Skanda Purana · Verses 5.51-2

// īśvara uvāca // //
ekādhikaṃ vijānīhi paṃcāśattamamīśvaram //
devaṃ śūleśvaraṃ devi sarva vyādhivināśanam

ādye kalpe pravṛtte ca rājyahetorvarānane //
devānāṃ dānavānāṃ ca yuddhamāsītsudāruṇam //
daityānāmīśvare jaṃbhe devānāṃ ca śacīpatau

tato devāḥ parābhūtā daityā vijayino'bhavan //
aṃdhako maṃdaraṃ prāpto dūtaṃ me prāhiṇottadā

sa dūto māmuvācoccaiḥ sagarvo duṣṭamānasaḥ //
andhakenāhamādiṣṭaḥ śṛṇu śaṃkara madvacaḥ

gaurīṃ me dehi patnyarthaṃ maṃdarastyajyatāmayam //
evaṃ kṛte kṛtārthastvamanyathā nāsti te gatiḥ

ukto'haṃ tena dūtena tvayā saha mahāgirau //
smitānanaḥ kṣaṇaṃ bhūtvā mayā proktamidaṃ vacaḥ

gaccha dūta mamādeśādaṃdhakaṃ brūhi satvaram//
ihābhyetyāhavaṃ kṛtvā jitvemāṃ sundarīṃ naya

ityuktaḥ prayayau dūtastenākhyātaṃ vaco mama //
andhako'pi tadā daityaḥ samarārthī tu mandaram //
samāyātaḥ sahāmātyo balena caturaṃgiṇā

mayā saha tatastasya ghoraṃ yuddhamabhūcciram //
andhakasya ratho ghoraśchinno bhinnaḥ samaṃ tataḥ

tataḥ kuddhoṃ'dhako devi rathāttasmādavaplutaḥ //
madrathaṃ balavāngṛhya mayā saha balotkaṭaḥ //
yuyudhe sa mahādaityaḥ śūlena tāḍito mayā //

mayā dhṛtontarikṣe sa śūlaproto mahāsuraḥ //
śūlaproto'tha vai duṣṭastāvatsa bhrāmito mayā

susrāva tasya gātrebhyaḥ śoṇitogha stato mahān //
bindaubindau tu raktasya tattulyā dānavāstathā

saṃbhūtāḥ koṭiśo devi tairahaṃ punarardditaḥ //
kiṃ karttavyamiti dhyāyansthi to'haṃ tatra bhāmini

mayā cotpāditā durgā raktadaṃtā subhīṣaṇā //
andhakasya tadā pītaṃ raktaṃ vahuvidhaṃ tayā

tasminpīte tato rakte nottasthurdevi cāpare //
pūrvotthitāstayaivāśu nihatā dānavādhipāḥ //
tena śūlavareṇaiva tatkṣaṇānnidhanaṃ gatāḥ

sa māmuvāca hṛṣṭātmā kṛtāṃ jalipuṭoṃ'dhakaḥ //
tvayi bhaktiḥ sadā mestu durlabhaṃ tava darśanam

svāminā nihataścāhaṃ ko'nyo dhanyataro hi mat //
tvacchūlena vinirbhinno hyantarikṣe tato'pyaham

saṃkalpākṣepavikṣepaṃ kalpakāryapravarttakam //
sahasravaktraśirasaṃ tvāmahaṃ śaraṇaṃ vraje

girīṃdratanayānāthaṃ girīṃdraśikharālayam //
mahālayakṛtāvāsaṃ tvāmahaṃ śaraṇaṃ vraje

evaṃ stuto'haṃ daityena śūlaprotena sundari //
tato me karuṇā jātā kṛtoṃdhako gaṇastadā

sa ca śūlavaro devi mayā prokto mudā tadā //
ehi śūla hato daityastvayā duṣṭoṃdhako mṛdhe

parituṣṭaḥ prayacchāmi paramaṃ sthānamuttamam//
na devairna ca gandharvairnāpi tatparamarṣibhiḥ

saṃprāpyaṃ māmanārādhya tathā vidhvastakalmaṣaiḥ//
māmuvāca tataḥ śūlaḥ praṇamyānatakandharaḥ

yadi prasanno bhagavankaruṇā mayi te yadi //
kathayasva paraṃ sthānaṃ mano me yatra śuddhyati //
duṣṭasaṃparkasaṃjātamanyatpātakamātmanaḥ

tato mayā samādiṣṭaḥ karuṇāśliṣṭacetasā //
mahākālavanaṃ ramyamatipuṇyaphalapradam

tatrāsmatprāptidaṃ liṃgaṃ lokānugrahakārakam //
pṛdhukeśvarapūrveṇa tadārādhaya yatnataḥ

madīyaṃ vacanaṃ śrutvā sa jagāma tvarānvitaḥ //
dadarśa tatra talliṃgamanekaphaladāyakam

liṃgena ca punardṛṣṭaḥ śūlaḥ śaṃkaravallabhaḥ //
saṃbhūto'nekavaktrastu harṣādvismitamānasaḥ

snehātsaṃśleṣito'tyarthaṃ pṛṣṭastu kuśalaṃ punaḥ //
kathitaṃ tena śūlena duṣṭāṃdhaka vadhaṃ tadā

prabhuṇā prerito'tyarthaṃ śuddhyarthaṃ bhavatoṃtike //
tvaddarśanena pūto'haṃ yāsyāmi śivasaṃnidhau //
adyaprabhṛti bhūloke mannāmnā khyā timeṣyasi

tato bhaviṣyatyadhikaṃ darśanātte vṛṇomyaham //
kiṃ tīrthairvividhaiḥ snātaiḥ kiṃ dānairvividhaiḥ kṛtaiḥ

te prāpsyaṃti phalaṃ sarvaṃṃ ye tvāṃ drakṣyaṃti bhaktitaḥ

yaḥ kariṣyati te pūjāṃ bhaktiyukto'pi mānavaḥ //
aṣṭamyāṃ vā caturdaśyāṃ dine bhaumasya bhaktitaḥ //

vimānavaramāsthāya kāmagaṃ ratnabhūṣitam //
uditādityasaṃkāśaṃ sa mudā vicariṣyati

tvannāma ye grahīṣyaṃti sarvadā bhayapīḍitāḥ //
vyādhibhiḥ pīḍitā nityaṃ duḥkhairvā kleśitā bhṛśam //
na bhaviṣyati bhīsteṣāṃ ghorasaṃsārasāgare

ye tvāṃ drakṣyaṃti puruṣā bhāvahīnāḥ prasaṃgataḥ //
na patiṣyaṃti saṃsāre narake cātidāruṇe

ityuktaṃ tena śūlena liṃgamāśliṣya yatnataḥ

eṣa te kathito devi prabhāvaḥ pāpanāśanaḥ //
śūleśvarasya devasya athoṃkāreśvaraṃ śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye śūleśvaramāhātmyavarṇanaṃnāmaikapañcāśattamo'dhyāyaḥ