સ્કંદ પુરાણ · શ્લોક 5.65-3

શ્રીમાર્કણ્ડેય ઉવાચ -
તતો ગચ્છેત્તુ રાજેન્દ્ર આનન્દેશ્વરમુત્તમમ્ ।
તત્તીર્થં કથયિષ્યામિ સર્વપાપક્ષયંકરમ્

યુધિષ્ઠિર ઉવાચ -
આનન્દશ્ચૈવ સંજાતો રુદ્રસ્ય દ્વિજસત્તમ ।
કથ્યતાં મે ચ તત્સર્વં સંક્ષેપાત્સહ બાન્ધવૈઃ

શ્રીમાર્કણ્ડેય ઉવાચ -
કથયામિ નૃપશ્રેષ્ઠ આનન્દેશ્વરમુત્તમમ્ ।
દાનવાનાં વધં કૃત્વા દેવદેવો મહેશ્વરઃ

પૂજિતો દૈવતૈઃ સર્વૈઃ કિન્નરૈર્યક્ષપન્નગૈઃ ।
આનન્દસંયુતો દેવો નનર્ત વૃષવાહનઃ

ભૈરવં રૂપમાસ્થાય ગૌર્યા ચાર્દ્ધાઙ્ગસંસ્થિતઃ ।
ભૂતવેતાલકઙ્કાલૈર્ભૈરવૈર્ભૈરવો વૃતઃ

નનર્ત નર્મદાતીરે દક્ષિણે પાણ્ડુનન્દન ।
તુષ્ટૈર્મરુદ્ગણૈઃ સર્વૈઃ સ્થાપિતઃ કમલાસનઃ

તદાપ્રભૃતિ તત્તીર્થમાનન્દેશ્વરમુચ્યતે ।
અષ્ટમ્યાં ચ ચતુર્દશ્યાં પૌર્ણમાસ્યાં નરાધિપ

વિધિવચ્ચાર્ચયેદ્દેવં સુગન્ધેન વિલેપયેત્ ।
બ્રાહ્મણાન્પૂજયેત્તત્ર યથાશક્ત્યા યુધિષ્ઠિર

ગોદાનં તત્ર કર્તવ્યં વસ્ત્રદાનં શુભાવહમ્ ।
વસન્તસ્ય ત્રયોદશ્યાં શ્રાદ્ધં તત્રૈવ કારયેત્

ઇઙ્ગુદૈર્બદરૈર્બિલ્વૈરક્ષતૈશ્ચ જલેન વા ।
પ્રેતાનાં કારયેચ્છ્રાદ્ધમાનન્દેશ્વર ઉત્તમે

આનન્દિતા ભવેયુસ્તે યાવદાભૂતસમ્પ્લવમ્ ।
સન્તતેર્વૈ ન વિચ્છેદઃ સપ્તજન્મસુ જાયતે ।
આનન્દો હિ ભવત્તેષાં પ્રતિજન્મનિ ભારત

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે આનન્દેશ્વરતીર્થમાહાત્મ્યવર્ણનં નામ પઞ્ચષષ્ટિતમોઽધ્યાયઃ ॥