સ્કંદ પુરાણ · શ્લોક 5.59-3

શ્રીમાર્કણ્ડેય ઉવાચ -
તતઃ પુષ્કરિણીં ગચ્છેત્સર્વપાપપ્રણાશિનીમ્ ।
શ્રુતે યસ્યાઃ પ્રભાવે તુ સર્વપાપૈઃ પ્રમુચ્યતે

રેવાયા ઉત્તરે કૂલે તીર્થં પરમશોભનમ્ ।
યત્રાસ્તે સર્વદા દેવો વેદમૂર્તિર્દિવાકરઃ

કુરુક્ષેત્રં યથા પુણ્યં સાર્વકામિકમુત્તમમ્ ।
ઇદં તીર્થં તથા પુણ્યં સર્વકામફલપ્રદમ્

કુરુક્ષેત્રે યથા વૃદ્ધિર્દાનસ્ય જગતીપતે ।
પુષ્કરિણ્યાં તથા દાનં વર્ધતે નાત્ર સંશયઃ

યવમેકં તુ યો દદ્યાત્સૌવર્ણં મસ્તકે નૃપ ।
પુષ્કરિણ્યાં તથા સ્થાનં યથા સ્થાનં નરે સ્મૃતમ્

સૂર્યગ્રહે તુ યઃ સ્નાત્વા દદ્યાદ્દાનં યથાવિધિ ।
હસ્ત્યશ્વરથરત્નાદિ ગૃહં ગાશ્ચ યુગંધરાન્

સુવર્ણં રજતં વાપિ બ્રાહ્મણેભ્યો દદાતિ યઃ ।
ત્રયોદશ દિનં યાવત્ત્રયોદશગુણં ભવેત્

તિલમિશ્રેણ તોયેન તર્પયેત્પિતૃદેવતાઃ ।
દ્વાદશાબ્દે ભવેત્પ્રીતિસ્તત્ર તીર્થે મહીપતે

યસ્તત્ર કુરુતે શ્રાદ્ધં પાયસૈર્મધુસર્પિષા ।
શ્રાદ્ધદો લભતે સ્વર્ગં પિત્ઃણાં દત્તમક્ષયમ્

અક્ષતૈર્બદરૈર્બિલ્વૈરિઙ્ગુદૈર્વા તિલૈઃ સહ ।
અક્ષયં ફલમાપ્નોતિ તસ્મિંસ્તીર્થે ન સંશયઃ

તત્ર સ્નાત્વા તુ યો દેવં પૂજયેચ્ચ દિવાકરમ્ ।
આદિત્યહૃદયં જપ્ત્વા પુનરાદિત્યમર્ચયેત્ ।
સ ગચ્છેત્પરમં લોકં ત્રિદશૈરપિ વન્દિતમ્

ઋચમેકાં જપેદ્યસ્તુ યજુર્વા સામ એવ ચ ।
સ સમગ્રસ્ય વેદસ્ય ફલમાપ્નોતિ વૈ નૃપ

યસ્ત્ર્યક્ષરં જપેન્મન્ત્રં ધ્યાયમાનો દિવાકરમ્ ।
આદિત્યહૃદયં જપ્ત્વા મુચ્યતે સર્વપાતકૈઃ

યસ્તત્ર વિધિવત્પ્રાણાંસ્ત્યજતે નૃપસત્તમ ।
સ ગચ્છેત્પરમં સ્થાનં યત્ર દેવો દિવાકરઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે પુષ્કરિણ્યામાદિત્યતીર્થમાહાત્મ્યવર્ણનં નામૈકોનષષ્ટિતમોઽધ્યાયઃ ॥