Skanda Purana · Verses 5.68-2

// īśvara uvāca // //
aṣṭaṣaṣṭikasaṃkhyākaṃ piśācākhyamatheśvaram//
śṛṇu devi prayatnena darśanātpāpanāśanam

ādau kaliyuge devi śūdro bahudhano'bhavat//
somo nāma suvikhyāto nāstiko vedaniṃdakaḥ

abrahmaṇyo nṛśaṃsaśca kadaryo nirapatrapaḥ //
viśvāsaghātakaścaiva parasvaharaṇe rataḥ//

trivargahaṃtā cānyeṣāmātmakāmānuvarttakaḥ //
sa kadācinmṛto devi kaṣṭena parameṇa ca

marudeśe piśāco'bhūnnagno dīno bhayāvahaḥ //
nāśakṛtsa piśācānāṃ svapakṣocchedakārakaḥ

bahavo mardditāstena piśācā balavattarāḥ

atha tenaiva mārgeṇa kadācicchākaṭāyanaḥ //
svādhyāyanirato vidvānvāggmī śamaparāyaṇaḥ

udayādityasaṃkāśo vibhāvasusamadyutiḥ //
śakaṭena sadā yāti sa paśyanparvatātmaje

gato dadarśa taṃ raudraṃ piśācaṃ ca bhayāvaham//
sa piśācaḥ kṣudhāviṣṭo bhoktukāmo'bhyadhāvata

dṛṣṭvā taṃ śakaṭārūḍhaṃ brāhmaṇaṃ śākaṭāyanam //.
śakaṭasya dhvaniṃ śrutvā rūpaṃ dṛṣṭvā dvijasya ca

tathārūpaḥ piśācastu karṇābhyāṃ badhirīkṛtaḥ //
ātmatrāṇaparo bhūtvā naṣṭaḥ kaṣṭena pārvati //
taṃ dhāvaṃtaṃ samālokya piśācaṃ brāhmaṇo'bravīt

piśāca trastarūpo'si tvaritaścaiva lakṣyase //
kva dhāvasi samācakṣva kutaste bhayamāgatam

//
// piśāca uvāca // //
śakaṭasyāsya mahato ghoṣaṃ śrutvā bhayaṃkaram //
karṇābhyāṃ badhiro jāto visaṃjñastava darśanāt

//
//brāhmaṇa uvāca // //
piśācānāṃ baliṣṭhāśca śrūyaṃte brahmarākṣasāḥ //
sa tvaṃ māṃ bhoktukāmo'si vikhyāto brahmarākṣasaḥ

//
//piśāca uvāca //
piśācānāṃ samartho'smi naṣṭo'haṃ tava darśanāt //
duḥkhaṃ hi mṛtyuḥ sarveṣāṃ jīvitaṃ ca sudurllabham //
ato bhītaḥ palāyāmi jīvahetoḥ sukhārthataḥ

// brāhmaṇa uvāca // //
kutaḥ piśāca saukhyaṃ te maraṇaṃ śreya eva te //
paiśācī kutsitā yoniḥ pāpināmeva jāyate

//piśāca uvāca// //
sarvatra hi gato jīvo bhavatyeva sukhāśrayaḥ//
tasmājjīvitumicchāmi prasīda brahmarākṣasa//

// brāhmaṇa uvāca// //
nāhaṃ tvāṃ bhoktukāmo'smi brāhmaṇo'haṃ na rākṣasaḥ//
sarvabhūtahitārthāya vicarāmi mahītale

sarveṣāmeva jaṃtūnāṃ maitro brāhmaṇa ucyate //
mā kuruṣva bhayaṃ matto mitrabhāvagato hyaham

tasya tadvacanaṃ śrutvā piśācaḥ svasthamānasaḥ //
praṇamya pratyuvācedaṃ brāhmaṇaṃ śākaṭāyanam

yadi te sarvabhūtānāṃ dattā hyabhayadakṣiṇā //
karmaṇā manasā vācā mitrabhāvaṃ gato yadi

pṛcchāmi tvāṃ mahābhāga saṃśayo hṛdaye sthitaḥ //
śrutvānukaṃpayā samyaktanme vyākhyātumarhasi

kena karmavipākena paiśācaṃ yāti mānavaḥ //
piśācatvātkathaṃ muktiḥ prāpyate pāpakarmabhiḥ

iti tasya vacaḥ śrutvā piśācasya varānane //
mamatvenāvṛtastasmai prāvocacchākaṭāyanaḥ

apahṛtya ca viprasvaṃ devasvaṃ ca viśeṣataḥ //
tena pāpena pāpiṣṭhāḥ piśācatvaṃ prayāṃti ca

pitaraṃ mātaraṃ caiva striyaṃ bālaṃ dvijaṃ tathā //
vaṃcayitvā haratyarthaṃ sa piśāco bhavennaraḥ

rājadravyaṃ gṛhītvā tu na yajenna dadāti yaḥ //
ātmānameva puṣṇāti piśācatvaṃ sa gacchati

viśvāsaghātakā ye ca paradāraratāśca ye //
prāpnuvaṃti piśācatvaṃ tathā ye vedaniṃdakāḥ

niṃdaṃti ye purāṇāni dharmaśāstrāṇi sarvadā //
te bhavaṃti piśācāśca ye sadā piśunā narāḥ

iti te kathitaṃ sarvaṃ vedaprāmāṇyato'dhunā //
idānīṃ kathayiṣyāmi yastvaṃ jātosi tacchṛṇu //

somako nāma śūdrastvaṃ paramarmaprakāśakaḥ //
viśvāsaghātako jāto devabrāhmaṇadūṣakaḥ

nāstiko bhinnamaryādo janmanyatrāpi saptame //
sakulaṃ pātayitvātra narake dāruṇe bhṛśam

piśācayoniṃ saṃprāptaḥ punaḥ prāpsyasi rauravam //
mahārauravasaṃjñaṃ tu krakacaṃ kālasūtrakam//
yaṃtrapīḍanakaṃ raudraṃ mathanaṃ kumbhavālukam

ityevaṃ vadatastasya brāhmaṇasya yaśasvini //
sasmāra prāktanaṃ janma satsaṃgātkutsitaṃ svakam //

duḥkhābhibhūto niśceṣṭo dhigdhigityasakṛdbruvan //
patito bhūtale devi idaṃ vākyamathābravīt

aho kenāpi puṇyena bhavatā saha darśanam //
jātaṃ mamālpapuṇyasya dīnasya kṛpaṇasya ca

nāsti dharmasamaṃ mitraṃ nāsti dharmasamā gatiḥ //
nāsti dharmasamṃ trāṇaṃ sa ca nāsti mama prabho

magno'haṃ duḥkhajaladhau magno'haṃ pāpakardame //
bhrāṃto'hamaṃdhatamasi tatastvāṃ śaraṇaṃ gataḥ

namaste'stu mahābhāga kiṃ karomi praśādhi mām //
tattapobalanirdiṣṭamidaṃ prāptaṃ mayā'dhunā

evaṃ nigadatastasya piśācasya varānane //
kathayāmāsa māhātmyaṃ sa vipraḥ śākaṭāyanaḥ

pṛthivyāṃ yāni tīrthāni āsamudragatāni vai //
kṣetrāṇi yāni saṃtīha teṣāṃ kṣetraṃ supuṇyadam

mahākālavanaṃ kṣetraṃ pralaye'pyakṣayaṃ gatam //
liṃgaṃ tatra mahākṣetre piśācatvavināśanam

ḍhuṃḍheśvarasya devasya dakṣiṇe tridaśārcitam //
paiśācaṃ vidyate bhūyaḥ piśācayonināśanam //
tasya darśanamātreṇa piśācatvātpramokṣyase // ४३ /
tasya tadvacanaṃ śrutvā sa piśāco varānane //
ājagāma tvarāyukto namaskṛtya dvijaṃ tadā

mahākālavane puṇye samīhitaphalaprade//
dadarśa tatra talliṃgaṃ snātvā śiprājale śubhe

darśanāttasya liṃgasya sa piśāco varānane //
tatkṣaṇāddivyadehastu divyābharaṇabhūṣitaḥ

divyaṃ vimānamārūḍho gato loke sanātane //
uddhṛtya sakalaṃ gotraṃ mātṛkaṃ paitṛkaṃ tathā

dṛṣṭvā tanmahadāścaryaṃ māhātmyātiśayaṃ śriye //
proktaṃ devairvimānasthaiḥ siddhairākāśagaistathā

piśācopi gataḥ svargamasya liṃgasya darśanāt/
ato devaḥ sa vikhyāto bhaviṣyati mahītale//
piśāceśvarasaṃjñastu sarvapāpapraṇāśanaḥ

ye paśyaṃti narā devi piśāceśvarasaṃjñakam /
teṣāṃ hi pitaraḥ sadyo ye cāpi niraye sthitāḥ //
piśācatvādvimucyaṃte svargaṃ yāṃti na saṃśayaḥ

aśvamedhasya yajñasya samyagiṣṭasya yatphalam //
tatphalaṃ labhate so'pi piśāceśvaradarśanāt // ५१ /
gayāyāṃ piṃḍadānena yatpuṇyaṃ samudāhṛtam//
tatpuṇyamadhikaṃ jñeyaṃ piśāceśvaradarśanāt

ye paśyaṃti caturdaśyāṃ piśāceśvarasaṃjñakam //
pretatvaṃ ca piśācatvaṃ kule teṣāṃ na jāyate

na viyoniṃ naro yāti narakaṃ ca na paśyati //
prasaṃgenāpi yaḥ paśyetpiśāceśvarasaṃjñakam

sarvaiśvaryasamāyuktaḥ sarvabandhusamanvitaḥ //
modate pitṛloke sa piśāceśvaradarśanāt

kīrtanānmucyate pāpāddṛṣṭvā svargaṃ ca gacchati //
sparśanādasya liṃgasya punātyāsaptamaṃ kulam

tadaiva sa naro muktaḥ saṃsāranigaḍādibhiḥ //
yadaiva vīkṣate liṃgaṃ piśāceśvarasaṃjñakam

yajñānāṃ tapasāṃ caiva dānānāṃ caiva yatphalam //
tatphalaṃ koṭiguṇitaṃ jāyate tasya darśanāt

yadi paśyeccaturdaśyāṃ vaiśākhe kārttike tathā /
tasya puṇyamasaṃkhyātaṃ jāyate nātra saṃśayaḥ

eṣa te kathito devi prabhāvaḥ pāpanāśanaḥ //
piśāceśvaradevasya śrūyatāṃ saṃgameśvaram

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe piśāceśvaramāhātmyavarṇanaṃnāmāṣṭaṣaṣṭitamo'dhyāyaḥ // ६८ / ///cha//. //