Scripture Library

Skanda Purana · Verses 5.59-3

5.59-3.59.1

śrīmārkaṇḍeya uvāca -
tataḥ puṣkariṇīṃ gacchetsarvapāpapraṇāśinīm /
śrute yasyāḥ prabhāve tu sarvapāpaiḥ pramucyate

5.59-3.59.2

revāyā uttare kūle tīrthaṃ paramaśobhanam /
yatrāste sarvadā devo vedamūrtirdivākaraḥ

5.59-3.59.3

kurukṣetraṃ yathā puṇyaṃ sārvakāmikamuttamam /
idaṃ tīrthaṃ tathā puṇyaṃ sarvakāmaphalapradam

5.59-3.59.4

kurukṣetre yathā vṛddhirdānasya jagatīpate /
puṣkariṇyāṃ tathā dānaṃ vardhate nātra saṃśayaḥ

5.59-3.59.5

yavamekaṃ tu yo dadyātsauvarṇaṃ mastake nṛpa /
puṣkariṇyāṃ tathā sthānaṃ yathā sthānaṃ nare smṛtam

5.59-3.59.6

sūryagrahe tu yaḥ snātvā dadyāddānaṃ yathāvidhi /
hastyaśvaratharatnādi gṛhaṃ gāśca yugaṃdharān

5.59-3.59.7

suvarṇaṃ rajataṃ vāpi brāhmaṇebhyo dadāti yaḥ /
trayodaśa dinaṃ yāvattrayodaśaguṇaṃ bhavet

5.59-3.59.8

tilamiśreṇa toyena tarpayetpitṛdevatāḥ /
dvādaśābde bhavetprītistatra tīrthe mahīpate

5.59-3.59.9

yastatra kurute śrāddhaṃ pāyasairmadhusarpiṣā /
śrāddhado labhate svargaṃ pitḥṇāṃ dattamakṣayam

5.59-3.59.10

akṣatairbadarairbilvairiṅgudairvā tilaiḥ saha /
akṣayaṃ phalamāpnoti tasmiṃstīrthe na saṃśayaḥ

5.59-3.59.11

tatra snātvā tu yo devaṃ pūjayecca divākaram /
ādityahṛdayaṃ japtvā punarādityamarcayet /
sa gacchetparamaṃ lokaṃ tridaśairapi vanditam

5.59-3.59.12

ṛcamekāṃ japedyastu yajurvā sāma eva ca /
sa samagrasya vedasya phalamāpnoti vai nṛpa

5.59-3.59.13

yastryakṣaraṃ japenmantraṃ dhyāyamāno divākaram /
ādityahṛdayaṃ japtvā mucyate sarvapātakaiḥ

5.59-3.59.14

yastatra vidhivatprāṇāṃstyajate nṛpasattama /
sa gacchetparamaṃ sthānaṃ yatra devo divākaraḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe puṣkariṇyāmādityatīrthamāhātmyavarṇanaṃ nāmaikonaṣaṣṭitamo'dhyāyaḥ //

Original text: skandapurāṇam · Sanskrit Wikisource contributors · Sanskrit Wikisource · CC BY-SA 4.0