Skanda Purana · Verses 5.52-2

// śrīviśveśvara uvāca // //
dvyadhikaṃ devi jānīhi paṃcāśattamamīśvaram //
oṃkāreśvara ityākhyā yasyāsti bhuvanatraye

prākṛte kalpasaṃjñe tu prathame prathamaṃ mayā //
vaktrādutpādito devi puruṣaḥ kapilākṛtiḥ

tataḥ sa puruṣo divyaḥ kiṃ karomītyupasthitaḥ //
vibhajātmānamityukto mayāṃtarddhānago'bhavat

/
nirvāṇasyeva dīpasya gatistasya na lakṣitā //
tatastasyābhavacciṃtā kathamātmā vibhajyate

evaṃ ciṃtayatastasya caturmityotthitastataḥ //
trivarṇasvararūpī ca caturvargaphalapradaḥ

ṛgyajuḥsāmanāmā ca brahmaviṣṇuśivātmakaḥ //
vyāpnuvansakalām̐llokānprabhāvaiḥ pṛthubhistadā

oṃkāra iti tasyākhyā mayā datā prasādataḥ //
tadoktābhirudārābhirvāṇībhiḥ samalaṃkṛtaḥ

hṛdayāttasya devasya vaṣaṭkāraḥ samutthitaḥ //
chaṃdasāṃ pravarā devī caturviṃśākṣarā parā

ṣaṭkukṣiḥ sā tripādā ca paṃcaśīrṣopalakṣitā //
samīpavarttinī devī pārśve tatra vyavasthitā

gāyatrī madhurābhāṣā sāvitrī lokaviśrutā //
sa coṃkāro mayā prokto gāyatryā saha pārvati //
sṛṣṭiṃ kuru mamādeśādvicitrāmanayā saha

ityuktastriśikho bhūtvā hiraṇyasadṛśākṛtiḥ //
sṛṣṭimutpādayāmāsa svaśarīrānmamājñayā

pūrvaṃ devagaṇāścaiva trayastriṃśacca devatāḥ //
manuṣyā ṛṣayaścaiva vedaprāmāṇyataḥ kṛtāḥ

teṣāṃ dehe praviṣṭānāṃ prādurbhāvaḥ punarbhavet //
yathā sūryasya satatamudayāstamanaṃ bhavet

saṃhṛtyoṃkāramakhilānsadevāsurapannagān //
kṛtātmagarbhe bhagavānoṃkāro jagataḥ prabhuḥ

sasarja sarvabhūtāni kalpāṃte parvatātmaje //
avyaktaḥ śāśvataścaiva tasya sarvamidaṃ jagat

karttā caiva vikarttā ca saṃhartā ca mahāṃstu yaḥ //
oṃkārapūrvakā vedā yajñāścoṃkārapūrvakāḥ

oṃkārapūrvakaṃ jñānaṃ tapaścoṃkārapūrvakam //
svayaṃbhūriti vijñeyaḥ sa brahmā bhuvanādhipaḥ

sa vāyuriti vijñeyaḥ sarvajñaḥ sa prajākaraḥ //
viśve devāstathā sādhyā rudrādityāstathāśvinau

prajānāṃ patayaścaiva sapta caiva maharṣayaḥ //
vasavo'psarasaścaiva gaṃdharvāścaiva rākṣasāḥ

daityāḥ piśācā rakṣāṃsi bhūtāni vividhāni ca //
brāhmaṇāḥ kṣatriyā vaiśyāḥ śūdrā mlecchādayo bhuvi //
sarve catuṣpadāścaiva tiryagyonigatāstadā

jaṃgamāni ca sattvāni yaccānyajjīvasaṃjñakam//
kṛtvā sarvamaśeṣaṃ ca mamāṃtikamupāgataḥ

praṇamya prayato bhūtvā vacanaṃ cedamabravīt //
kṛtā sṛṣṭirmayā deva tvatprasādānmaheśvara

dehi me paramaṃ sthānaṃ yathā kīrttirdhruvā bhavet //
oṃkārasya vacaḥ śrutvā mayā proktaṃ varānane

mamābhīṣṭakaraṃ sthānaṃ nityamavyayamakṣayam //
mahākālavanaṃ divyaṃ sarvasaṃpatkaraṃ śubham

tatra te bhavitā kīrttiḥ śāśvatī nātra saṃśayaḥ //
śūleśvarasya devasya pūrvabhāge vyava sthitam

trikalpaprabhavaṃ liṃgaṃ tvannāmnā khyātimeṣyati //
oṃkāreśvara ityākhyā bhaviṣyati jagattraye

ityukto hi mayā devi oṃkāro hṛṣṭamānasaḥ //
dadarśa tatra talliṃgaṃ tasmim̐lliṃge layaṃ gataḥ

tataḥ prabhṛti vedeṣu oṃkāraḥ kriyate dvijaiḥ //
puṇyārthaṃ maṃgalārthaṃ ca prathamaṃ sarvavastuṣu //

layaṃgato yadoṃkārastadāprabhṛti pārvati //
mayocyamānaṃ liṃgasya prabhāvātiśayaṃ śṛṇu

yadyugādisahasreṣu vyatīpātaśateṣu ca //
ayanānāṃ sahasreṣu yatpuṇyaṃ samudāhṛtam //
tatpuṇyamadhikaṃ devi ॐkāreśvaradarśanāt

caturṣvapi ca vedeṣu samadhīteṣu yatphalam //
tato'dhikaṃ phalaṃ proktamoṃkāreśvaradarśanāt

brahmacaryeṇa yatpuṇyaṃ yāvajjīvaṃ kṛtena ca //
tatpuṇyamadhikaṃ proktamoṃkāreśvaradarśanāt

karīṣasādhane puṇyaṃ yacca puṇyamanāśake //
tatpuṇyamadhikaṃ devi ॐkāreśvaradarśanāt

pūjāyāṃ yatphalaṃ proktaṃ tasya saṃkhyā na vidyate

kiṃ yajñairbahuvittāḍhyaiḥ kiṃ tapobhiḥ suduṣkaraiḥ //
ॐkāradarśanādeva tatphalaṃ labhate yataḥ

pūjanātsparśanādvāpi kīrttanācchravaṇāttathā //
ॐkāreśvaradevasya narāḥ syurmuktibhājanāḥ

eṣa te kathito devi prabhāvaḥ pāpanāśanaḥ //
ॐkāreśvaradevasya śṛṇu viśveśvaraṃ param

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmya ॐkāreśvaramāhātmyavarṇanaṃnāma dvipaṃcāśattamo'dhyāyaḥ