Skanda Purana · Verses 5.52-3

īśvara uvāca -
anyadākhyānakaṃ vakṣye purā vṛttaṃ narādhipa /
sakuṭumbo gataḥ svargaṃ muniryatra mahātapāḥ

uttānapāda uvāca -
kathaṃ nākaṃ gato vipraḥ sakuṭumbo mahānṛṣiḥ /
kautukaṃ paramaṃ deva kathayasva mama prabho

īśvara uvāca -
citrasena iti khyātaḥ kāśīrājaḥ purābhavat /
śūro dātā sudharmātmā sarvakāmasamṛddhimān

sā purī janasaṃkīrṇā nānāratnopaśobhitā /
vārāṇasīti vikhyātā gaṅgātīramupāśritā

śaraccandrapratīkāśā vidvajjanavibhūṣitā /
indrayaṣṭisamākīrṇā gopagokulasaṃvṛtā

bahudhvajasamākīrṇā vedadhvaninināditā /
vaṇigjanairbahuvidhaiḥ krayavikrayaśālinī

yantrādānaiḥ pratolībhiruccaiścānyaiḥ suśobhitā /
devatāyatanairdivyairāśramairgahanairyutā

nānāpuṣpaphalairramyā kadalīkhaṇḍamaṇḍitā /
panasairbakulaistālairaśokairāmrakaistathā

rājavṛkṣakapitthaiśca dāḍimairupaśobhitā /
vedādhyayananirghoṣaiḥ pavitrīkṛtamaṅgalā

tasyā uttaradigbhāge āśramo'bhūtsuśobhanaḥ /
tanmandāravanaṃ nāma triṣu lokeṣu viśrutam

bahumandārasaṃyuktaṃ tena mandārakaṃ viduḥ /
vipro dīrghatapā nāma sarvadā tatra tiṣṭhati

tapastapati so'tyarthaṃ tena dīrghatapāḥ smṛtaḥ /
sa tiṣṭhati sapatnīkaḥ sasutaḥ sasnuṣastathā

śuśrūṣanti sadā tasya putrāḥ pañca prayatnataḥ /
tasya putraḥ kanīyāṃstu ṛkṣaśṛṅgo mahātapāḥ

vedādhyayanasampanno brahmacārī guṇānvitaḥ /
yogābhyāsarato nityaṃ kandamūlaphalāśanaḥ

tiṣṭhate mṛgarūpeṇa mṛgayūthacarastadā /
dinānte ca dinānte ca mātāpitroḥ samīpagaḥ

abhivādayate nityaṃ bhaktimānmuniputrakaḥ /
punargacchati tatraiva kānane girigahvare

krīḍanbālamṛgaiḥ sārddhaṃ pratyahaṃ sa muneḥ sutaḥ /
kadāciddaivayogena ṛkṣaśṛṅgo mamāra saḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūlabhedamāhātmye ṛkṣaśṛṅgacaritre dīrghatapomunyākhyānavarṇanaṃ nāma dvipañcāśattamo'dhyāyaḥ //