Skanda Purana · Verses 5.49-2

//īśvara uvāca//
śṛṇu paṃcāśadekonaṃ deveśaṃ pṛthukeśvaram//
yasya darśanamātreṇa sārvabhaumo naro bhavet

vaṃśe svāyaṃbhuve devi hyaṃgo rājā babhūva ha //
mṛtyostu duhitā tena pariṇītā sudurmukhā

venanāmā suto jāto nāstiko dharmadūṣakaḥ //
devabrahmasvahārī ca parabhāryāpahārakaḥ

sa ca śapto dvijairdevi tatkṣaṇānnidhanaṃ gataḥ //
tadūrormathyamānāttu nipeturmlechajātayaḥ

śarīre māturaṃśena kṛṣṇāṃjanacayaprabhāḥ //
pituraṃśātsamutpanno dhārmiko dvijasattamaiḥ //
mathitāddakṣiṇāddhastātpṛthuḥ prathitavikramaḥ

sa viprairabhiṣiktaśca tapaḥ kṛtvā suduṣkaram //
viṣṇorvareṇa mahatā prabhutvamagamannṛpaḥ

sa ca svādhyāyarahitā nirvaṣaṭkāranirddhanāḥ //
hāhābhūtāḥ prajā dṛṣṭvā tato'bhūdduḥkhito nṛpaḥ

sa dogdhumaicchattrailokyaṃ sadevāsuramānuṣam

etasminnaṃtare prāpto nārado munisattayaḥ //
krodhāviṣṭaṃ pṛthuṃ dṛṣṭvā vākyaṃ cedamuvāca ha

lokatrayavināśāya mā kopaṃ kuru bhūpate //
pṛthvyānayā grāsitāni sasyāni vividhāni ca //
gilitāni ca annāni viddhyevaitanmataṃ mama

nāradasya ca vākyena krodhaṃ cakre pṛthustadā //
nirdagdhumaicchatpṛthivīṃ saśai lavanakānanām

mumoca śastramāgneyaṃ tena sā dharaṇī tadā //
dahyamānā bhayārttā ca gaurbhūtvā pṛdhumabhyagāt

sā vadhyamānā tenaiva nṛpaṃ vacanamabravīt //
śaraṇaṃ samanuprāptā gaurahaṃ nṛpasattama

gauravadhyā mahīpāla vatsaṃ kṛtvā ca dugdhi mām

tasyāstadvacanaṃ śrutvā dudoha nṛpasattamaḥ //
bhāsvadratnāni sasyāni kṛtvā vatsaṃ himālayam

jātāḥ prajāśca sumukhāḥ pravṛttaśca mahotsavaḥ //
pravṛttā yāgadānādi kriyā magalapūrvikāḥ

rājātha ciṃtayāmāsa mayā pāpamidaṃ kṛtam //
avadhyāśca striyaḥ proktā gauravadhyā dvijastathā

strīrūpadhāriṇī pṛthvī mohādeṣā mayā hatā //
govadhe ca kṛtā buddhiraho pāpaparaṃparā//
tasmādvahniṃ pravekṣyāmi citāṃ kṛtvā na saṃśayaḥ

evaṃ ciṃtayatastasya pṛthoramitatejasaḥ //
ājagāma punastatra nārado bhagavānṛṣiḥ

dṛṣṭvā tathāvidhaṃ dīnaṃ ciṃtayānaṃ pṛthuṃ priye //
uvāca nārado dhīmānkimetaditi pārthiva

tataḥ sa kathayāmāsa mayā pāpamidaṃ kṛtam//
avadhyā strī hatā vipra kṛtā buddhiśca govadhe

kām̐llokānu gami ṣyāmi kṛtvā karma sudāruṇam //
mariṣyāmi na saṃdeho brahmahā pāpapūruṣaḥ

atha ceṣṭopadeśena duḥkhāduddhara māṃ dvija //
tasya tadvacanaṃ śrutvā kathayāmāsa nāradaḥ //
mahāpāpapraśamanaṃ liṃgamāhātmyamuttamam

mahākālavane liṃgamabhayeśvarapaścime //
mahāpāpakṣayakaraṃ vidyate tatra bhūpate //
gaccha tvaṃ sahasā rājaṃstatra pūto bhaviṣyasi

nāradasya vacaḥ śrutvā pṛdhustatra jagāma saḥ //
dṛṣṭvā liṃgaṃ ca vai ramyaṃ vipāpastatkṣaṇādabhūt //

dvādaśādityasaṃkāśo babhūva pṛthivīpatiḥ

tatoṃ'tarikṣagairdevi kṛtaṃ nāma varānane //
pṛthunā pūjito yasmādbhaviṣyati mahītale //
adyaprabhṛti vikhyāto devo'yaṃ pṛthukeśvaraḥ

ye ca drakṣyaṃti deveśaṃ pṛthukeśvaramīśvaram //
te sarvakāmasaṃpūrṇā bhaviṣyaṃti mahītale

ajñānājjñānato vāpi yatpāpaṃ jāyate nṛṇām//
tatpāpaṃ yāsyati kṣipraṃ pṛthukeśvaradarśanāt

vācikaṃ mānasaṃ vāpi kāyikaṃ guhyasaṃbhavam //
prakāśaṃ vā kṛtaṃ pāpaṃ prasaṃgādapi yatkṛtam //
tatsarvaṃ yāsyati kṣipraṃ puthukeśvaradarśanāt

pūjayiṣyaṃti ye bhaktyā devaṃ vai pṛdhukeśvaram //
rājyaṃ prāpsyaṃti te samyaṅnṛloke ca triviṣṭape

bhuktvā rājyaṃ manuṣyāṇāṃ devānāṃ ca mahītale //
yāsyaṃti paramaṃ sthānaṃ brahmaṇaḥ parameṣṭhinaḥ

ityuktvā devasaṃghaiśca pūjitaḥ pṛthukeśvaraḥ //
pṛthuḥ śaśāsa pṛthivīṃ sapattanāṃ saparvatām

eṣa te kathito devi prabhāvaḥ pāpanāśanaḥ //
pṛthukeśvara devasya śṛṇu vai sthāvareśvaram

iti śrīskāṃde mahāpurāṇa ekāśītisāhasryāṃ sahitāyāṃ pañcama āvaṃtyakhaṇḍe caturaśītiliṃgamāhātmye pṛthukeśvaramāhātmyavarṇanaṃnāmaikonapaṃcāśattamo'dhyāyaḥ