviṣṭapam //
sārddhaṃ triviṣṭapenaiva punaḥ sthānaṃ svakaṃ gataḥ

eṣa te kathito devi prabhāvaḥ pāpanāśanaḥ //
śravaṇātkīrttanādvāpi svargaloko'kṣayo bhavet

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye triviṣṭapeśvaramāhātmyavarṇanaṃnāma saptamo 'dhyāyaḥ