Skanda Purana · Chapter 5.54

// vyāsa uvāca // //
bhūyastu śrotumicchāmi tvatto brahmavidāṃvara //
nīlagaṃgā kadā brahmañchiprākuṃḍe samāgatā

// sanatkumāra uvāca // //
śṛṇu vyāsa mahātīrthaṃ sarvatīrthaphala pradam //
nīlagaṃgāṃ naraḥ snātvā saṃgameśvaramarcayet

duḥsaṃgasaṃbhavā doṣā na bhavaṃti kadācana //
ekadā brahmaloke vai gaṃgā tripathagā nadī

gatā punaṃtī trīllokānnīlavāsā śucārditā //
bhagavankimidaṃ jātaṃ pātakaṃ me kṛtaṃ purā

duṣṭācārāparādhena yenemāṃ prāpitā daśām //
sarvalokeṣu yatkiṃcijanānāṃ pātakaṃ bhuvi

tatsarvaṃ tiṣṭhati mayi sarveṣāmapi dehinām //
tenāhaṃ vai bharākrāṃtā no śakyā calituṃ dharām

nīlabhāsā vivarṇā ca sarvadharmabahirmukhā //
yatkiṃcitkriyate karma śubhaṃ vā yadi vā'śubham

mayi tyaktvā punaṃtīha jaṃtavaḥ sarvaśo'malāḥ //
tiṣṭhaṃti puṇyalokeṣu bhuktimuktipradeṣu ca

asmākaṃ ca mahatkaṣṭaṃ jātaṃ dhātaḥ paraṃ malam //
na hi śarma na vai śāṃtirna nidrā na ca nirvṛtiḥ

na loke ca sthitirmedya pāpiṣṭhāyāḥ sanātanī //
duṣṭasaṃgodbhavaidoṃṣaiḥ plāvitāhaṃ jagadguro

kiṃ karomi kva gacchāmi yena śāṃtirbhavenmama //
kiṃ tapaḥ kiṃ ca dānaṃ me kiṃ tīrthaṃ kiṃ ca sādhanam

yenāhaṃ pāpaliptāṃgī punaḥ prakṛtimāpnuyām //
evaṃ jñātvā mahāyo ginyathā yogyaṃ tathā kuru

// brahmovāca // //
śrūyatāṃ bhoḥ saricchreṣṭhe kāraṇaṃ pāpanāśanam //
mahākālavane ramye purī hyeṣā 'marāvatī

tatra śiprā saricchreṣṭhā vartate bhuvi pāvanī//
tasyā darśanamātreṇa sarvapāpakṣayo bhavet

tatra gaccha mahābhāge sadyaścātma viśuddhaye //
brahmaṇeti samākhyātaṃ śrutvā gaṃgā saridvarā

tamabhijñāya saṃprāptā mahākālavanaṃ śubham //
puṣkarasyāgnibhāge ca yatra devo marutsutaḥ

viṃdhyasya cottare bhāge aṃjanyāśramamuttamam//
sā putreṇa tapastepe pavitrā brahmacāriṇī

pativratābhiḥ sarvābhiḥ patibhirbrahmacāribhiḥ //
devāṃganābhirbahubhiḥ krīḍadbhirbālakuṃjaraiḥ

sarasīphullakalhārairmattālikulanāditaiḥ //
nirvairajaṃtubhiḥ sevyaṃ brahmarṣigaṇase vitam

manohrādakaraṃ puṇyaṃ pavitraṃ pāpanāśanam //
tatra praveśamātreṇa nīlavāsāḥ saridvarā

śuklavāsā'bhavatsadyo naṣṭapāpamalā 'śubhā //
śaraccaṃdranibhākārā dhūtapāpā payasvinī

tatraiva cāśramaṃ cakre manaḥsaṃharṣakāraṇam //
tatprabhṛti samākhyātaṃ sarvalokeṣu puṇyadam //

nīlagaṃgeti vai vyāsa tīrthaṃ kilviṣanāśanam //
asmiṃstīrthe naraḥ snātvā hanumaṃtamathārcayet

tasya siddhiḥ karagatā bhaviṣyati na saṃśayaḥ //
āśvine māsi saṃprāpte kṛṣṇapakṣe samāhitaḥ

darśe pitṝnsamuddiśya śrāddhaṃ kuryānmahālayam //
tāritaṃ ca kulaṃ sarvaṃ tenātmaikottaraṃ śatam

samagotreṣu ye jātāḥ pūrvajā nirayavāsinaḥ //
te sarve sadgatiṃ yāṃti teṣāṃ lokāḥ sanātanāḥ

snātvā tilāṃjaliṃ dadyātpitṝ nuddiśya tatparaḥ //
akṣayā jāyate tṛptiḥ svargaloke mahīyate

bhojayedbrāhmaṇānsapta śrāddhaṃ kṛtvā tu pāyasaiḥ //
akṣayaṃ labhate śrāddha maśvamedhaphalaṃ bhavet

tīrthaṃ puṇyataraṃ vyāsa śṛṇu cānyadvadāmi te //
dugdhakuṃḍamiti khyātaṃ triṣu lokeṣu viśrutam // २९ /
sarvapāpaharaṃ puṇyaṃ sarvakāmavarapradam//
purā dugdhadharā devī pṛthunā dharmamūrtinā

dugdhaṃ sarvaṃ havirbhāvyaṃ sarveṣāṃ jīvanapradam //
dattaṃ nidhāya kuṃḍesmiṃstena dugdhasaraḥ smṛtam

kuṃḍe snātvā payaḥ pītvā dattvā gāṃ ca payasvinīm //
sarvabādhāvinirmukto dhanadhānyasamanvitaḥ //

jāyate sarvakāleṣu mṛtaḥ svargapuraṃ vrajet //
tataḥ puṣkaramāsādya snānadānādikaṃ caret

sarvapāpaviśuddhātmā puṣkarasya phalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe'vantīkṣetramāhātmye nīlagaṃgāmāhātmyavarṇanaṃnāma catuḥpaṃcāśattamo'dhyāyaḥ