Skanda Purana · Verses 5.55-3

uttānapāda uvāca -
māhātmyaṃ tīrthajaṃ dṛṣṭvā citraseno nareśvaraḥ /
kiṃ cakāra kva vā vāsaṃ kimāhāro babhūva ha

īśvara uvāca -
bhṛgutuṅgaṃ samāruhya aiśānīṃ diśamāśritaḥ /
tapaścacāra vipulaṃ kuṇḍe tatra nṛpottamaḥ

sarvān devān hṛdi dhyātvā brahmaviṣṇumaheśvarān /
vicikṣepa yadātmānaṃ pratyakṣau rudrakeśavau /
kare gṛhītvā rājānaṃ rudro vacanamabravīt

īśvara uvāca -
prāṇatyāgaṃ mahārāja mā kāle tvaṃ kṛthā vṛthā /
adyāpyasi yuvā tvaṃ vai na yuktaṃ maraṇaṃ tava

svasthānaṃ gaccha śīghraṃ tvaṃ bhuktvā bhogānyathepsitān /
kuru niṣkaṇṭakaṃ rājyaṃ nāke śakra ivāparaḥ

citrasena uvāca -
na rājyaṃ kāmaye deva na putrānna ca bāndhavān /
na bhāryāṃ na ca kośaṃ ca na gajānna turaṃgamān

muñca muñca mahādeva mā vighnaḥ kriyatāṃ mama /
svargaprāptirmamādyaiva tvatprasādānmaheśvara

īśvara uvāca -
yasyāgrato bhavedbrahmā viṣṇuḥ śambhustathaiva ca /
svargeṇa tasya kiṃ kāryaṃ sa gataḥ kiṃ kariṣyati

tuṣṭā vayaṃ trayo devā vṛṇīṣva varamuttamam /
yathepsitaṃ mahārāja satyametadasaṃśayam

citrasena uvāca -
yadi tuṣṭāstrayo devā brahmaviṣṇumaheśvarāḥ /
adyaprabhṛti yuṣmābhiḥ sthātavyamiha sarvadā

gayāśiro yathā puṇyaṃ kṛtaṃ yuṣmābhireva ca /
tathaivedaṃ prakartavyaṃ śūlabhedaṃ ca pāvanam

yatrayatra sthitā yūyaṃ tatratatra vasāmyaham /
gaṇānāṃ caiva sarveṣāmādhipatyamathāstu me

īśvara uvāca -
adyaprabhṛti tiṣṭhāmaḥ śūlabhede nareśvara /
trikālāṃ hi trayo devāḥ kalāṃśena vasāmahe

nandisaṃjño gaṇādhīśo bhaviṣyati bhavāndhruvam /
matsamīpe tu bhavata ādau pūjā bhaviṣyati

prakṣipya tāni cāsthīni yatra dīrghatapā yayau /
sakuṭumbo vimānasthaḥ svargatastvaṃ tathā kuru

evaṃ devā varaṃ dattvā citrasenāya pārthiva /
kuṇḍamūrdhani yāmyāyāṃ trayo devāstadā sthitāḥ

parasparaṃ vadantyevaṃ puṇyatīrthamidaṃ param /
yathā hi gayāśiraḥ puṇyaṃ pūrvameva paṭhyate /
tathā revātaṭe puṇyaṃ śūlabhedaṃ na saṃśayaḥ

īśvara uvāca -
idaṃ tīrthaṃ tathā puṇyaṃ yathā puṇyaṃ gayāśiraḥ /
sakṛtpiṇḍodakenaiva naro nirmalatāṃ vrajet

ekaṃ gayāśiro muktvā sarvatīrthāni bhūpate /
śūlabhedasya tīrthasya kalāṃ nārhanti ṣoḍaśīm

kuṇḍamudīcyāṃ yāmyāyāṃ daśahastapramāṇataḥ /
raudravāruṇakāṣṭhāyāṃ pramāṇaṃ caikaviṃśati

etatpramāṇaṃ tattīrthaṃ piṇḍadānādikarmasu /
nādharmaniratā dātuṃ labhante dānamatra hi

viṣṇustu pitṛrūpeṇa brahmarūpī pitāmahaḥ /
prapitāmaho rudro'bhūdevaṃ tripuruṣāḥ sthitāḥ

kadā paśyati tīrthaṃ vai kadā nastārayiṣyati /
iti pratīkṣāṃ kurvanti putrāṇāṃ satataṃ nṛpa /
śūlabhede naraḥ snātvā dṛṣṭvā śūladharaṃ sakṛt

nāputro nādhano rogī saptajanmasu jāyate /
ekaviṃśatiṃ pituḥ pakṣe mātuśvaivekaviṃśatim

bhāryāpakṣe daśaiveha kulānyetāni tārayet /
śūlabhedavane rājañchākamūlaphalairapi

ekasminbhojite vipre koṭīrbhavati bhojitā /
pañcasthāneṣu yaḥ śrāddhaṃ kurute bhaktimānnaraḥ

kulāni pretabhūtāni sarvāṇyapi hi tārayet /
dvijadevaprasādena pitṝṇāṃ ca prasādataḥ

śrāddhado nivasettatra yatra devo maheśvaraḥ /
syurātmaghātino ye ca gobrāhmaṇahanāśca ye

daṃṣṭribhirjalapāte ca vidyutpāteṣu ye mṛtāḥ /
na yeṣāmagnisaṃskāro nāśaucaṃ nodakakriyā

tatra tīrthe tu yasteṣāṃ śrāddhaṃ kurvīta bhaktitaḥ /
mokṣāvāptirbhavetteṣāṃ yugamekaṃ na saṃśayaḥ

ajñānādyatkṛtaṃ pāpaṃ bālabhāvācca yatkṛtam /
tatsarvaṃ nāśayetpāpaṃ snānamātreṇa bhūpate

rajakena yathā dhautaṃ vastraṃ bhavati nirmalam /
tathā pāpo'pi tattīrthe snāto bhavati nirmalaḥ

saṃnyāsaṃ kurute yo'tra tīrthe vidhisamanvitam /
dhyāyannityaṃ mahādevaṃ sa gacchetparamaṃ padam

krīḍitvā sa yathākāmaṃ svecchayā śivamandire /
vedavedāṅgatattvajño jāyate'sau śubhe kule

rūpavānsubhagaścaiva sarvavyādhivivarjitaḥ /
rājā vā rājaputro vācārasamanvitaḥ

etatte kathitaṃ rājaṃstīrthasya phalamuttamam /
yacchrutvā mānavo nityaṃ mucyate sarvakilbiṣaiḥ

ya idaṃ śrāvayennityamākhyānaṃ dvijapuṃgavān /
śrāddhe devakule vāpi paṭhetparvaṇi parvaṇi

gīrvāṇāstasya tuṣyanti manuṣyāḥ pitṛbhiḥ saha /
paṭhatāṃ śṛṇvatāṃ caiva naśyate sarvapātakam

likhitvā tīrthamāhātmyaṃ brāhmaṇebhyo dadāti yaḥ /
jātismaratvaṃ labhate prāpnotyabhimataṃ phalam

rudraloke vasettāvadyāvadakṣaramanvitam

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūlabhedamāhātmye kāśīrājamokṣagamanaṃ nāma pañcapañcāśattamo'dhyāyaḥ //