સ્કંદ પુરાણ · શ્લોક 5.52-2

॥ શ્રીવિશ્વેશ્વર ઉવાચ ॥ ॥
દ્વ્યધિકં દેવિ જાનીહિ પંચાશત્તમમીશ્વરમ્ ॥
ઓંકારેશ્વર ઇત્યાખ્યા યસ્યાસ્તિ ભુવનત્રયે

પ્રાકૃતે કલ્પસંજ્ઞે તુ પ્રથમે પ્રથમં મયા ॥
વક્ત્રાદુત્પાદિતો દેવિ પુરુષઃ કપિલાકૃતિઃ

તતઃ સ પુરુષો દિવ્યઃ કિં કરોમીત્યુપસ્થિતઃ ॥
વિભજાત્માનમિત્યુક્તો મયાંતર્દ્ધાનગોઽભવત્

।
નિર્વાણસ્યેવ દીપસ્ય ગતિસ્તસ્ય ન લક્ષિતા ॥
તતસ્તસ્યાભવચ્ચિંતા કથમાત્મા વિભજ્યતે

એવં ચિંતયતસ્તસ્ય ચતુર્મિત્યોત્થિતસ્તતઃ ॥
ત્રિવર્ણસ્વરરૂપી ચ ચતુર્વર્ગફલપ્રદઃ

ઋગ્યજુઃસામનામા ચ બ્રહ્મવિષ્ણુશિવાત્મકઃ ॥
વ્યાપ્નુવન્સકલાઁલ્લોકાન્પ્રભાવૈઃ પૃથુભિસ્તદા

ઓંકાર ઇતિ તસ્યાખ્યા મયા દતા પ્રસાદતઃ ॥
તદોક્તાભિરુદારાભિર્વાણીભિઃ સમલંકૃતઃ

હૃદયાત્તસ્ય દેવસ્ય વષટ્કારઃ સમુત્થિતઃ ॥
છંદસાં પ્રવરા દેવી ચતુર્વિંશાક્ષરા પરા

ષટ્કુક્ષિઃ સા ત્રિપાદા ચ પંચશીર્ષોપલક્ષિતા ॥
સમીપવર્ત્તિની દેવી પાર્શ્વે તત્ર વ્યવસ્થિતા

ગાયત્રી મધુરાભાષા સાવિત્રી લોકવિશ્રુતા ॥
સ ચોંકારો મયા પ્રોક્તો ગાયત્ર્યા સહ પાર્વતિ ॥
સૃષ્ટિં કુરુ મમાદેશાદ્વિચિત્રામનયા સહ

ઇત્યુક્તસ્ત્રિશિખો ભૂત્વા હિરણ્યસદૃશાકૃતિઃ ॥
સૃષ્ટિમુત્પાદયામાસ સ્વશરીરાન્મમાજ્ઞયા

પૂર્વં દેવગણાશ્ચૈવ ત્રયસ્ત્રિંશચ્ચ દેવતાઃ ॥
મનુષ્યા ઋષયશ્ચૈવ વેદપ્રામાણ્યતઃ કૃતાઃ

તેષાં દેહે પ્રવિષ્ટાનાં પ્રાદુર્ભાવઃ પુનર્ભવેત્ ॥
યથા સૂર્યસ્ય સતતમુદયાસ્તમનં ભવેત્

સંહૃત્યોંકારમખિલાન્સદેવાસુરપન્નગાન્ ॥
કૃતાત્મગર્ભે ભગવાનોંકારો જગતઃ પ્રભુઃ

સસર્જ સર્વભૂતાનિ કલ્પાંતે પર્વતાત્મજે ॥
અવ્યક્તઃ શાશ્વતશ્ચૈવ તસ્ય સર્વમિદં જગત્

કર્ત્તા ચૈવ વિકર્ત્તા ચ સંહર્તા ચ મહાંસ્તુ યઃ ॥
ઓંકારપૂર્વકા વેદા યજ્ઞાશ્ચોંકારપૂર્વકાઃ

ઓંકારપૂર્વકં જ્ઞાનં તપશ્ચોંકારપૂર્વકમ્ ॥
સ્વયંભૂરિતિ વિજ્ઞેયઃ સ બ્રહ્મા ભુવનાધિપઃ

સ વાયુરિતિ વિજ્ઞેયઃ સર્વજ્ઞઃ સ પ્રજાકરઃ ॥
વિશ્વે દેવાસ્તથા સાધ્યા રુદ્રાદિત્યાસ્તથાશ્વિનૌ

પ્રજાનાં પતયશ્ચૈવ સપ્ત ચૈવ મહર્ષયઃ ॥
વસવોઽપ્સરસશ્ચૈવ ગંધર્વાશ્ચૈવ રાક્ષસાઃ

દૈત્યાઃ પિશાચા રક્ષાંસિ ભૂતાનિ વિવિધાનિ ચ ॥
બ્રાહ્મણાઃ ક્ષત્રિયા વૈશ્યાઃ શૂદ્રા મ્લેચ્છાદયો ભુવિ ॥
સર્વે ચતુષ્પદાશ્ચૈવ તિર્યગ્યોનિગતાસ્તદા

જંગમાનિ ચ સત્ત્વાનિ યચ્ચાન્યજ્જીવસંજ્ઞકમ્॥
કૃત્વા સર્વમશેષં ચ મમાંતિકમુપાગતઃ

પ્રણમ્ય પ્રયતો ભૂત્વા વચનં ચેદમબ્રવીત્ ॥
કૃતા સૃષ્ટિર્મયા દેવ ત્વત્પ્રસાદાન્મહેશ્વર

દેહિ મે પરમં સ્થાનં યથા કીર્ત્તિર્ધ્રુવા ભવેત્ ॥
ઓંકારસ્ય વચઃ શ્રુત્વા મયા પ્રોક્તં વરાનને

મમાભીષ્ટકરં સ્થાનં નિત્યમવ્યયમક્ષયમ્ ॥
મહાકાલવનં દિવ્યં સર્વસંપત્કરં શુભમ્

તત્ર તે ભવિતા કીર્ત્તિઃ શાશ્વતી નાત્ર સંશયઃ ॥
શૂલેશ્વરસ્ય દેવસ્ય પૂર્વભાગે વ્યવ સ્થિતમ્

ત્રિકલ્પપ્રભવં લિંગં ત્વન્નામ્ના ખ્યાતિમેષ્યતિ ॥
ઓંકારેશ્વર ઇત્યાખ્યા ભવિષ્યતિ જગત્ત્રયે

ઇત્યુક્તો હિ મયા દેવિ ઓંકારો હૃષ્ટમાનસઃ ॥
દદર્શ તત્ર તલ્લિંગં તસ્મિઁલ્લિંગે લયં ગતઃ

તતઃ પ્રભૃતિ વેદેષુ ઓંકારઃ ક્રિયતે દ્વિજૈઃ ॥
પુણ્યાર્થં મંગલાર્થં ચ પ્રથમં સર્વવસ્તુષુ ॥

લયંગતો યદોંકારસ્તદાપ્રભૃતિ પાર્વતિ ॥
મયોચ્યમાનં લિંગસ્ય પ્રભાવાતિશયં શૃણુ

યદ્યુગાદિસહસ્રેષુ વ્યતીપાતશતેષુ ચ ॥
અયનાનાં સહસ્રેષુ યત્પુણ્યં સમુદાહૃતમ્ ॥
તત્પુણ્યમધિકં દેવિ ૐકારેશ્વરદર્શનાત્

ચતુર્ષ્વપિ ચ વેદેષુ સમધીતેષુ યત્ફલમ્ ॥
તતોઽધિકં ફલં પ્રોક્તમોંકારેશ્વરદર્શનાત્

બ્રહ્મચર્યેણ યત્પુણ્યં યાવજ્જીવં કૃતેન ચ ॥
તત્પુણ્યમધિકં પ્રોક્તમોંકારેશ્વરદર્શનાત્

કરીષસાધને પુણ્યં યચ્ચ પુણ્યમનાશકે ॥
તત્પુણ્યમધિકં દેવિ ૐકારેશ્વરદર્શનાત્

પૂજાયાં યત્ફલં પ્રોક્તં તસ્ય સંખ્યા ન વિદ્યતે

કિં યજ્ઞૈર્બહુવિત્તાઢ્યૈઃ કિં તપોભિઃ સુદુષ્કરૈઃ ॥
ૐકારદર્શનાદેવ તત્ફલં લભતે યતઃ

પૂજનાત્સ્પર્શનાદ્વાપિ કીર્ત્તનાચ્છ્રવણાત્તથા ॥
ૐકારેશ્વરદેવસ્ય નરાઃ સ્યુર્મુક્તિભાજનાઃ

એષ તે કથિતો દેવિ પ્રભાવઃ પાપનાશનઃ ॥
ૐકારેશ્વરદેવસ્ય શૃણુ વિશ્વેશ્વરં પરમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે ચતુરશીતિલિઙ્ગમાહાત્મ્ય ૐકારેશ્વરમાહાત્મ્યવર્ણનંનામ દ્વિપંચાશત્તમોઽધ્યાયઃ