Skanda Purana · Chapter 5.68

// sanatkumāra uvāca // //
śṛṇu vyāsa mahāpuṇyaṃ tīrthaṃ paramaśobhanam //
devaprayāgamākhyātaṃ sarvapāpapraṇāśanam

devānāṃ ca paraṃ sthānaṃ yatra tīrthaṃ paraṃtapa //
somatīrthottare bhāge prayāgasya ca dakṣiṇe

kṣiprāyāḥ pūrvabhāge ca tatra tīrthaṃ pratiṣṭhitam //
tatra tīrthe naraḥ snātvā paśyeccaiva surottamam

devaṃ mādhavamityākhyaṃ bhuvi sarvaphalapradam //
dadāti tasya deveṃdro vāṃchitārthaṃ jagatpatiḥ

ānaṃdabhairavastatra sarvadevanamaskṛtaḥ //
yasya darśanamātreṇa sarvapāpakṣayo bhavet //

na tasya jāyate vyāsa yātanā bhairavī kadā //
svargadvāre sadā vyāsa jāyate nirbhayaḥ pumān

jyeṣṭhe māse site pakṣe daśamyāṃ budha hastayoḥ //
garānande vyatīpāte kanyācandre vṛṣe ravau //
daśālā jāyate vatsa gaṃgājanma paraṃ śuci

taddine ca naraḥ snātvā sarvatīrthaphalaṃ labhet//
akhaṇḍaṃ ca paraṃ tīrthaṃ śṛṇu vyāsa hyataḥ param

yasya śravaṇamātreṇa vratabhaṃgo na jāyate //
eka eva purā brahmanbrāhmaṇo brahmavittamaḥ

/
dharmaśarmeti vikhyātaḥ sadācārarataḥ śuciḥ //
bahuvratadharo dāṃto vedavedāṃgapāragaḥ

kiṃciddoṣaprasaṃgena vratapūrtirna cābhavat //
evaṃ bahutithe kāle nārado devadarśa naḥ

tasya gehāgato brahmannātithyārthaṃ mahātapāḥ //
tadotthāya dvijo nityaṃ bahumānapuraḥsaram

satkṛtya nāradaṃ bhūmanvidhidṛṣṭena karmaṇā //
pūjayitvā dvijaśreṣṭhaḥ papraccha munisattama

bhagavanbhavatā sarvaṃ viditaṃ jñānacakṣuṣā //
asmākaṃ ca paraṃ doṣaḥ kiṃcijjātaḥ purā'nagha

yena pāpaprasaṃgena vratabhaṃgo'bhavaddhruvam //
kāraṇaṃ brūhi me nātha kiṃ doṣo'tra tu gaṇyate

// nārada uvāca // //
śrūyatāṃ bho dvijaśreṣṭha bhavadbhiśca purākṛtam //
mahārāṣṭre suvikhyāto brāhmaṇo dhanasaṃcakaḥ

brahmadattetyasau vipro vedabrāhmaṇaniṃdakaḥ //
dhanalobhī parākrāṃtaḥ sarvadharmabahirmukhaḥ //

nāstiko devatīrtheṣu paradravyāpahārakaḥ //
parastrīṣu rato nityaṃ dyūtavādī ca taskaraḥ

evamāyuḥparikṣīṇo dhanahīno'bhavattadā //
itastato'bhramadbhraṣṭo nadītīre suvihvalaḥ

gataścauryaprasaṃgena yātrikaiḥ saha saṃgataḥ //
kiṃcitkāleṣu duḥśīlo mṛtiṃ prāpto rujārditaḥ

nītaḥ saṃyaminīṃ viprastatkālaṃ yamakiṃkaraiḥ //
yamarājapuraṃ prāpto bahupāpakaro dvijaḥ

dṛṣṭo'sau dharmarājena tadā patyaparāyaṇaḥ//
nirīkṣya sahasovāca dharmapūrvamidaṃ vacaḥ

śṛṇudhvaṃ kiṃkarāḥ sarve yūyamekāgramānasāḥ //
anenācaritaṃ sarvaṃ duṣkarma sarvakilbiṣam

godātīre mṛtaḥ pāpī tatra naḥ kāraṇaṃ na hi//
tisraḥkoṭyo'rdhakoṭiśca yāni tīrthānyaharniśam

āyāṃti gautamītīre siṃhasthe'pi bṛhaspatau //
teṣāṃ tu vāyusaṃsparśo jātosyāṃte kalevare

tena puṇyaprabhāvena no'smākaṃ kāraṇaṃ kvacit //
grāhyo bhavadbhinaivāyaṃ mucyatāṃ bhoḥ puraḥsarāḥ

evaṃ tairmocito vipraḥ punarbrahmagatiṃ gataḥ //
tena pāpaprasaṃgena vratabhaṃgī gato bhuvi

// brāhmaṇa uvāca // //
brahmankena prakāreṇa sarvapāpakṣayo bhavet //
kiṃ tapaḥ kiṃ ca dānaṃ ca kiṃ tīrthavratasevanam

yena puṇyaprabhāvena vratabhaṃgo na jāyate

// nārada uvāca // //
śṛṇu dvijavaraśreṣṭha mahākālavanaṃ smṛtam //
yatra rudrasaraḥ proktamṛṣiṇā tattvadarśinā

koṭikoṭisutīrthāni vartaṃte dvijasattama//
koṭitīrtheti vikhyātaṃ tasmāddvija sanātanam

tattīrthasyottare bhāge sutīrthaṃ sarvakāmadam //
nāmnā'khaṃḍasaraḥ khyātamakhaṃḍeśvarasannidhau

yasya darśanamātreṇa sarvayajñaphalaṃ labhet //
tasmāddhi sarvathā vatsa gaccha tvaṃ tatra mā ciram

iti tasya vacaḥ śrutvā sa dvijo'gātkumudvatīm //
snātvā'khaṇḍasare vyāsa dṛṣṭvā devaṃ maheśvaram

sadyaḥ puṇyavatāṃlokānprāpto vai dvijasattamaḥ //
evaṃ vyāsa mahātīrthamakhaṃḍeśvaramuttamam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye'khaṃḍeśvaramahimavarṇananāmāṣṭaṣaṣṭitamo'dhyā yaḥ