Skanda Purana · Verses 5.64-2

// īśvara uvāca // //
śṛṇu tvaṃ paśupatyākhyaṃ catuḥṣaṣṭikamīśvaram//
yasya darśanamātreṇa paśuyonirna labhyate

paśupālo mahādevi babhūva bhuvi viśrutaḥ //
rājā parama dharmiṣṭhaḥ paśūnāṃ pālane rataḥ

didṛkṣuḥ sa kadācicca gatastoyanidhiṃ prati //
dadarśa tatra puruṣānpaṃca prādhānyataḥ sthitān //
ekā strī muktakeśā sā bhramantī ca punaḥpunaḥ

atha rājā bhayāviṣṭo visaṃjñaḥ samapadyata //
saṃveṣṭito dasyubhistaistayā nāryā viśeṣataḥ

tatonye samapātaṃ ca āgatya nṛpasattamam //
saṃveṣṭya saṃsthitaiḥ sarvaistato ruddho mahīpatiḥ

ruddhe rājani te sarve ekībhūtāstu dasyavaḥ //
ghātitāḥ paśupālena na mṛtāḥ punarutthitāḥ

tasya tāṃ dhṛṣṭatāṃ jñātvā sthairyaṃ ca nṛpatermṛdhe//
tasyaiva nṛpaterdehe līnāste daśa dasyavaḥ

amūrtā iva te sarve ekībhūtāstato'bhavan //
tāndṛṣṭvā duḥkhito rājā paśupālo'bhavatkṣaṇāt

athāpaśyattadā''yāṃtaṃ nāradaṃ munipuṃgavam //
brahmaputraṃ tapoyuktaṃ papraccha sa nṛpastadā

// paśu pāla uvāca // //
bhagavanbrahmaputrādya mayā dṛṣṭaṃ tu kautukam //
akasmātpuruṣāḥ paṃca samāyātā bhayāvahāḥ

tairahaṃ veṣṭito duṣṭairvyākulaśca kṛtastadā //
muṣṭibhirhanyamāno'haṃ svastho jāto dvija kṣaṇāt

tato'nye puruṣāḥ pañca samāyātā niyudhya mām //
hanyatāṃ hanyatāmeṣa muktikāmo nṛpādhamaḥ

evaṃ taiḥ pīḍito'tyarthaṃ punarmohamupāgataḥ //
etasminnantare sā strī māmuvāca punaḥpunaḥ

dṛḍho bhava mahārāja mā viṣādaṃ kuru prabho //
hīnavīryā hyamī corāḥ samarthastvaṃ sthiro bhava

tasyā vākyena vipreṃdra mayā dhairyeṇa saṃyuge //
daśa pradhāna puruṣā jitāste na mṛtāḥ prabho

pralīnā maccharīre tu kepyate kāpi sā'balā //
paśupālavacaḥ śrutvā nārado vākyamabravīt

ye tvayā puruṣā dṛṣṭāstvayi līnā jitā mṛdhe //
buddhīndriyāṇi te pañca paṃca karmendriyāṇi ca //
bhramantī yā ca nārī sā tvayā dṛṣṭā nṛpottama //

manorūpeṇa sā buddhirbhramatyeva hi na sthirā //
jitāni tāni pūrveṇa brahmaṇā lokakartṛṇā

so'pi krodhavaśaṃ nīta indriyairviṣayaiḥ priyaiḥ //
pitāmahena sve yajñe śambhorbhāgo na kalpitaḥ

mahādevo jagannāthaḥ sṛṣṭisaṃhārakārakaḥ //
iṃdriyairmohito rājankrodhaṃ cakre surā nprati

surā vibhūtayo yasya krīḍārthaṃ bhuvanatrayam //
tena bhāganimittārthaṃ cakre sajyaṃ dhanustadā

pūṣṇaśca daṃtāḥ saṃbhagnā mohitaśca divākaraḥ //
netre bhagne bhagasyāpi viddho yajño mṛgākṛtiḥ

paśavaśca kṛtā devā munayo vedavarjitāḥ //
ṛṣīṇāṃ dharmaśāstrāṇi hṛtāni vibhunā tathā

durjayānīndriyāṇyāhurmunayo vedapāragāḥ //
manorūpeṇa yā buddhiḥ sā cātīva sudurjayā

tasmādrājanmahābāho mā viṣādaṃ vṛthā kṛthāḥ //
tasya tadvacanaṃ śrutvā nāradasya mahātmanaḥ //
paśupālo mahādevi vaktuṃ samupacakrame

// paśupāla uvāca // //
kathaṃ te bhagavanmuktā devāḥ śakrapurogamāḥ //
paśubhāvācca brahmāpi śrotumicchāmi kathyatām

tasya tadvacanaṃ śrutvā nāradaḥ punarabravīt //
paśu tve'pi gatā devā ṛṣibhirmunibhiḥ saha

brahmāṇamagrataḥ kṛtvā gatāḥ śaraṇamīśvaram //
stutibhistoṣito devo bhaktānugrahakārakaḥ

uvāca vacanaṃ rājanyatkartavyaṃ taducyatām

devā ūcuḥ//
vedaśāstrāṇi vijñānaṃ dehi no bhava mā ciram//
devastvaṃ pūrvavaddeva yadi tuṣṭo maheśvaraḥ

//īśvara uvāca // //
bhavaṃtaḥ paśavaḥ sarve mayā sārddhaṃ ca gamyatām //
mahākālavane kṣetre paśubhāvavimokṣake

ahaṃ patirvo bhavitā tato mokṣamavāpsyatha //
bhavatāmanukaṃpārthaṃ lokānugrahakāraṇam //
liṃgarūpī bhaviṣyāmi nāmnā paśupatīśvaraḥ

atha te tridaśāḥ sarve dṛṣṭvā devaṃ tamīśvaram //
paśubhāvavinirmuktā gatā hṛṣṭāstriviṣṭapam //
brahmā paśupatiṃ prāha prasannenāṃtarātmanā

ye tvāṃ paśyanti deveśa bhaktyā paramayā yutāḥ //
teṣāṃ kule paśutvaṃ ca ye gatāḥ pitaraḥ prabho //
svakaiḥ karmavipākaiśca teṣāṃ mokṣo bhaviṣyati

ajñānājjñānato vāpi yatpāpaṃ kriyate naraiḥ //
tatpāpaṃ vilayaṃ yātu tasya devasya pūjanāt

te narāḥ paśavo loke kiṃ teṣāṃ jīvite phalam //
yairna dṛṣṭaḥ paśupatiḥ paśuyonivimocakaḥ

kaumāre yauvane bālye vārddhake yadupārjitam //
tatpāpaṃ vilayaṃ yāti dṛṣṭvā paśupatiṃ śivam

pauṣamāse tu saṃprāpte ye tvāṃ paśyaṃti mānavāḥ //
teṣāṃ tvaṃ varado deva sadābhīṣṭakaro bhavet

sūryagrahe yathā dattaṃ kurukṣetre viśeṣataḥ //
pātre dānaṃ suvarṇasya proktamakṣayyamavyayam

pauṣamāse dinaikena narāṇāmadhikaṃ tathā //
taddarśanena deveśa bhaviṣyati na saṃśayaḥ

ityuktvā bhagavānbrahmā brahmalokaṃ gato nṛpa //
kṛtakṛtyaḥ prahṛṣṭātmā munibhiḥ kavibhiḥ saha

tasmāttvamapi rājeṃdra yadīcchasi parāṃ gatim //
samārādhaya talliṃgaṃ paśuyonivimocanam //
mahākālavanaṃ gatvā indreśvarasya dakṣiṇe

tasya tadvacanaṃ śrutvā nāradasya mahātmanaḥ //
jagāma paśupālo'pi mahākālavanaṃ priye //
darśanāttasya liṃgasya gato'sau paramāṃ gatim

eṣa te kathito devi prabhāvaḥ pāpanāśanaḥ //
paśupatyākhyadevasya śṛṇu brahmeśvaraṃ śivam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye paśupatī śvaramāhātmyavarṇanaṃnāma catuṣṣaṣṭitamo'dhyāyaḥ