Skanda Purana · Verses 5.49-3

mārkaṇḍeya uvāca -
andhakaṃ tu nihatyātha devadevo maheśvaraḥ /
umayā sahito rudraḥ kailāsamagamannagam

āgatāśca tato devā brahmādyāśca savāsavāḥ /
hṛṣṭāstuṣṭāśca te sarve praṇemuḥ pārvatīpatim

īśvara uvāca -
upāviśantu te sarve ye kecana samāgatāḥ /
nihato dānavo hyeṣa gīrvāṇārthe pitāmaha

raktena tasya me śūlaṃ nirmalaṃ naiva jāyate /
śubhavratatapojapyarato brahmanmayā hataḥ

kartumicchāmyahaṃ samyaktīrthayānaṃ caturmukha /
āgacchantu mayā sārddhaṃ ye yūyamiha saṃgatāḥ

ityuktvā devadeveśaḥ prabhāsaṃ pratiniryayau /
prabhāsādyāni tīrthāni gaṅgāsāgaramadhyataḥ

avagāhyāpi sarvāṇi nairmalyaṃ nābhavannṛpa /
narmadāyāṃ tato gatvā devo devaiḥ samanvitaḥ

uttaraṃ dakṣiṇaṃ kūlamavāgāhatpriyavrataḥ /
gatastu dakṣiṇe kūle parvate bhṛgusaṃjñitam

tatra sthitvā mahādevo devaiḥ saha mahīpate /
bhrāntvā bhrāntvā ciraṃ śrānto nirviṇṇo niṣasāda ha

manohāri yataḥ sthānaṃ sarveṣāṃ vai divaukasām /
tīrthaṃ viśiṣṭaṃ tanmatvā sthito devo maheśvaraḥ

giriṃ vivyādha śūlena bhinnaṃ tena rasātalam /
nirmalaṃ cābhavacchūlaṃ na lepo dṛśyate kvacit

devairāhvānitā tatra mahāpuṇyā ca bhāratī /
parvatānniḥsṛtā tatra mahāpuṇyā sarasvatī

dvitīyaḥ saṅgamastatra yathā veṇyāṃ sitāsitaḥ /
tatra brahmā svayaṃ devo brahmeśaṃ liṅgamuttamam

saṃsthāpayāmāsa puṇyaṃ sarvaduḥkhaghnamuttamam /
tasya yāmye diśo bhāge svayaṃ devo janārdanaḥ

tiṣṭhate ca sadā tatra viṣṇupādāgrasaṃsthitā /
ambhaso na bhavenmārgaḥ kuṇḍamadhyasthitasya ca

śūlāgreṇa kṛtā rekhā tatastoyaṃ vahennṛpa /
tattoyaṃ ca gataṃ tatra yatra revā mahānadī

jalaliṅgaṃ mahāpuṇyaṃ cakatīrthaṃ nṛpottama /
śūlabhede ca deveśaḥ snānaṃ kuryādyathāvidhi

ātmānaṃ manyate śuddhaṃ na kiṃcitkalmaṣaṃ kṛtam /
tasyaivottarakāṣṭhāyāṃ devadevo jagadguruḥ

ātmanā devadeveśaḥ śūlapāṇiḥ pratiṣṭhitaḥ /
sarvatīrtheṣu tattīrthaṃ sarvadevamayaṃ param

sarvapāpaharaṃ puṇyaṃ sarvaduḥkhaghnamuttamam /
tatra tīrthe pratiṣṭhāpya devadevaṃ jagadguruḥ

rakṣāpālāṃstato muktvā śataṃ sāṣṭavināyakān /
kṣetrapālāḥ śataṃ sāṣṭaṃ tadrakṣanti prayatnataḥ

vighnāstasyopajāyante yastatra sthātumicchati /
kecitkuṭumbāttatāsu vyāgrāḥ kecitkṛṣīṣu ca

kecitsabhāṃ prakurvanti keciddravyārjane ratāḥ /
parokṣavādaṃ kurvanti ke'pi hiṃsāratāḥ sadā

paradāraratāḥ kecitkecidvṛttivihiṃsakāḥ /
anye kecidvadantyevaṃ kathaṃ tīrtheṣu gamyate

kṣudhayā pīḍyate bhāryā putrabhṛtyādayastadā /
mohajāleṣu yojyante evaṃ devagaṇairnarāḥ

pāpācārāśca ye martyāḥ snānaṃ teṣāṃ na jāyate /
saṃrakṣanti ca tattīrthaṃ devabhṛtyagaṇāḥ sadā

dhanyāḥ puṇyāśca ye martyāsteṣāṃ snānaṃ prajāyate /
sarasvatyā bhogavatyā devanadyā viśeṣataḥ

ayaṃ tu saṅgamaḥ puṇyo yathā veṇyāṃ sitāsitaḥ /
dṛṣṭvā tīrthaṃ tu te sarve gīrvāṇā hṛṣṭacetasaḥ

devasya sannidhau bhūtvā varṇayāmāsuruttamam /
idaṃ tīrthaṃ tu deveśa gayātīrthena te samam

guhyādguhyatamaṃ tīrthaṃ na bhūtaṃ na bhaviṣyati /
śūlapāṇiḥ samabhyarcya indrādyairapsarogaṇaiḥ

yakṣakinnaragandharvairdikpālairlokapairapi /
nṛtyagītaistathā stotraiḥ sarvaiścāpi surāsuraiḥ

pūjyamāno gaṇaiḥ sarvaiḥ siddhairnāgairmaheśvaraḥ /
devena bheditaṃ tatra śūlāgreṇa narādhipa

tridhā yatrekṣyate'dyāpi hyāvartaḥ surapūritaḥ /
kuṇḍatrayaṃ naravyāghra mahatkalakalānvitam

sarvapāpakṣayakaraṃ sarvaduḥkhaghnamuttamam /
tatra tīrthe tu yaḥ snāti upavāsaparāyaṇaḥ

dīkṣāmantravihīno'pi mucyate cābdikādaghāt /
ye punarvidhivatsnānti mantraiḥ pañcabhireva ca

vedoktaiḥ pañcabhirmantraiḥ sahiraṇyaghaṭaiḥ śubhaiḥ /
akṣarairdaśabhiścaiva ṣaḍbhirvā tribhireva vā

pṛthagbhūtairdvijātīnāṃ tīrthe kāryaṃ narādhipa /
brahmakṣatraviśāṃ vāpi strīśūdrāṇāṃ tathaiva ca

puruṣāṇāṃ trayīṃ dhyātvā snānaṃ kuryādyathāvidhi /
daśākṣareṇa mantreṇa ye pibanti jalaṃ narāḥ

te gacchanti paraṃ lokaṃ yatra devo maheśvaraḥ /
kedāre ca yathā pītaṃ rudrakuṇḍe tathaiva ca

pañcarephasamāyuktaṃ kṣakāraṃ surapūjitam /
oṅkāreṇa samāyuktametadvedyaṃ prakīrtitam

yastatra kurute snānaṃ vidhiyukto jitendriyaḥ /
tilamiśreṇa toyena tarpayetpitṛdevatāḥ

kulānāṃ tārayedviṃśaṃ daśapūrvāndaśāparān /
gayādipañcasthāneṣu yaḥ śrāddhaṃ kurute naraḥ

sa tatra phalamāpnoti śūlabhede na saṃśayaḥ /
yastatra vidhinā yukto dadyāddānāni bhaktitaḥ

tudakṣayaṃ phalaṃ tatra sukṛtaṃ duṣkṛtaṃ tathā /
gayāśiro yathā puṇyaṃ pitṛkāryeṣu sarvadā

śūlabhedaṃ tathā puṇyaṃ snānadānāditarpaṇaiḥ /
bhaktyā dadāti yastatra kāñcanaṃ gāṃ mahīṃ tilān

āsanopānahau śayyāṃ varāśvān kṣatriyastathā /
vastrayugmaṃ ca dhānyaṃ ca gṛhaṃ pūrṇaṃ prayatnataḥ

sayoktraṃ lāṅgalaṃ dadyātkṛṣṭāṃ caiva vasuṃdharām /
dānānyetāni yo dadyādbrāhmaṇe vedapārage

śrotriye kulasampanne śuciṣmati jitendriye /
śrutādhyayanasampanne dambhahīne kriyānvite /
trayodaśāhaḥsvekaikaṃ trayodaśaguṇaṃ bhavet

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūlabhedotpattimāhātmyavarṇanaṃ nāmaikonapañcāśattamo'dhyāyaḥ //