Skanda Purana · Chapter 5.64

// sanatkumāra uvāca // //
ataḥ paraṃ pravakṣyāmi vīreśvaramatho śṛṇu //
tasmiṃstīrthe naraḥ snātvā vīralokamavāpnuyāt

nāgānāṃ pravaraṃ tīrthaṃ sarvakāmavarapradam //
kālabhairavamityākhyaṃ tacca tīrthaṃ paraṃ smṛtam

yasya darśanamātreṇa sarvaduḥkhātigo bhavet

// vyāsa uvāca // //
kasminkāle hi vikhyātaṃ kālabhairavasaṃjñitam //
tīrthaṃ munivaraśreṣṭha etadvistarato vada

// sanatkumāra uvāca // //
purā'yaṃ bhairavo yogī yoginītrāsakārakaḥ //
kālacakrakṛtāḥ kṛtyā yoginīnāṃ gaṇāstadā

tāsāṃ kālīti vikhyātā yoginī paramottamā //
tayāyaṃ pālito nityaṃ putravadbhairavo'malaḥ

tenaite ca vinirdhūtā doṣotpātāśca sattama //
trividhā bhuvi vikhyātāḥ sarvavighnakarāḥ parāḥ

kālakṛtyāstadā tena bhraṃśitāḥ paramātmanā//
mahāmārī pūtanā kṛtyā śakunī revatī khalā

koṭarī tāmasī māyā navaitā mātṛkāḥ smṛtāḥ//
duṣṭadoṣavahā duṣṭāḥ sarvaprāṇibhayaṃkarāḥ

vaśīcakre sa dharmātmā sarvakāmavarapradāḥ //
śiprātīre sthito nityaṃ kūle cottarataḥ śubhe

ūṣarasya pare pūrve so'pi tiṣṭhati sarvadā //
āṣāḍhasya site pakṣe ravivāre samāhitaḥ

navamīṃ cā'ṣṭamīṃ prāpya caturdaśyāṃ viśeṣataḥ //
pūjāṃ kurvaṃti ye kecinnarā niścalamānasāḥ

vivāhe putrajanane māṃgalye ca śubhe param //
patrapuṣpārkagaṃdhaiśca naivedyairvividhaistathā

tāṃbūlavāsagaṃdhādyaiḥ pūjayedvarada rūpiṇam //
viprāṇāṃ bhojanairhomaistarpayetsatataṃ vibhum

etatparamakalyāṇametatparamamaṃgalam //
natvā stutvā ca taṃ devaṃ sarvakāmārthasiddhaye //

sakalakaluṣahārī dhūrtaduṣṭāṃ'takārī suciracaritacārī muṃḍamauṃjīpracārī //
karakalitakapālī kuṇḍalī daṃḍapāṇiḥ sa bhavatu sukhakārī bhairavo bhāvahārī

vividharāsavilāsavilāsitaṃ navavadhūravadhūtaparākramam //
madavighūrṇitagoṣpadagoṣpadaṃ bhavapadaṃ satataṃ satataṃ smare

amalakamalanetraṃ cārucaṃdrāvataṃsaṃ sakalaguṇagariṣṭaṃ kāminīkāmarūpam //
parihṛtaparitāpaṃ ḍākinīnāśahetuṃ bhaja jana śivarūpaṃ bhairavaṃ bhūtanātham ///

sabalabalavighātaṃ kṣetrapālaikapālaṃ vikaṭakaṭikarālaṃ hyaṭṭahāsaṃ viśālam //
karagatakaravālaṃ nāgayajñopavītaṃ bhaja jana śivarūpaṃ bhairavaṃ bhūtanātham

bhavabhayaparihāraṃ yoginītrāsakāraṃ sakalasuragaṇeśaṃ cārucaṃdrārkanetram //
mukuṭarucirabhālaṃ muktamālaṃ viśālaṃ bhaja jana śivarūpaṃ bhairavaṃ bhūtanātham

caturbhujaṃ śaṃkhagadādharā''yudhaṃ pītāṃbaraṃ sāṃdrapayodasaubhagam //
śrīvatsalakṣmaṃ galaśobhikaustubhaṃ śīlapradaṃ śaṃkararakṣaṇaṃ bhaje

lokā'bhirāmaṃ bhuvanābhirāmaṃ priyābhirāmaṃ yaśasābhirāmam //
kīrtyābhirāmaṃ tapasā'bhirāmaṃ taṃ bhūtanāthaṃ śaraṇaṃ prapadye

ādyaṃ brahmasanātanaṃ śuciparaṃ siddhipradaṃ kāmadaṃ sevyaṃ bhaktisamanvitaṃ hariharaiḥ sṛṣṭyāsahaṃ sādhubhiḥ //
yogyaṃ yogavicāritaṃ yugadharaṃ yogyānanaṃ yoginaṃ vaṃdehaṃ sakalaṃ kalaṃkarahitaṃ satsevitaṃ bhairavam

bhairavāṣṭakamidaṃ puṇyaṃ prātaḥkāle paṭhennaraḥ //
duḥsvapnanāśanaṃ tasya vāṃchitārthaphalaṃ bhavet/

rājadvāre vivāde ca saṃgrāme saṃkaṭetathā//
rājñā kuddhena cā''jñapte śatrubaṃdhagate tathā

dāridryaduḥkhanāśāya paṭhitavyaṃ samāhitaiḥ //
na teṣāṃ jāyate kiṃciddurlabhaṃ bhuvi vāṃchitam

// iti bhairavāṣṭakam // //
asmiṃstīrthe prakartavyaṃ snānadānādikaṃ naraiḥ//
saṃsārabhayabhītaiśca pūjito bhairavo varaḥ //
tasmātsarvaprayatnena kartavyaṃ tīrthamuttamam

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe 'vantīkṣetramāhātmye kālabhairavatīrthayātrāvarṇanaṃnāma catuḥṣaṣṭitamo'dhyāyaḥ