Skanda Purana · Chapter 5.55

// vyāsa uvāca // //
ko'sau viṃdhyagirirbrahmankadā kāle samāgataḥ //
mahākālavane ramye kena vā preṣitaḥ purā

// sanatkumāra uvāca // //
purā revājalairvyāsa plāviteyaṃ vasuṃdharā //
tadā sarvasurairevamagastirmunisattamaḥ

ārādhito mahābhāgo dharaṇītrāṇakāraṇāt//
tadāgatya girau ramye viṃdhye sa munisattama

ekāgramānaso bhūtvā bhavānīṃ viṃdhyavāsinīm //
ārādhayāmāsa tadā tāṃ ca devīṃ varepsayā

kaṃsavidrāvaṇakarīmasurāṇāṃ kṣayaṃkarīm//
bhārāvatāraṇīṃ puṇyāṃ baladevānujāṃ śubhām

yaśodāgarbhasaṃbhūtāṃ cāṇūrabalamardinīm//
vidyudābhāṃ nabhaḥsthāṃ ca kṛṣṇāṃ kṛṣṇāhimardinīm

jananīṃ devasenasya kavīnāṃ vācamīśvarīm //
gāyatrīṃ dvijamukhyānāṃ vyāhṛtiśchaṃdasāṃ varām

sahasrākṣīṃ tatheṃdrasya ṛṣeścāruṃdhatīṃ parām //
gavāṃ kāmadughāṃ śyāmāṃ latāṃ madhutamapriyām

aditiṃ sarvamātṝṇāṃ pārvatīṃ sarvayoṣitām //
jyotsnāṃ cāṃdramasīṃ bālāṃ sarvakāmavarapradām

śāradīmṛtuvelāyāṃ vṛṃdāvanacarīṃ varām //
māyināṃ vaiṣṇavīṃ māyāṃ sarvadaityavimohinīm

lakṣmīṃ ca śrīmatāmiṣṭāṃ yakṣiṇīṃ dhanadārcitām //
mahodadhīpsitāṃ velāṃ rājñāṃ ca rājasaṃpadam //

vedikāṃ yajñaśālānāṃ havirāhavanīṃ śubhām /
dakṣiṇāṃ sarvadīkṣāṇāṃ sarvakāmaphalapradām

evaṃ stutā tadā devī pratyakṣā viṃdhyavāsinī //
prāha prasādasumukhī ṛṣīṇāṃ pravaraṃ hyṛṣim

viyatāṃ bho dvijaśreṣṭha yadasmatto'bhivāṃchitam//
yadīpsitā tvayā vatsa stutirme śucinā kṛtā//

// agastiruvāca // //
yadi mātarvaro deyo devānāmupakāriṇi //
reveyaṃ varddhitā loke sarvalokabhayapradā

tayedaṃ plāvitaṃ viśvaṃ tasyāstu grahaṇaṃ kuru //
iti sā prārthitā tena tadā kāle maharṣiṇā

āgātsādhvī tadā vyāsa mahākālavanaṃ śubham//
sāṃtvapūrvaṃ vacastathyamagasti midamabravīt

vārayiṣye parāṃ devīṃ vardhamānāṃ drutaṃ hyṛṣe //
tāvatkālaṃ na cottiṣṭhedviṃdhyo nāma mahāgiriḥ

yāvattrikūṭe dvāre tvaṃ sthāsya si ṛṣisattama //
devakāryodyato nityaṃ dakṣiṇāṃ diśamuttamām

kuśasthalī mahāpuṇyā pavitrā pāpahāriṇī //
purī hyeṣā muniśreṣṭha triṣu lokeṣu viśrutā //
tatraivāhaṃ ciraṃ kālaṃ mātṛbhirnivasāmi vai

tatrāpi tvaṃ sadā siddhakṣetrādhipatyamāpnuyāḥ //
matsaro nirmalaṃ puṇyaṃ vimalodaṃ ca viśru tam

yatra puṇyavatāṃ vāso devyastiṣṭhaṃti koṭiśaḥ //
tasmiṃstīrthe narāḥ snātvā śucībhūya samāhitāḥ

yajaṃti caiva māṃ bhaktyā dhūpadīpāgnitarpaṇaiḥ //
kṣīrakhaṃḍājyabhojyaiśca bhojayedvidhivaddvijān

na teṣāṃ durlabhaṃ kiṃcittriṣu lokeṣu vidyate //
dhanadhānyadharaiśvaryaputradārādisaṃ padām

prāpyaṃte vividhā bhogā devānāmapi durlabhāḥ //
śatruto na bhayaṃ teṣāṃ dasyubhyo vā na rājataḥ

na śastrānalatoyaughātkadā citsaṃbhaviṣyati //
dīrghāyurbuddhimām̐lloke uṣitvā śāśvatīḥ samāḥ

sarvapāpaviśuddhātmā mṛtaḥ śivapuraṃ vrajet //
evaṃ vyāsa purīṃ prāpya ramyāṃ cojjayinīṃ śubhām २७//
samāśritā tadā devī satataṃ viṃdhyavāsinī //
tasmiṃstīrthe naraḥ snātvā sarvapāpaiḥ pramucyate

striyo vā rajo doṣārtā vaṃdhyāḥ kākabakādikāḥ//
durbhagāḥ śīlahīnāśca sarvakāmavivarjitāḥ

vimalode'pi tāḥ snātvā dṛṣṭvā vai viṃdhyavāsinīm//
mucyaṃte sarvado ṣaistā nātra kāryā vicāraṇā

aputrā prāpnuyuḥ putrānkanyā vīrapatiṃ varam //
prāpyate sarvasaubhāgyaṃ sarvakāmavarapradam

vidyāvāñjāyate vipraḥ kṣatriyo vijayī bhavet //
vaiśyaśca bahulābhāḍhyaḥ śūdraḥ sukhamathāśnute

kathāṃ puṇyavatīmetāṃ sarvakāmavarapradām//
paṭhanvāpyathavā śṛṇvangosahasraphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye viṃdhyavāsinī vimalodatīrthamāhātmyavarṇanaṃnāma pañcapañcāśattamo'dhyāyaḥ