Skanda Purana · Chapter 5.66

// sanatkumāra uvāca // //
bhūyaḥ śṛṇu paraṃ vyāsa tīrthānāmuttamaṃ varam ///
tattīrthaṃ sarvapāpaghnaṃ nṛsiṃhasya mahātmanaḥ

yasya darśanamātreṇa sarvapāpaṃ samuttaret //
daityarājaḥ samākhyāto hiraṇyakaśipuḥ purā

teneyaṃ vasudhā sarvā saṃprāptā ca durātmanā //
duṣṭadaityabalairvyāptā bhārākrāṃtā śucārditā

gaurbhūtvā'śrumukhī devairbrahmāṇaṃ śaraṇaṃ yayau //
bhārākrāṃtāṃ dharāṃ dṛṣṭvā brahmā lokapitāmahaḥ

uvāca ślakṣṇayā vācā tasyāḥ śramaṃ vyapohitum //
śrūyatāṃ bho'vane puṇye bhavatyā upakārakam

vaco vadāmi te tathyaṃ deśakālocitaṃ tathā //
purā'nena tapaścīrṇaṃ duṣkaraṃ sarvadehinām

gāyatryupāsanā tena kṛtā suniyatātmanā //
mayā cāsya varo dattaḥ prītiyuktena cetasā

na divā na tathā rātrau nāṃtarikṣe na bhūtale //
nātiśuṣkeṇa cārdreṇa na cāstraśastraghātanaiḥ

na devāsura gaṃdharvairna yakṣoragakinnaraiḥ //
piśācairguhyakādyaiśca rākṣasairna kadācana

mānavaiḥ pakṣijātaiśca na me mṛtyurbhavediti //
ekakaratalāghātaiḥ sakulabalavāhanam // 5.1.66.१ ०//
mārayiṣyati māṃ vīraḥ sa me mṛtyurbhaviṣyati //
tathetyuktvā'tihṛṣṭātmā tamahaṃ ca tadā'vane

āgamaṃ caiva lokaṃ svaṃ sa daityo ghoraśāsanaḥ //
babhūva sarvalokānāṃ śāstā cātulavikramaḥ

tasyaivā'dhikṛtā loke babhūvurvigatajvarāḥ //
trailokyaṃ bubhuje nityaṃ sarvadaityajaneśvaraḥ

tasmādyūyaṃ vanaṃ yāta mahākālaṃ maheśituḥ//
tatra tīrthaṃ mahaccāsītsarvatīrthavarotamam

saṃgameśvarasya dakṣiṇe karkarājottare tathā //
śiprātīre śubhe deśe pūrvaṃ vaikuṇṭhasannibham

nṛsiṃhākhyaṃ paraṃ dhāma tasya tīrthaṃ pratiṣṭhitam //
tatra gatvā suraśreṣṭhāḥ snānadānā dikāḥ kriyāḥ

kuruta satvaraṃ sarve punarlokānavāpsyatha //
te tasya vacanaṃ śrutvā devā indrapurogamāḥ

mahākālavanaṃ prāptā yatra śiprā payasvinī //
nṛsiṃhatīrthopakūle uṣitvā śāśvatīḥ samāḥ

snānadānādikaṃ kṛtvā nṛsiṃhasyā'rcanaṃ tathā //
evaṃ kṛtvā vidhānena parāṃ siddhimito gatāḥ

nṛsiṃhasya svarūpeṇa hato dānavapuṃgavaḥ //
sabhāmadhye tadā vyāsa hariṇā'mitraghātinā

kareṇaikaprahāreṇa hira ṇyakaśipurhataḥ //
tataḥ suragaṇāḥ sarve svādhikārānyayustadā

tadārabhya surāḥ sarve madhyāhnohnopāsanaṃ sadā //
prakurvaṃti ca tatraiva yatra tīrthe hariḥ param

evaṃ tīrthaṃ paraṃ vyāsa avaṃtyāṃ vidyate bhuvi //
asmiṃstīrthe dvijaśreṣṭha snānadānādikāḥ kriyāḥ

ye kurvaṃti narāḥ puṇyāste yāṃti paramāṃ gatim //
sarvadā sarvakāleṣu puṇyadaṃ tīrthamuttamam

kadācinnṛsiṃhatithiṃ prāpya caiva caturdaśīm //
snānaṃ kṛtvā'rcanaṃ tasya nṛsiṃhasya ca dhīmataḥ

nṛsiṃheśvaradeveśaṃ pūjayedyaḥ samāhitaḥ //
tasya hastagatā lakṣmīrbhaviṣyati na saṃśayaḥ

tato'gastyeśvaraṃ devaṃ yaḥ paśyetyusamāhitaḥ //
tasya vyāsa kṣitau kiṃciddurlabhaṃ naiva dṛśyate

yatra siddhiṃ parāṃ prāpto hanumānpavanātmajaḥ //
brahmacārī sadācāro yatiḥ sarvārthasādhakaḥ

tiṣṭhati paradaivajñaḥ sarvakāmārthasiddhaye //
yasminvaṭe purā taptaṃ tapaḥ paramaduścaram

mitrāvaruṇaputreṇa siddhihetostapasvinā //
bodhī nyagrodha ityākhyo hyagastivaṭa eva ca

naro nārīsamāyuktaḥ sāvitrīvratamācaret //
saubhāgyaṃ labhate nityaṃ sāvitryāśca paraṃtapa

yasmiṃstīrthe naraḥ snātvā dattvā dānaṃ ca saubhagam //
aṣṭasaubhāgyasaṃpūrṇaṃ vaṃśapātraṃ savāsakam //

saptadhānyasamopetaṃ paṃcaratnapariṣkṛtam //
saugaṃdhyādīni mālyāni maulisūtrasamāyutam

sāvitrīṃ hāṭakīṃ kṛtvā yathāśakti paraṃtapa //
yo vai dadāti viprāya vedavedāṃgadhīmate

labhate vipulāṃ lakṣmīṃ bahubhogakarīṃ śubhām //
bhuktvā vai vividhānbhogānpunaḥ svargamavāpnuyāt

sāvitrīvratakṛnnārī jāyate pativallabhā //
pativratā mahābhāgā vidhavā na kadācana

iti śrīskāṃde mahāpurāṇa ekā śītisāhasryāṃ saṃhitāyāṃ pañcama āvantyakhaṇḍe avantīkṣetramāhātmye nṛsiṃhatīrthamahimavarṇanaṃnāma ṣaṭṣaṣṭitamo'dhyāyaḥ