Skanda Purana · Verses 5.50-2

// śrīmahādeva uvāca // //
śṛṇu devi prayatnena paṃcāśattamamīśvaram //
yasya darśanamātreṇa grahabādhā na jāyate

saṃjñānāma raverbhāryā sā sutā viśvakarmaṇaḥ //
bharttustejo'sahaṃtyātha kadāciccaiva saṃjñayā //
chāyāmayī cātmanastu nirmitā tarasā tayā

sā proktā sādareṇaiva sthīyatāṃ sūryasaṃnidhau //
pṛṣṭyāpi na vācyaṃ te madīyaṃ gamanaṃ raveḥ

ityuktvā sā tadā saṃjñā jagāma bhavanaṃ pituḥ //
saṃjñeyamiti manvāno dvitīyāyāṃ divaspatiḥ //
janayāmāsa tanayaṃ nāmato yaḥ śanaiścaraḥ

tasmiñjāte bhayaṃ jagmuḥ sadevāsuramānuṣāḥ //
trailokyaṃ jātamātreṇa ākrāṃtaṃ sacarācaram

indro'pi bhayasaṃtrasto brahmāṇaṃ śaraṇaṃ gataḥ //
sūryaputrasya vṛttāṃtaṃ kathayāmāsa gadgadam

bhinnaṃ tu rohiṇīcakraṃ vyāptaṃ nakṣatramaṃḍalam //
jātamātreṇa cākrāṃtaṃ trailokyaṃ ravisūnunā

vāsavasya vacaḥ śrutvā brahmā lokapitāmahaḥ //
āhūya sahasā sūryaṃ vacanaṃ cedamabravīt

maryādā kriyatāṃ bhāno vāryatāṃ putra aurasaḥ //
ākrāṃtaṃ tejasā tena trailokyaṃ bhūbhuvādikam

brahmaṇo vacanaṃ śrutvā raviṇā proktamīdṛśaḥ //
asādhyo'yaṃ mama suto vāryatāṃ svayameva tam

paśya me caraṇau dagdhau dṛṣṭimātreṇa līlayā//
brahmāpi bhayasaṃtrasto jagāma manasā harim

sūryasya vacanaṃ śrutvā hariḥ prāptastu tatkṣaṇāt //
brahmaṇo vacanaṃ śrutvā bhītaḥ kṛṣṇo'bravīdidam

gamyatāṃ tatra yatrāste devadevo maheśvaraḥ //
kṛṣṇasya vacanātsarve mamāṃtikamupāgatāḥ

vṛttāṃtaḥ kathitaḥ sarvo raviputrasya pārvati //
mayā smṛtastu saṃprāptaḥ sūryaputrastu tatkṣaṇāt

adhodṛṣṭirmayā dṛṣṭo vakrāṃgo rūpato'sitaḥ //
sthairyaṃ kṛtvā namaskṛtya vijñapto'haṃ śanaiḥśanaiḥ

kimarthaṃ vai smṛto deva dehyājāṃ mama śaṃkara //
ādeśe tava tiṣṭhāmi kiṃ karomi praśādhi mām //

ityukto'haṃ tadā tena raviputreṇa pārvati //
mayā sa vārito'tyarthaṃ mā pīḍaya jagattrayam

tenoktaṃ dehi me sthānaṃ pānamāhārameva ca //
mayā dattaṃ viśālākṣi pūjārthaṃ sthānamuttamam

meṣādirāśisaṃsthaḥ saṃstriṃśanmāsānprapīḍaya //
mānuṣānkramaśo vatsa tatra tṛptimavāpsyasi

aṣṭamaśca caturthaśca dvitīyo janmasaṃsthitaḥ //
dvādaśarāśisaṃstho'pi viruddho bhava sarvadā

ekādaśo vā ṣaṣṭho vā tṛtīya sthānagothavā //
bhava bhavyataro nṝṇāmataḥ pūjā bhaviṣyati

paṃcamo navamaścaiva udāsīnastu saptamaḥ //
bhava rāśigato nityaṃ mānuṣe karma bhiryute

pūjāṃ prāpsyasi cātyarthaṃ grahāṇāmadhikaṃ sadā //
gatiḥ sthirā bhavitrī te varaḥ śreṣṭhobhidhīyate

ataste sthāvaraṃ nāma bhaviṣyati mahītale //
śanaiścarastvaṃ rāśistho grahāṇāmadhiko yataḥ

ataḥ śanaiścaronāma bhaviṣyasi sadā bhuvi //
gajagaṇḍanibhākāro mama kaṇṭhasamopi ca

varṇato hyasito nāma bhaviṣyasi mahītale //
grahamadhye hyadhodṛṣṭirgatirmaṃdā bhaviṣyati //
tuṣṭo dadāsi rājyaṃ ca ruṣṭo vai harasi kṣaṇāt

devāsuramanuṣyāśca siddhavidyādharoragāḥ //
tvatkrūradṛṣṭinihatā nāśaṃ yāsyaṃti nānyathā / २७ //
tava prasādātprāpsyaṃti mano'bhīṣṭaṃ sudurllabham //
anyacca te pradāsyāmi sthānaṃ guhyaṃ manoharam

manobhīṣṭakaraṃ puṇyaṃ devadānavadurlabham //
pralaye'pyakṣayaṃ proktaṃ mahākālavanaṃ param

tatra gaccha mamādeśattvapṛthukeśvarapaścime //
vidyate tatra yalliṃgaṃ tatte nāmnā bhaviṣyati

kīrttireṣā tvadīyāpi trailokye bhavitā dhuvam

ityuktaḥ sthāvaro devi mamājñāpālakastadā //
jagāma tvarito ramyaṃ mahākālavanaṃ śubham

dṛṣṭvā tatraiva talliṃgaṃ sthānaṃ labdhaṃ suśobhanam//
talliṃgaṃ bhuvane khyātaṃ nāmataḥ sthāvareśvaram

śaninoktaṃ tadā devi ye'tra drakṣyaṃti bhaktitaḥ //
mayā prapūjitaṃ liṃgaṃ vikhyātaṃ sthāvareśvaram //
teṣāṃ pīḍā madīyā tu na bhaviṣyati karhicit

madīye ca dine yo vai niyamena prapaśyati //
tasyāhaṃ sakalāṃ bādhāṃ śamayiṣyāmyasaṃśayam

dhakṣyāmi satataṃ pīḍāmanyagrahakṛtāmapi //
madīyaṃ ca bhayaṃ tasya svapne'pi na bhaviṣyati

na grahā na piśācāśca na yakṣā na ca rākṣasāḥ //
vighnaṃ kurvaṃti tasyāpi mayi tuṣṭe na saṃśayaḥ

saṃkrāṃtau śanivāre ca vyatīpāte'yane tathā//
ye paśyaṃti narā bhaktyā liṃgaṃ vai sthāvareśvaram //
bhaviṣyatyakṣayasteṣāṃ sthiro vāsastriviṣṭape

niyamena prapaśyaṃti mama vāre'tra ye narāḥ //
na teṣāṃ duṣkṛtaṃ kiṃcidduṣkṛtotthā na cāpadaḥ

bhaviṣyati na dāridryaṃ na caiveṣṭaviyojanam //
dāsyāmi putrakāmasya phalaṃ putrakṛtaṃ sadā //

adhanasya dhanaṃ caiva bhayārttasyābhayaṃ tathā //
svargaṃ vai svargakāmasya prayacchāmi ca vāṃchitam

ityuktvā pūjayāmāsa bhūyo liṃgaṃ śanaiścaraḥ //
pūjayitvā śubhaiḥ puṣpairbhaktyā tatraiva saṃsthitaḥ

eṣa te kathito devi prabhāvaḥ pāpanāśanaḥ //
sthāvareśvaradevasya śūleśvaramatho śṛṇu

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye sthāvareśvaramāhātmya varṇanaṃnāma paṃcāśattamo'dhyāyaḥ