Skanda Purana · Verses 5.66-2

// īśvara uvāca // //
ṣaṭṣaṣṭitamakaṃ viddhi devaṃ jalpeśvaraṃ priye //
yasya darśanamātreṇa mahāpāpaṃ śamaṃ vrajet

jalponāma mahādevi rājābhūdbhuvi viśrutaḥ //
sadā jalparato nityaṃ jalpa vādapravartakaḥ

vikalpabahulo nityaṃ saṃsāragaticiṃtakaḥ //
subāhupramukhāḥ paṃca putrā jātā mahābalāḥ

tasya rājño varārohe mūrtāḥ paṃcāgnayo yathā //
subāhuḥ śatrumarddī ca jayo vijaya eva ca //
vikrāṃtaḥ paṃcamaḥ putraḥ sarve śastrāstrapāragāḥ ///४/
pitrā jalpena te rājñā pṛthagrājye pratiṣṭhitāḥ //
pṛthakputrā hi te sarve pṛthagdeśādhipāḥ kṛtāḥ

prācyāṃ subāhurnṛpatiryāmyāṃ vai śatrumardanaḥ //
paścimāyāṃ jayo rājā uttare vijayo nṛpaḥ

madhye vikrāṃtasaṃjñastu svapade viniyojitaḥ //
vyavasthāmīdṛśīṃ kṛtvā svayameva vanaṃ yayau

babhūvurmaṃtriṇasteṣāṃ hitā vaṃśakramāgatāḥ //
bubhujuḥ svasvarājyāni maṃtribhiḥ sahitāstadā

vikrāṃtasya ca yo maṃtrī vikalpaikaparāyaṇaḥ //
tenoktaṃ vijane deśe vikrāṃtasya mahībhṛtaḥ

yasyaiṣā pṛthivī kṛtsnā sa samarthaḥ prakīrtitaḥ //
udyamena padaṃ labdhaṃ vāsavena mahātmanā

tridaśaiścāmṛtaṃ labdhamudyamena mahīpate

hīnodyamā mānavā ye kṣattriyāśca viśeṣataḥ //
te hāsyāspadatāṃ yāṃti hīnavīryā dinedine

snehaṃ ca kurute bhrātā rājyalubdho'rthakāraṇāt //
arthavīryeṇa tenaiva saṃtoṣaṃ kurute nṛpaḥ//
kriyate na kimarthaṃ tu bhūpa maṃtraparigrahaḥ//
bhujyate sakalaṃ rājyaṃ mayā te maṃtriṇā balāt

paro'pi hitavānbandhurbandhurapyahitaḥ paraḥ //
ahito dehajo vyādhirhitamāraṇyamauṣadham

bhūmimete nirgilaṃti sarpā bilaśayāniva //
rājānamaviroddhāraṃ brāhmaṇaṃ cāpravāsinam

māyayā mohitaṃ sarvaṃ ko vā kasya ca bāṃdhavaḥ //
udyamaḥ kriyatāṃ tasmādbhrātṝṇāṃ nigrahe drutam

bhrātṛbhirbhrātaraḥ sarve nihatā rājyakāraṇāt //
dharmaṃ ca śāśvataṃ jñātvā nihatāścāsurāḥ suraiḥ

iti maṃtrivacaḥ śrutvā sa rājā vismayānvitaḥ //
hasitvā pratyuvācedaṃ mamāyaṃ śatrurāgataḥ

// vikrānta uvāca // //
vayaṃ ca bhrātaraḥ paṃca pṛthivīṃ kāmayāmahe //
atuṣṭāḥ pṛthagaiśvaryaṃ kathaṃ kṛtsnā bhaviṣyati

jyeṣṭho bhrātā subāhuśca dvitīyaḥ śatrumardanaḥ //
jayaśca vijayaścaiva teṣāṃ laghurahaṃ yataḥ

// maṃtryuvāca// ///
rājye sthitaṃ pūjayaṃti jyeṣṭhaṃ pūjārhaṇairvaraiḥ //
kaniṣṭhajyeṣṭhatā keyaṃ rājyaṃ prārthayatāṃ nṛṇām

tatheti ca pratijñāte vikrāṃtena mahībhṛtā//
sa maṃtrī kārayāmāsa abhicāravidhiṃ tadā

atharvaṇena maṃtreṇa purodhāḥ pracakāra ha //
jñātaṃ purohitaisteṣāṃ te'pi cakruḥ samāhitāḥ

atha kṛtyā samutpannā paścātkṛtyācatuṣṭayam //
sapurohitabhṛtyāṃstānagrasaṃstu samaṃ tadā

tataḥ samastalokasya vismayaścābhavanmahān //
yadaika kālaṃ neśuste pṛthakpuranivāsinaḥ

tataḥ śrutvā ca nidhanaṃ putrāṇāṃ jalpako nṛpaḥ //
vane vaśiṣṭhaṃ papraccha kimetadbhagavanprabho

tenāpi kathitaṃ sarvaṃ vaśiṣṭhena mahātmanā //
divyajñānena vṛttāṃtaṃ vikalpaṃ cākaronnṛpaḥ

// rājovāca // //
nimitto'haṃ vināśasya dhigdhi gjanma madīyakam //
sārddhaṃ tvamātyaputraiśca mṛtaṃ brāhmaṇapaṃcakam

matto'nyaḥ kaḥ pāparato bhaviṣyati mahānbhuvi //
yadi janma madīyaṃ syā nna ca jātu mahītale

tataste na vinaśyeyurmama putrapurohitāḥ //
dhigrājyaṃ dhikca me janma bhūbhujāṃ ca mahākule

kāraṇatvaṃ gato yo'haṃ vināśasya dvijanmanām //
kurvantaḥ svāminaste'rthaṃ putrāṇāṃ mama yājakāḥ //
nāśaṃ yayurna duṣṭāste duṣṭo'haṃ nāśakāraṇe

itthamudvignahṛdayaḥ sa jalpaḥ pṛthivīpatiḥ //
papraccha ca punaḥ prahvo vaśiṣṭhaṃ jñānināṃ varam

//
// rājovāca // //
bhagavanbrūhi me tīrthamaviyogakaraṃ sadā //
sadyaḥ pāpaharaṃ vipra liṃgaṃ vā kathaya prabho

tasya tadvacanaṃ śrutvā jalpasya pṛthivīpateḥ //
vaśiṣṭhaḥ kathayāmāsa divyajñānena pārvati

gaccha jalpa mamādeśānmahākālavanottamam //
kṛtvā niḥ kṣatriyāṃ pṛthvīṃ yatra rāmastapasyati //
tatra liṃgamanādyaṃ ca kukkuṭeśvarapaścime

tadārādhaya rājeṃdra jāmadagnyāśrame sthitaḥ //
vaśiṣṭhasya vacaḥ śrutvā jalpo'sau pṛthivīpatiḥ

devadāruvanaṃ tyaktvā mahākālavanaṃ gataḥ //
dadarśa tatra talliṃgamanādyaṃ devasaṃstutam//
pūjayāmāsa vidhivatparameṇa samādhinā

tatra vāṇī samutpannā liṃgamadhyādvarānane //
na tvaṃ pāpasamācāro na tvaṃ maraṇakāraṇam //
putrāṇāṃ nṛpaviprāṇāmadṛṣṭaṃ tatra kāraṇam

vipākena svakīyena gatā vaivasvataṃ puram //
mā śokaṃ kuru rājeṃdra gahanā karmaṇo gatiḥ

anena śuddhabhāvena tuṣṭo'haṃ nṛpasattama //
yadabhīṣṭaṃ varaṃ brūhi tatte dāsyāmi nānyathā

// rājovāca // //
yadi tuṣṭo'si me deva yadi deyo varo mama //
saṃsārasāgare ghore mā bhavenmama janma ca

akṣayāṃ dehi me kīrttiṃ nāmnā me viśruto bhuvi //
ayaṃ jalpeśvaro devo jalpenārādhito vibhuḥ

vadaṃtu tridaśāḥ sarve eṣa me durlabho varaḥ //
ye tvāṃ paśyaṃti manujā mannāmnā khyātimāgatam//
teṣāṃ viyogo mā bhūyātputrato dhanato'pi vā //

na saṃsārabhayaṃ teṣāṃ dasyuto naiva rājataḥ //
na bhūtagraharogebhyo bhayamastu kadācana

śivamastu sadā teṣāṃ yeṣāṃ tvaṃ darśanaṃ gataḥ //
te dhanyā mānuṣe loke ye tvāṃ śaraṇamāgatāḥ

sarvatīrthābhiṣekaistu yatpuṇyaṃ prāpyate naraiḥ //
tatsarvamadhikaṃ deva labhyate tava darśanāta //

tāvatpataṃti saṃsāre ghore duḥkhaśatākule //
yāvanna dṛśyate devaḥ saṃsārārṇavatārakaḥ

yadā pāpakṣayaḥ puṃsāṃ tadā te darśanaṃ bhavet //
mahatā sukṛtenaiva nālpena tapasā prabho

evaṃ bhaviṣyatītyuktvā tena liṃgena pārvati //
paśyatāṃ sarvadevānāṃ svatanau saṃniveśitaḥ

tasmim̐lliṃge layaṃ prāpte nṛpe jalpe varānane //
devo jalpeśvaraḥ khyāto devairukto mahītale //
bhuktido muktidaścaiva sadābhīṣṭakaraḥ smṛtaḥ

eṣa te kathito devi prabhāvaḥ pāpanāśanaḥ //
jalpeśvarasya devasya śṛṇu kedārasaṃjñakam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye jalpeśvaramāhātmyavarṇanaṃnāma ṣadaṣaṣṭitamo'dhyāyaḥ