સ્કંદ પુરાણ · શ્લોક 5.55-2

॥ ॥ શ્રીઈશ્વર ઉવાચ ॥ ॥
પંચાધિકં વિજાનીહિ પંચાશત્તમમીશ્વરમ્ ॥
સિંહેશ્વરં વરારોહે મહાભયવિનાશનમ

સદ્યઃકલ્પે ત્વયા દેવિ મદર્થં હિ મહત્તપઃ ॥
કૃતં નીલોત્પલાપાંગિ ભીષણં સંશિતવ્રતમ્ ॥
તપસા તવ રૌદ્રેણ દગ્ધં હિ ભુવનત્રયમ્

દુષ્કરં હિ તપો જ્ઞાત્વા ભગવાં શ્ચતુરાનનઃ ॥
આગત્યોવાચ દેવેશો દેવિ ત્વાં શુભયા ગિરા

કિં પુત્રિ પ્રાપ્તુકામાસિ કિમલભ્યં દદામિ તે ॥
વિરમ્યતામતિક્લેશાત્ત પસોઽસ્માન્મમાજ્ઞયા

ત્વયા ચ વચનં શ્રુત્વા ગુરોર્ગૌરવગર્ભિતમ્ ॥
પ્રિયં તથ્યં હિતં તત્ર વર્ણનિર્ણીતવાંછિતમ્

પ્રત્યુક્તઃ સ તદા બ્રહ્મા પ્રણામનમ્રયા ત્વયા ॥
તપસા દુષ્કરેણાપ્તઃ પતિત્વે શંકરો મયા

સ માં શ્યામલવર્ણેતિ બહુશઃ પ્રોક્તવાન્ભવઃ ॥
શ્યામાહં કાંચનાકારા વલ્લભેન ચ સંયુતા ॥
ભર્ત્તા ભૂતપતિર્વશ્યઃ કથં સ્યાદિતિ મે તપઃ

ત્વદીયં વચનં શ્રુત્વા વરાર્હો વરદઃ પ્રભુઃ ॥
એવં ભવિષ્યતીત્યાહ બ્રહ્મા લોકપિતામહઃ

કિયતા ચૈવ કાલેન વાંછાસિદ્ધિર્ભવિષ્યતિ ॥
ગૌરીનામ્ના તુ તે મૂર્ત્તિઃ કાંત્યા દીપ્તા ભવિષ્યતિ

એતચ્છ્રુત્વા ત્વયા વાક્યં બ્રહ્મણઃ પરમેષ્ઠિનઃ ॥
ક્રુદ્ધા ત્વં ગિરિજેઽત્યર્થં કાલેઽભીષ્ટં ભવિષ્યતિ

ક્રોધાત્સિંહઃ સમુદ્ભૂતો વદનાત્તે ભયાવહઃ ॥
વિવૃતાસ્યો મહારૌદ્રો જટાજટિલકંધરઃ

પ્રોદ્ધૂતવલ્ગુલાંગૂલો દંષ્ટ્રોત્કટમુખોત્કટઃ ॥
તસ્યાસ્યે પતિતું દેવિ વ્યવસાયઃ કૃતસ્ત્વયા

સોઽપિ સિંહઃ ક્ષુધાવિષ્ટસ્ત્વાં ભક્ષયિતુમુદ્યતઃ ॥
ન ચૈવાસૌ સમર્થોઽભૂદ્વીક્ષિતું વા તપોધિકામ્

સ દહ્યમાનઃ સહસા તેજસા તપસા તવ ॥
પરાઙ્મુખઃ સમભવત્પ્રાણત્રાણપરાયણઃ

તતસ્તવાભૂત્કરુણા સિંહં પ્રતિ યતવ્રતે ॥
ક્ષુધિતસ્ય ત્વયા તસ્ય ક્ષીરં હ્યમૃતસન્નિભમ્

ઉત્પાદિતં સ્તનાભ્યાં તુ તસ્ય સિંહસ્ય કારણાત ॥
તથાપિ દહ્યતેઽત્યર્થં દુષ્ટભાવં યતો ગતઃ

તેનોક્તં દહ્યમાનેન માતર્દગ્ધોસ્મિ તેજસા ॥
ત્વદીયેન દુરાચારો દુષ્ટોહં પાપવિગ્રહઃ

ત્વામત્તુકામો દુષ્ટાત્મા ત્વયાહં જનિતોઽધુના ॥
તસ્માદ્યાસ્યામિ નરકં માતૃહા ગુરુઘાતકઃ

તસ્ય તદ્વચનં શ્રુત્વા દુઃખિતસ્ય સુતસ્ય તુ ॥
મમત્વેન વિશાલાક્ષિ સિંહસ્ય કથિતં ત્વયા

અધમં વિદ્યતે ક્ષેત્રં મહાકાલવનં સુત॥
તત્ર ગચ્છ મમાદે શાચ્છીઘ્રં દેવવિનિમિતમ્

કંટેશ્વરસ્ય દેવસ્ય સમીપે લિંગમુત્તમમ્ ॥
સિંહનાદાત્સમુત્પન્નં શંકરસ્ય મહાત્મનઃ

અંધકાસુરયુદ્ધે વૈ પીડિતે વાસવે પુરા ॥
ત્વદીયં વચનં શ્રુત્વા સિંહસ્ત્વરિતવિક્રમઃ

ગતો મહાકાલવનં દૃષ્ટો દેવોઽથ તત્ક્ષણાત્॥
દિવ્યદેહો મૃગારિસ્તુ જાતો લિંગસ્ય દર્શનાત્

મમત્વાત્તસ્ય લિંગસ્ય ત્વં ગતા તત્ર પાર્વતિ ॥
સિંહિકારૂપમાસ્થાય શીઘ્રં સિંહસ્ત્વયા પ્રિયે

દૃષ્ટો દિવ્યશરીરસ્તુ લિંગસ્યાસ્ય પ્રભાવતઃ ॥
તવ તુષ્ટિઃ પરા જાતા દૃષ્ટ્વા સિંહં મહાદ્યુતિમ્

કૃતં નામ ત્વયા દેવિ લિંગસ્યાસ્ય વરાનને ॥
દિવ્યદેહસ્તુ સિહોયં જાતો લિંગસ્ય દર્શનાત્

અતઃ સિંહેશ્વરો દેવો ભુવિ ખ્યાતો ભવિષ્યતિ ॥
એતસ્મિન્નંતરે બ્રહ્મા સંપ્રાપ્તસ્તત્ર સુવ્રતે ॥
ઉવાચ ત્વાં વરારોહે દેવૈઃ પરિવૃતસ્તદા

ય એષ સિંહઃ સંભૂતસ્તવ ક્રોધાત્સુતો યતઃ ॥
તતોઽસૌ વાહનો દેવિ ભવિષ્યતિ ન સંશયઃ

લિંગં સિંહેશ્વરં ભક્ત્યા યઃ પશ્યતિ સમાહિતઃ ॥
તસ્ય વાસોઽક્ષયો દિવ્યો ભવિષ્યતિ ત્રિવિષ્ટપે

કીર્તનાન્મુચ્યતે પાપાદ્દૃષ્ટ્વા ભદ્રાણિ પશ્યતિ ॥
સ્પર્શનાદસ્ય લિંગસ્ય પુનાત્યાસપ્તમં કુલમ્

મનસા ચિંતિતાન્કામાંસ્તાંશ્ચ પ્રાપ્નોતિ પુષ્કલાન્ ॥
તદૈવ પુરુષો મુક્તો જન્મદુઃખજરાદિભિઃ

યદા પશ્યતિ સિંહેશં સંસારાર્ણવતારકમ્ ॥
વ્યાલવ્યાઘ્રાદયશ્ચૌરાસ્તથા સાહસિકાશ્ચ યે

તેભ્યો ભયં ન ભવતિ શ્રીસિંહેશ્વરદર્શનાત્ ॥
યજ્ઞાનાં તપસાં ચૈવ દાનાદીનાં ચ યત્ફલમ્ ॥
તત્ફલં જાયતે સમ્યગ્દૃષ્ટ્વા સિંહેશ્વરં શિવમ્

મદીયં લોકમાપ્નોતિ સુરાસુરનમસ્કૃતમ્ ॥
યઃ પશ્યતિ પ્રયત્નેન દેવં સિંહેશ્વરં તદા

ઇત્યુક્ત્વાસૌ જગામાથ બ્રહ્મા લોકે સ્વકં પ્રિયે ॥
યદ્વપુસ્તવ પૂર્વં સ્યાત્કાલકાંતિકલંકિતમ્ ॥
પ્રભાવાત્તપસસ્તસ્ય ગૌરત્વં પ્રાપ્તમદ્ભુતમ્

એષ તે કથિતો દેવિ પ્રભાવઃ પાપનાશનઃ ॥
સિંહેશ્વરસ્ય દેવસ્ય રેવંતેશમતઃ શૃણુ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં પંચમ આવંત્યખંડે ચતુરશીતિલિંગમાહાત્મ્યે સિંહેશ્વરમાહાત્મ્યવર્ણનંનામ પંચપંચાશત્તમોઽધ્યાયઃ ॥