Scripture Library

Skanda Purana · Verses 5.7-3

5.7-3.7.1

śrīmārkaṇḍeya uvāca -
punarekārṇave ghore naṣṭe sthāvarajaṃgame /
salilenāplute loke nirāloke tamodbhave

5.7-3.7.2

brahmaiko vicaraṃstatra tamībhūte mahārṇave /
divyavarṣasahasraṃ tu khadyota iva rūpavān

5.7-3.7.3

śete yojanasāhasramaprameyamanuttamam /
dvādaśādityasaṃkāśaṃ sahasracaraṇekṣaṇam

5.7-3.7.4

prasuptaṃ cārṇave ghore hyapaśyatkūrmarūpiṇam /
taṃ dṛṣṭvā vismayāpanno brahmā bodhayate śanaiḥ

5.7-3.7.5

stutibhirmaṃgalaiścaiva vedavedāṃgasaṃbhavaiḥ /
vācaspate vibudhyasva mahābhūta namo'stu te

5.7-3.7.6

tavodare jagatsarvaṃ tiṣṭhate parameśvara /
tadvimuñca mahāsattva yatpūrvaṃ saṃhṛtaṃ tvayā

5.7-3.7.7

vyatītā rajanī brāhmī dinaṃ samanuvartate /
nirīkṣya sarvalokeśa yena saṃbhavate jagat

5.7-3.7.8

sa niśamya vacastasya utthitaḥ parameśvaraḥ /
samudgiran sa lokāṃstrīn grastān kalpakṣaye tadā

5.7-3.7.9

devadānavagandharvāḥ sayakṣoragarākṣasāḥ /
sacandrārkagrahāḥ sarve śarīrāttasya nirgatāḥ

5.7-3.7.10

tato hyekārṇavaṃ sarvaṃ vibhajya parameśvaraḥ /
vistīrṇopalatoyaughāṃ saritsaravivardhitām

5.7-3.7.11

paśyate medinīṃ devaḥ savṛkṣauṣadhipalvalām /
himavantaṃ giriśreṣṭhaṃ śvetaṃ parvatamuttamam

5.7-3.7.12

śṛṅgavantaṃ mahāśailaṃ ye cānye kulaparvatāḥ /
jaṃbudvīpaṃ kuśaṃ krauñcaṃ sagomedaṃ saśālmalam

5.7-3.7.13

puṣkarāntāśca ye dvīpā ye ca saptamahārṇavāḥ /
lokālokaṃ mahāśailaṃ sarvaṃ ca purataḥ sthitam

5.7-3.7.14

catuḥprakṛtisaṃyuktaṃ jagatsthāvarajaṃgamam /
yugānte tu viniṣkrāntamapaśyatsa maheśvaraḥ

5.7-3.7.15

viprakīrṇaśilājālāmapaśyatsa vasuṃdharām /
kūrmapṛṣṭhopagāṃ devīṃ mahārṇavagatāṃ prabhuḥ

5.7-3.7.16

tasmin viśīrṇaśailāgre saritsarovivarjite /
nānātaraṃgabhinnoda āvartodvartasaṃkule

5.7-3.7.17

nānauṣadhiprajvalite nānotpalaśilātale /
nānāvihaṃgasaṃghuṣṭāṃ matsyakūrmasamākulām

5.7-3.7.18

divyamāyāmayīṃ devīmutkṛṣṭāmbudasannibhām /
nadīmapaśyaddeveśo hyanaupamyajalāśayām

5.7-3.7.19

madhye tasyāmbudaśyāmāṃ pīnorujaghanastanīm /
vastrairanupamairdivyairnānābharaṇabhūṣitām

5.7-3.7.20

sanūpuraravoddāmāṃ hārakeyūramaṇḍitām /
tādṛśīṃ narmadāṃ devīṃ svayaṃ strīrūpadhāriṇīm

5.7-3.7.21

yogamāyāmayaiścitrairbhūṣaṇaiḥ svairvibhūṣitām /
avyaktāṅgīṃ mahābhāgāmapaśyatsa tu narmadām

5.7-3.7.22

ardhodyatabhujāṃ bālāṃ padmapatrāyatekṣaṇām /
stuvantīṃ devadeveśamutthitāṃ tu jalāttadā

5.7-3.7.23

vismayāviṣṭahṛdayo hyahamudvīkṣya tāṃ śubhām /
snātvā jale śubhe tasyāḥ stotumabhyudyatastataḥ

5.7-3.7.24

arcayāmāsa saṃhṛṣṭo mantrairvedāṃgasaṃbhavaiḥ /
sṛṣṭaṃ ca tatpurā rājanpaśyeyaṃ sacarācaram

5.7-3.7.25

sadevāsuragandharvaṃ sapannagamahoragam /
paśyāmyeṣā mahābhāgā naiva yātā kṣayaṃ purā

5.7-3.7.26

mahādevaprasādācca taccharīrasamudbhavā /
bhūyo bhūyo mayā dṛṣṭā kathitā te nṛpottama

5.7-3.7.27

prādurbhāvamimaṃ kaurmyaṃ ye'dhīyante dvijottamāḥ /
ye'pi śṛṇvanti vidvāṃso mucyante te'pi kilbiṣaiḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāmāhātmye kūrmakalpasamudbhavo nāma saptamo'dhyāyaḥ //

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0