Skanda Purana · Verses 5.55-2

// // śrīīśvara uvāca // //
paṃcādhikaṃ vijānīhi paṃcāśattamamīśvaram //
siṃheśvaraṃ varārohe mahābhayavināśanama

sadyaḥkalpe tvayā devi madarthaṃ hi mahattapaḥ //
kṛtaṃ nīlotpalāpāṃgi bhīṣaṇaṃ saṃśitavratam //
tapasā tava raudreṇa dagdhaṃ hi bhuvanatrayam

duṣkaraṃ hi tapo jñātvā bhagavāṃ ścaturānanaḥ //
āgatyovāca deveśo devi tvāṃ śubhayā girā

kiṃ putri prāptukāmāsi kimalabhyaṃ dadāmi te //
viramyatāmatikleśātta paso'smānmamājñayā

tvayā ca vacanaṃ śrutvā gurorgauravagarbhitam //
priyaṃ tathyaṃ hitaṃ tatra varṇanirṇītavāṃchitam

pratyuktaḥ sa tadā brahmā praṇāmanamrayā tvayā //
tapasā duṣkareṇāptaḥ patitve śaṃkaro mayā

sa māṃ śyāmalavarṇeti bahuśaḥ proktavānbhavaḥ //
śyāmāhaṃ kāṃcanākārā vallabhena ca saṃyutā //
bharttā bhūtapatirvaśyaḥ kathaṃ syāditi me tapaḥ

tvadīyaṃ vacanaṃ śrutvā varārho varadaḥ prabhuḥ //
evaṃ bhaviṣyatītyāha brahmā lokapitāmahaḥ

kiyatā caiva kālena vāṃchāsiddhirbhaviṣyati //
gaurīnāmnā tu te mūrttiḥ kāṃtyā dīptā bhaviṣyati

etacchrutvā tvayā vākyaṃ brahmaṇaḥ parameṣṭhinaḥ //
kruddhā tvaṃ girije'tyarthaṃ kāle'bhīṣṭaṃ bhaviṣyati

krodhātsiṃhaḥ samudbhūto vadanātte bhayāvahaḥ //
vivṛtāsyo mahāraudro jaṭājaṭilakaṃdharaḥ

proddhūtavalgulāṃgūlo daṃṣṭrotkaṭamukhotkaṭaḥ //
tasyāsye patituṃ devi vyavasāyaḥ kṛtastvayā

so'pi siṃhaḥ kṣudhāviṣṭastvāṃ bhakṣayitumudyataḥ //
na caivāsau samartho'bhūdvīkṣituṃ vā tapodhikām

sa dahyamānaḥ sahasā tejasā tapasā tava //
parāṅmukhaḥ samabhavatprāṇatrāṇaparāyaṇaḥ

tatastavābhūtkaruṇā siṃhaṃ prati yatavrate //
kṣudhitasya tvayā tasya kṣīraṃ hyamṛtasannibham

utpāditaṃ stanābhyāṃ tu tasya siṃhasya kāraṇāta //
tathāpi dahyate'tyarthaṃ duṣṭabhāvaṃ yato gataḥ

tenoktaṃ dahyamānena mātardagdhosmi tejasā //
tvadīyena durācāro duṣṭohaṃ pāpavigrahaḥ

tvāmattukāmo duṣṭātmā tvayāhaṃ janito'dhunā //
tasmādyāsyāmi narakaṃ mātṛhā gurughātakaḥ

tasya tadvacanaṃ śrutvā duḥkhitasya sutasya tu //
mamatvena viśālākṣi siṃhasya kathitaṃ tvayā

adhamaṃ vidyate kṣetraṃ mahākālavanaṃ suta//
tatra gaccha mamāde śācchīghraṃ devavinimitam

kaṃṭeśvarasya devasya samīpe liṃgamuttamam //
siṃhanādātsamutpannaṃ śaṃkarasya mahātmanaḥ

aṃdhakāsurayuddhe vai pīḍite vāsave purā //
tvadīyaṃ vacanaṃ śrutvā siṃhastvaritavikramaḥ

gato mahākālavanaṃ dṛṣṭo devo'tha tatkṣaṇāt//
divyadeho mṛgāristu jāto liṃgasya darśanāt

mamatvāttasya liṃgasya tvaṃ gatā tatra pārvati //
siṃhikārūpamāsthāya śīghraṃ siṃhastvayā priye

dṛṣṭo divyaśarīrastu liṃgasyāsya prabhāvataḥ //
tava tuṣṭiḥ parā jātā dṛṣṭvā siṃhaṃ mahādyutim

kṛtaṃ nāma tvayā devi liṃgasyāsya varānane //
divyadehastu sihoyaṃ jāto liṃgasya darśanāt

ataḥ siṃheśvaro devo bhuvi khyāto bhaviṣyati //
etasminnaṃtare brahmā saṃprāptastatra suvrate //
uvāca tvāṃ varārohe devaiḥ parivṛtastadā

ya eṣa siṃhaḥ saṃbhūtastava krodhātsuto yataḥ //
tato'sau vāhano devi bhaviṣyati na saṃśayaḥ

liṃgaṃ siṃheśvaraṃ bhaktyā yaḥ paśyati samāhitaḥ //
tasya vāso'kṣayo divyo bhaviṣyati triviṣṭape

kīrtanānmucyate pāpāddṛṣṭvā bhadrāṇi paśyati //
sparśanādasya liṃgasya punātyāsaptamaṃ kulam

manasā ciṃtitānkāmāṃstāṃśca prāpnoti puṣkalān //
tadaiva puruṣo mukto janmaduḥkhajarādibhiḥ

yadā paśyati siṃheśaṃ saṃsārārṇavatārakam //
vyālavyāghrādayaścaurāstathā sāhasikāśca ye

tebhyo bhayaṃ na bhavati śrīsiṃheśvaradarśanāt //
yajñānāṃ tapasāṃ caiva dānādīnāṃ ca yatphalam //
tatphalaṃ jāyate samyagdṛṣṭvā siṃheśvaraṃ śivam

madīyaṃ lokamāpnoti surāsuranamaskṛtam //
yaḥ paśyati prayatnena devaṃ siṃheśvaraṃ tadā

ityuktvāsau jagāmātha brahmā loke svakaṃ priye //
yadvapustava pūrvaṃ syātkālakāṃtikalaṃkitam //
prabhāvāttapasastasya gauratvaṃ prāptamadbhutam

eṣa te kathito devi prabhāvaḥ pāpanāśanaḥ //
siṃheśvarasya devasya revaṃteśamataḥ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṃḍe caturaśītiliṃgamāhātmye siṃheśvaramāhātmyavarṇanaṃnāma paṃcapaṃcāśattamo'dhyāyaḥ //