Skanda Purana · Verses 5.53-2

// īśvara uvāca // //
tripaṃcāśattamaṃ viddhi suprasiddhamatheśvaram //
paraṃ viśveśvaraṃ khyātaṃ viśveṣu bhuvaneṣvapi

babhūva nṛpatiḥ pūrvaṃ vidarbhāyāṃ vidūrathaḥ //
sontaḥpurāyutopetaṃ cakre rājyamakaṃṭakam

jaghāna tāpasaṃ so'tha pramādānmṛgayā gataḥ //
kṛṣṇājinadharaṃ śāṃtaṃ dhyāyaṃtaṃ brahma śāśvatam

mṛgaṃ matvā mahāraṇye brāhmaṇaṃ devamohitaḥ //
tena karmavipākena dehāṃte rauravaṃ gataḥ

tatrāsau yātanā ghorāṃ anubhūyātmakālataḥ //
tasmādihāgato marttye sarpo viṣadharo'bhavat

adaśatso'pi kopena brāhmaṇaṃ caraṇe priye //
lakuṭena hataḥ so'pi paṃcatvaṃ tatkṣaṇādgataḥ

cyutastu narakātsiṃho dvitīye'bhūtsudāruṇaḥ //
rājānaṃ bhakṣayāmāsa rājalokairnipātitaḥ

punarvyāghro babhūvāsau tṛtīye'pi bhavāṃtare //
tīkṣṇapādanakhairghorairghātayāmāsa sūkarān

tenāpi vaiśyo nidhanaṃ nītaḥ kaścidvanāṃtare //
niṣādairnihataḥ so'pi bāṇaiḥ paṃcatvamāgataḥ

caturthe 'pi gajo jātaḥ siṃhādvadhamavāptavān //
paṃcame makaro jātaḥ kṣārāṃbhasi mahodadhau // / 5.2.53.१० //
snātukāmāmatho rāmāmājaghānātipāpakṛt //
dhīvaraiḥ kṛtadhikkārairbaḍiśaiḥ sannipātitaḥ

punaḥ ṣaṣṭhe bhave jātaḥ piśācaḥ piśitāśanaḥ //
siddhamaṃtrairathodagrairatharvaprabhavairbhṛśam

maṃtrī maṃtravidāṃ śreṣṭho brāhmaṇastaṃ jaghāna ha //
saptame sa punarjāto durnirīkṣyavapurbhṛśam

tīkṣṇadaṃṣṭraḥ karālāsyo māṃsaśoṇitabhojanaḥ //
śuṣkāṃgo marubhūmīṣu pāpiṣṭho brahmarākṣasaḥ

ākramya nimirājena rājñā rākṣasaśatruṇā //
samāropya dhanuḥ saṃkhye brahmāstreṇa nipātitaḥ

dāruṇaḥ sārameyo'bhūdatikṛṣṇo'ṣṭame bhave //
sa śūkarakhurāghātavraṇaiḥ paṃcatvamāgataḥ

navame jaṃbuko jātaḥ śmaśāne sa ca māṃsabhuk //
laulyātsa nidhanaṃ prāpto duḥkhārtto dāvavahninā

daśame tvabhavadgṛdhrastīkṣṇatuṃḍo bhayāvahaḥ //
pūtimāṃsavasāhāro rogeṇa nidhanaṃ gataḥ

ekādaśe 'pi caṃḍālo gato'vaṃtyāṃ varānane //
dravyasya haraṇārthaṃ vai praviṣṭo dvijaveśmani

sa daṃḍapāśikenaiva prāpto baddhaśca tatkṣaṇāt //
ānīto hi vadhārthāya vṛkṣāgre hyavalaṃbitaḥ

tatraiva liṃgamāsannaṃ sādhvi śūleśvarottare //
tasya dṛṣṭipathaṃ prāptamativiklavacetasaḥ

kṣaṇena nidhanaṃ prāptaḥ sa gatastridaśālayam //
tatra bhuktvā varānbhogānavatīrya ca bhūtale

jātaḥ khyāto vidarbhāyāṃ viśveśonāma pārthivaḥ //
jātismaratvamāpanno liṃgadarśanapuṇyataḥ

durlabhānbubhuje bhogānprāptaṃ rājyaṃ cakāra saḥ //
so'bhiṣicya sutaṃ rājye vinītamatidharmavit //
saṃsmaranpūrvavṛttāṃtaṃ jagāmāvaṃtikāṃ purīm

tatra dṛṣṭvā mahalliṃgaṃ durdarśamatitejasā //
divyena cakṣuṣā'paśyalliṃgamadhye carācaram

liṃgamadhye sthitāḥ sarve sāgarāḥ saritastathā //
dvīpāśca parvatāścaiva tathānyā divyabhūtayaḥ

caṃdramāḥ saha nakṣatrairādityaścāgninā saha //
dhanado varuṇaścaiva yamaḥ śakro marutpatiḥ

maruto devagaṃdharvā ṛṣayaśca tapodhanāḥ //
nāgā yakṣāḥ piśācāśca rākṣasā bhīmavikramāḥ

brahmādyā devatāścānyāḥ skaṃdo laṃbodarastathā//
sarvaṃ tribhuvanaṃ devi liṃgamadhye vilokitam

prabhāvaṃ tasya liṃgasya jñātvā samyaṅmahīpatiḥ//
saṃyataḥ pūjayāmāsa viśvayoniṃ maheśvaram

prasannaścābhavattasya vacanaṃ cedamabravīt//
varaṃ varaya bhadraṃ te kimabhīṣṭaṃ dadāmi te

tenoktaṃ vacanaṃ rājñā yadi tuṣṭosi me prabho//
ye tvāṃ paśyaṃti manujāḥ śraddhayā'śraddhayā'thavā

mā bhūtteṣāṃ prapatanaṃ ghore saṃsārasāgare//
viśveśvareti nāmnā vai prasiddho bhava bhūtale

ityukte vacane bhūyo viśveśo'laṃkṛto gaṇaiḥ //
vimānena sudīptena gato lokaṃ madīyakam

gaṇairnānāvidhaiḥ sārddhaṃ stūyamāno varānane //
kirīṭī kuṇḍalī caiva muktāhāravibhūṣitaḥ //
vimānaṃ tasya taddivyaṃ parikramya samaṃtataḥ

samaheṃdradhanādhyakṣanānānākanivāsinaḥ //
munayaḥ siddhagaṃdharvāstathā cāpsarasāṃ gaṇāḥ

nṛtyenāmaranārīṇāṃ vilokitavinodakaḥ //
yugakoṭisahasraṃ tu matsamīpe vyavasthitaḥ

ato devi bhuvi khyāto devo viśveśvareśvaraḥ //
dṛṣṭvā liṃgaṃ ca viśveśaṃ pātakairvipramucyate

saptajanmakṛtairdehī manovākkāyakarmabhiḥ //
dṛṣṭvā viśveśvaraṃ liṃgaṃ kṛtakṛtyatvamāpyate

tasya naśyati daurbhāgyamalakṣmīrnāśameti ca //
prāpnoti dehī kāmāṃśca samṛddhiṃ mānasīṃ sadā

duḥsvapno vyādhayaḥ krūrā grahā bhūtāśca dāruṇāḥ //
praṇaśyanti varārohe viśveśe pūjite sadā

ye kecicchraddhayā yuktā liṃgamārādhayaṃti vai //
te sarvakāma saṃpannā jāyaṃte ca yugeyuge

aṃte gatiśca sā divyā jāyate matprasādataḥ //
yatra saṃpūjyate ligaṃ tasmindeśe śubhāḥ kriyāḥ

na tatra durbhikṣabhayaṃ nāpamṛtyubhayaṃ kvacit //
pretayonau ca vetālā na nāgā na ca daṃṣṭriṇaḥ

ete ca viṣṇubrahmeṃdrakuberavaruṇādayaḥ //
liṃgārcanena saṃprāptāḥ parāṃ siddhiṃ mahaujasaḥ

eṣa te kathito devi prabhāvaḥ pāpanāśanaḥ //
viśveśvarasya devasya kaṇṭeśvaramataḥ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṇḍe caturaśītiliṅgamāhātmye viśveśvaramāhātmyavarṇanaṃnāma tripaṃcā śattamo'dhyāyaḥ