Skanda Purana · Chapter 5.49

// sanatkumāra uvāca // //
evaṃ vyāsa purī ramyā nāmabhūtā sanātanī //
yugeyuge yathā jātā tathā khyātā mayā'nagha

// vyāsa uvāca // //
bhūyo'haṃ śrotumicchāmi tvatto brahmavidāṃ vara //
śiprāyāśca kathāṃ puṇyāṃ pavitrāṃ pāpahāriṇīm

sundaraṃ kuṃḍamākhyātaṃ piśācamocanaṃ tathā //
nīlagaṃgā iti proktā karkarājamataḥ param

puṣkarāṇi ca sarvāṇi gayātīrthamanuttamam //
gomatīkuṇḍamākhyātaṃ nāmnā dharmasarastathā

khyātaṃ saṃgamajaṃ tīrthaṃ śanerjanmakathāṃ śubhām //
cyavanāśrame ca yā vārtā tathā nāgālaye śubhe

puruṣottamamahimānaṃ kāle kena kathaṃ bhavet //
etadveditumicchāmi yatte manasi vartate

// sanatkumāra uvāca// //
śṛṇu vyāsa mahābhāga kathāṃ pāpaharāṃ parām//
yasminkāle yadā jātā mahākālavane śubhe

nāsti vatsa mahīpṛṣṭhe śiprāyāḥ sadṛśī nadī //
yasyāstīre kṣaṇānmuktiḥ kiṃ cirātsevanena vai

vaikuṇṭhe jāyate śiprā jvaraghnī ca surālaye //
mahādvāre ca pāpaghnī pātāle'mṛtasaṃbhavā

vārāhakalpe vai proktā viṣṇudeheti nāmataḥ //
śiprāvaṃtyāṃ samākhyātā kāmadhenusamudbhavā

// vyāsa uvāca // //
vicitramidamākhyātaṃ bhavatā ṛṣisattama //
vaktumarhasi śiprāyāḥ samāsena kathāṃ śubhām

// sanatkumāra uvāca // //
brāhmaṃ kapālamādāya bhikṣārthaṃ saṃcaranmahīm //
mahādevo viśuddhātmā sarvalokeṣu sarvataḥ

aprāptabhikṣo bhikṣārthī vaikuṇṭhamagamadvibhuḥ //
gataścātithyavelāyāṃ bhramamāṇo yatastataḥ

lokaniṃdāparaḥ kruddhaḥ kṣudhito bahuvāsaraiḥ //
bhikṣāṃ dehīti bho brahmankṣudhito'haṃ samāhitaḥ

kapālaṃ ca kare kṛtvā ityu vāca punaḥ punaḥ //
gṛhyatāṃ hara bhikṣāṃ te dadāmīti haristadā

ityuktvā karamudyamya tarjanyaguṃlimādadhat //
tadā rudraḥ samādhmātastriśūlenāhana druṣā

tadāṃgulisamudbhūtaṃ bahu susrāvaśoṇitam //
tenāśu pātraṃ tatpūrṇaṃ śaṃkarasya kare sthitam

tadā udvelitā sā vai dhārā jātā samaṃ tataḥ //
tatra sthāne samudbhūtā śiprā'sṛgdhārasaṃbhavā

vaikuṃṭhe cābhavatsadyo nadī trailokyapāvanī //
evaṃ śiprā saricchreṣṭhā triṣu lokeṣu viśrutā

jvaraghnī ca yathā proktā tathā vyāsa bravīmyaham //
yadā bāṇāsuro daityaḥ kṛṣṇena saha saṃyuge

yodhayāmāsa daityeṃdro hyaniruddhapra helanaḥ //
sahasrabāhubhirvīro nānāpraharaṇodyataḥ

tasmātkruddho vāsudevaścakramādāya satvaraḥ //
ciccheda bāhusāhasraṃ kṣurapreṇāśugāminā

sa tadā bhagnasaṃkalpaśchinnadośca vraṇārditaḥ //
parāṅmukhaparo bhūtvā śaṃkaraṃ śaraṇaṃ yayau

tadāgataṃ mahādaityaṃ samīpe bhayavihvalam //
vilokya kṛpayāviṣṭo gate saṃgrāmamūrdhani

chittvā bāhusahasraṃ vai daityarājasya cāhave //
kruddhaḥ kṛṣṇo mahābāhuḥ parasenāṃtako varaḥ

sthito yatrācalo vyāsa tatrāgato maheśvaraḥ //
vārayāmāsa kṛṣṇaṃ vai śaroghaiśca samākiran

anyonyaṃ ca samāsādya kṛtvā yuddhaṃ tu dāruṇam //
śastrāstraiśca mahāghoraiḥ sarvaprāṇibhayaṃkaraiḥ

vaiṣṇavāstraṃ tadā kṛṣṇaḥ saṃdadhe harajighāṃsayā //
pāśupataṃ ca nāmāstraṃ sarvasaṃhārakārakam

/
saṃdadhe vai tadā śaṃbhuḥ kṛṣṇaprāṇaharotsukaḥ //
hāhākārastadā jātaḥ sarvalokeṣu śrūyate

mohanāstraṃ punaḥ kṛṣṇaḥ śivopari mumoca ha //
tenāstreṇa tadā śaṃbhurmohito devamāyayā

jṛṃbhamāṇaḥ sthitaḥ saṃkhye kiṃcitkālaṃ muhurmuhuḥ //
labdhasaṃjñaḥ punarjāto yadā rudro mahāhave

tadā krodhābhibhūtena kṛto māheśvaro jvaraḥ //
lalāṭaphalakātsadyo vīrabhadro mahābalaḥ

trinetrastriśirā hrasvastripādo barkarākṛtiḥ //
kṣudro jaṭilabhasmāṃgo mahāvyādhirduratyayaḥ

kṛṣṇasenāṃ samāsādya mahādevena preritaḥ //
prāṇināṃ kadanaṃ cakre sarveṣāṃ kṛṣṇasaṃginām

parāṅmukhyaparā bhagnā jvarābhighātapīḍitā //
babhūva sahasā vyāsa senā kṛṣṇena pālitā

tathābhūtāṃ samālokya jṛṃbhamāṇā rujārditām //
svasenāṃ bhagnasaṃkalpāṃ māheśajvarapīḍitām

sasarja vaiṣṇavaṃ tāpaṃ kṛṣṇaḥ paramakopanaḥ//
tena saha vaiṣṇavena māheśvareṇa jvareṇa ca

anyonyamabhavadyuddhaṃ ghoraṃ ghorataraṃ mahat //
saṃgrāmaṃ bahulaṃ kṛtvā bhagno māheśvaro jvaraḥ

sarvalokeṣu gatvā vai na śāṃtiṃ pratijagmivān //
mahākālavane ramye prāptastenābhipīḍitaḥ

nimagno'tha vai śiprāyāṃ tataḥ śāṃtiṃ parāṃ yayau //
dṛṣṭvā māheśvaraṃ śāṃtaṃ jvaraṃ paramakopanam

vaiṣṇavo 'pi samāsādya tasyāṃ majjanamācarat //
tasyāḥ prabhāvasannaṣṭau jvaro hariharodbhavau

tasmātsarveṣu kāleṣu jvaraghnī sā'bhavatkṣaṇāt //
jvarābhibhūtāstāṃ prāpya janāḥ paramaduḥkhitāḥ

nimajjaṃti ca śiprāyāṃ vyāsoṣasi samāhitāḥ //
na teṣāṃ bādhate pīḍā jvarodbhūtā kadācana //

satyamuktaṃ tadā vyāsa brahmaharihareṇa ca

ye śṛṇvaṃti kathāṃ divyāṃ narāścaikāgramānasāḥ //
na teṣāṃ jāyate kiṃcijjavarasaṃtāpajaṃ bhayam //

iti śrīskāṃde mahāpurāṇa ekāśītisāhasryāṃ saṃhitāyāṃ paṃcama āvaṃtyakhaṃḍe'vantīkṣetramāhātmye śiprāyā māhātmye jvarānugrahonāmaikona paṃcāśattamo'dhyāyaḥ