Skanda Purana · Verses 5.59-2

// śrīmahādeva uvāca // //
ekonaṣaṣṭikaṃ viddhi devaṃ siddheśvaraṃ priye //
yasya darśanamātreṇa siddhiḥ puṃsāṃ prajāyate

āsīdaśvaśirānāma rājā paramadhārmikaḥ //
so'śvamedhena yajñena iṣṭvā sabahudakṣiṇam

snātaścāvabhṛthe hṛṣṭo brāhmaṇaiḥ parivāritaḥ //
yāvadāste sa rājarṣistāvatsiddho'tidīptimān

nānauṣadhiprabhāvajño maṃtrataṃtra viśāradaḥ //
āyayau kapilaḥ śrīmānjaigīṣavyaśca siddharāṭ

tayostvaritamutthāya sa rājābhyāgatakriyām //
cakāra parayā yukto mudā vai pṛthi vīpatiḥ

tāvarcitāvāsanasthau kṣamāśīlau śucivratau //
mahaujasau mahābhāgau mumukṣū munipuṃgavau // //
vidyāvinayasaṃpannau brahmacaryaparāyaṇau //
anekasṛṣṭisaṃhārasthitikāryaparāyaṇau

udayādityasaṃkāśau vibhāvasusamadyutī//
tejorāśisamāyuktau durnirīkṣyau pṛthagjanaiḥ

vinayenopasaṃgamya praṇipatyābhivādya ca //
sa rājā prāṃjalirbhūtvā praśnamenamapṛcchata

// aśvaśirā uvāca // //
śrutaṃ mayā muniśreṣṭhau nānyo devo janārddanāt //
dhyātotha pūjito nṝṇāṃ muktido bhavabaṃdhanāt

saṃsmṛte tu hṛṣīkeśe narāṇāṃ koṭijanmajam //
aśubhaṃ kṣayamāpnoti kathaṃ na praṇameddharim

samārādhya jagannāthaṃ śakrādyāstridivaukasaḥ //
vasaṃti muditāḥ svarge divyadyutisamanvitāḥ

janmamṛtyujarā rogairduḥkhāni vividhāni ca //
prayāṃti vilayaṃ sadyaḥ prasanne garuḍadhvaje

iti pṛṣṭastadā tena prārthitena yaśasvinā //
ūcatustaṃ nṛpaṃ siddhau siddhivijñānakovidau

ka eṣa procyate rājaṃstvayā nārāyaṇo'dhunā //
āvāṃ nārāyaṇau dvau tu tvatpratyakṣaṃ gatau nṛpa

// aśvaśirā uvāca // //
bhavaṃtau brāhmaṇau siddhau tapasā dagdhakilviṣau //
yuvāṃ nārāyaṇau kasmāditi vākyamuvāca saḥ

śaṃkhacakragadāpāṇiḥ pītavāsā janārddanaḥ //
garuḍastho hṛṣīkeśaḥ kastasya sadṛśo bhuvi

tasya rājño vacaḥ śrutvā saṃsiddhau yogakovidau //
darśayāmāsatustau hi kṛtvā nārāyaṇaṃ vapuḥ

kapilo maṃtramāhātmyātsvayaṃ viṣṇurbabhūva ha //
śaṃkhacakragadāpāṇiḥ pītavāsāśca tatkṣaṇāt

jaigīṣavyaśca garuḍastatkṣaṇātsamajāyata //
tataḥ samabhavattatra rājaveśmani kautukam

dṛṣṭvā nārāyaṇaṃ devaṃ garuḍasthaṃ sanātanam //
āścaryaṃ tādṛśaṃ dṛṣṭvā sa rājā vismayānvitaḥ //
uvāca kṣāmyatāṃ siddhau nāyaṃ viṣṇurathedṛśaḥ

tasya brahmā samutpanno nābhipaṃkajamadhyataḥ //
tasmāttu brahmaṇo rudraḥ sa viṣṇuḥ parameśvaraḥ

iti rājño vacaḥ śrutvā tadā tau siddhasattamau //
cakratuḥ paramāṃ māyāṃ yogācāryau sumāṃtrikau

kapilaḥ padmanābhastu padmamadhye prajāpatiḥ //
babhūva svayamevātra sahasā yogatastadā

jaigīṣavyo'tha rudrastu tasyaivāṃke vyavasthitaḥ //
dadarśa mahadāścaryaṃ sa rājā yogamohitaḥ

kautukātpratyuvācedaṃ bhītaḥ kaṃpitakandharaḥ //
netthaṃ bhavati viśveśo māyā yogināṃ tadā //
sarvarūpī hariḥ śrīmānsarvagaḥ sarvadaḥ smṛtaḥ

tato vākyāvasāne tu tasya rājñaśca saṃsadi //
maśakā matkuṇā yūkā bhramarāḥ pakṣiṇo mṛgāḥ

aśvā gāvo hayāḥ siṃhā vyāghrā gomahiṣāstathā //
anyepi paśavaḥ kīṭā grāmyāraṇyāśca sarvaśaḥ

dṛśyaṃte rājabhavane koṭiśaḥ parvatātmaje //
taṃ dṛṣṭvā bhūtasaṃghātaṃ rājā vismitamānasaḥ

yāvacciṃtayate kiṃ syāttāvajjñātaṃ nṛpeṇa hi //
jaigīṣavyasya māhātmyaṃ kapilasya mahātmanaḥ

kṛtāṃjalipuṭo bhūtvā sa rājā'śvaśirāstadā //
papraccha ca dvijau bhaktyā kimidaṃ siddhasattamau

sāmarthyamīdṛśaṃ labdhaṃ kasmādvai tapaso balāt //
adya me saphalotpattiradya me saphalaṃ śrutam

saphalā me manovṛttiryuvayordarśanena vai //
tasya tadvacanaṃ śrutvā kapilo vākyamabravīt

mahākālavane rājanvidyate liṃgamuttamam //
khyātaṃ siddheśvaraṃ nāmnā siddhairabhyarcitaṃ sadā

saubhāgyeśvarapūrve tu saubhāgyārogyadāyakam //
prabhāvāttasya liṃgasya prāptā siddhiranuttamā

jaigīṣavyena siddhena mayā vaiṃ nṛpasattama //
tasmādvraja mahābāho mahākālavanaṃ śubham

tatra drakṣyasi sarveśaṃ śaṃkhacakragadādharama //
liṃgamūrttau sthitaṃ viṣṇuṃ yaste siddhiṃ pradāsyati

saṃsiddhā bahavastatra sanakādyā nareśvara //
tasya tadvacanaṃ śrutvā kapilasya mahātmanaḥ

jagāma sahasā tatra sa rājāśvaśirāstadā //
dadarśa caiva tau siddhau siddheśvarasamīpataḥ

anye ca bahavaḥ siddhāḥ siddhanāthāstathā pare //
jñātvā siddheśvaraṃ devaṃ siddhasaṃghaiḥ samarcitam

liṃgamadhye sthita viṣṇuṃ jñātvā sa nṛpasattamaḥ //
pūjayāmāsa bhāvena parameṇa samādhinā

tatastuṣṭo'bravīddevo varaṃ varaya suvrata //
yattebhilaṣitaṃ sarvamahaṃ dāsyāmi bhūpate

liṃgasya vacanaṃ śrutvā nṛpeṇoktaṃ ca tacchṛṇu //
yadi me'sti dayā deva prasanno'si hi cetprabho

yatte rūpaṃ paraṃ nātha taddarśaya mamācyuta //
etadeva hi me deva sadābhilaṣitaṃ hṛdi

ājanmano jagannātha kadā drakṣye janārddanam //
etadicchāmyahaṃ deva varāṇāṃ pravaraṃ varam //
dīyamānaṃ tvayābhīṣṭaṃ khyātaṃ siddheśvaraṃ kṣitau

nṛpasya vacanaṃ śrutvā liṃgenoktaṃ varānane //
na me vidurdevagaṇā nāsurā na maharṣayaḥ

paraṃ rūpaṃ nṛpaśreṣṭha kṛṣṇo'haṃ liṃgatāṃ gataḥ //
mamalokaṃ tu ye prāptā munayo maṃtrabhūṣitāḥ

na caite māṃ vijānaṃti paramārthena pārthiva //
yadetaddṛśyate tejo liṃgarūpeṇa māmakam

etadeva hi brahmādyā dhyāyanti tridaśāstvamī //
ato na me paraṃ rūpaṃ draṣṭuṃ kaścitkṣamo bhavet

anekajanmasaṃśuddhā yogino madanugrahāt //
praviśaṃti tanau mahyaṃ muktāḥ saṃsārabaṃdhanaiḥ

evaṃ hi buvatastasya siddhiḥ prāptā nṛpeṇa hi//
viṣṇurūpaṃ samāsthāya tasmim̐lliṃge layaṃ gataḥ

ato devi suvikhyātaṃ liṃgaṃ siddheśvaraṃ param //
ye paśyaṃti narā bhaktyā teṣāṃ siddhiśca śāśvatī

aṃjanaṃ pādalepaṃ ca pādukāsiddhireva ca //
guṭikā khaḍgasiddhiśca mahāsiddhiḥ sudurlabhā

divyauṣadhaiśca yā siddhirmaṃtrasparśodbhavā ca yā //
etāstu siddhayaḥ proktā aparā laghimādayaḥ

dharmārthakāma siddhiśca mokṣasiddhiranuttamā //
jāyate nātra sandehaḥ śrīsiddheśvaradarśanāt

eṣa te kathito devi prabhāvaḥ pāpanāśanaḥ //
siddheśvarasya devasya mataṃgeśamatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśīti liṅgamāhātmye siddheśvaramāhātmyavarṇanaṃnāmaikonaṣaṣṭitamo'dhyāyaḥ